Ñwaè' Mfaè' Ñgaâa Ntuu Jisoès 8
8
1Sol à m byemi enɛ a yʉ Stɛfàn. À m ba à nòŋ anà a kɛ' a ce fa ŋgɛ' nè cor ce à rla' Jɛ̀rusalɛ̀m sê. Yi ka' ba wa'a, ŋgǎa rbyemì a da'sè à bdì' wɛɛwɛ à ŋgǒŋ Jùdiyà ba à ŋgǒŋ Sàmarìyà. Bèe mo' efa wǎp mʉ ce a m ku cu à rla' Jɛ̀rusalɛ̀m à m ku ba ŋgǎa ntuu Jisòs. 2Bèe mo' ce a m fa yap ntee nè Nyʉ̀ a m tuŋ Stɛfàn, a war li rkwe sê. 3Sol à m fa ŋgɛ' nè cor sê. E m ce dù à mndap jɛɛ jɛ̀ɛ jɛɛ ce koshi mmbaŋrù ba bbyèŋge ce fa mbe shaŋ.
4Bèe ce a m da'se yap nà, a m ce fè'shi blǎa Nyʉ̀ à bdì' wɛɛwɛ ce wowèe a m dù. 5Felep à m dù à mʉ bu' rla' mo' à ŋgǒŋ Sàmarìyà, a suŋ àmbò Krǎis anà nè běe àfo. 6Bkʉr bèe ca a ka' yu' yuu ce Felep à m làa, kèr yɛ mncòo ce e m dùŋshi, a ker lor nfè' a yu'shi bòŋboŋ sê. 7Byʉ' bbebep ce vi m niŋ njep bèe magòr, vi m ce waani, ce fʉʉse enjep bèe anà. Bèe magòr ce yàp ŋgʉ̀' nyor mò' à m kwe, ker ba bèe ce a m ba mntɛ̀ŋ a m lùŋ. 8Běe à rla' anà a m lu'shi sê.
9Ŋwɛ̀ mò' à m ba, a too ye enɛ Saimʉ̀n À m ba ŋwɛ̀ ce e m be ce gèe fii à rla' Sàmarìyà, běe à to' anà a ce bɛ̀ɛŋger sê. E m ce gèe fii anà a ce nàa nyor enɛ e yu ŋwɛ̀ ŋger. 10Bèe wɛɛwɛ a m yu'shi yuu ce e m ce làa bòŋboŋ, kɛ' embe běe bkɛ'kɛ' du ba' mbe běe bgòrgòr, a laa enɛ̂, “Ŋwɛ̀ ca yu ŋger Nyʉ̀ ce a ce too enɛ Ŋger Ce Gòr nà.” 11Wowèe a m yu' yuu ce e m ce làa bòŋboŋ njobè' yi fii ce e m gèe à bfè' àŋgoo, bèe a bɛɛŋgèr nà.
12Geewa'a, wowèe a ka' byemi Nsuŋ Mbòŋmboŋ ce Felep à m fè'shi àmbò kʉʉ Nyʉ̀ ker ba àmbò rlii Jisos Krâis, a baptìr wowèe, mmbaŋrù ba bbyèŋge. 13Saimʉ̀n ye ye à m byemi, a ka' bàptir ye, e ku ce kar a Felêp. E ka' yɛ mncòo ba buu bghagha' ce Felep à m gèe, e bɛɛŋgèr sê.
14Ŋgǎa ntuu Jisòs e Jɛ̀rusalɛ̀m a ka' yu' enɛ běe à ŋgǒŋ Sàmarìyà a yu' blǎa Nyʉ̀ a byemi, a tuu Pità ba Jǒn enɛ a du yɛ wowèe. 15Wowèe a ka' dù bà', a loo nè bèe anà tɛ wowèe a bo koni Yʉ' Rara, 16njobè' Yʉ' Rara yi m be suu mbe wǎp ndù ka'. A m ku baptir wowèe ba à rlii Tata Jisòs. 17Yi ka' ba wa'a, wowèe a lɛ map mmbo mbe wǎp ndù, wowèe a konì Yʉ' Rara.
18Saimʉ̀n à ka' yɛ enɛ ŋgǎa ntuu Jisòs a lɛ̀ mmbo mbendù bèe, wowèe a konì Yʉ' Rara, e vʉ nè mbàa enɛ e bo fa nè wowèe, 19a laa enɛ̂, “Fa nè mɛ̀ njɛ̀ɛ ŋger ca foŋ, mɛ mɛ̌ lɛ̀ mmbo mbendù ŋwɛ̀, ŋgàŋ bo koni Yʉ' Rara.” 20Pità à laa nè ye enɛ̂, “Wèe yo mbàa anà du bʉ à cicì njobè' à ce kwà'shi enɛ àde' à yuu rfa Nyʉ̀ nè mbàa! 21Rfà' ca yu lo rfà' ka'. À tʉr bo njo ka' njobè' yo ntee yi yu rara à bsii Nyʉ̀ ka'. 22Kupse, ma'shi wo bsàrbuu, loo nè Tata enɛ kɛ̀ e be fòosi wɛ̀ yuu ce à ce kwà'shi njep wɛ̌ ntee nà ɛ̀. 23Mɛ̀ yɛ mɛnɛ à yu ŋwɛ̀ ntee sii, yo ŋgěe bebep yi kur wɛ̀.” 24Saimʉ̀n à laa enɛ̂, “Loo nè nè Tata Nyʉ̀ nè mɛ̀ enɛ yuu mo' efa yuu wèe à làa na yi fa koni mɛ̀ ka'.”
25Wowèe a ka' suŋ bèe àmbò Jisòs, kèr fè'shi blàa Tatâ, a nati a kʉti Jɛ̀rusalɛ̀m. Wowèe a ka' ce kʉti a fe'shi Nsuŋ Mbòŋmboŋ ca à ku' mla' magòr à ŋgǒŋ Sàmarìyà.
26Ncìndap Tata Nyʉ̀ à laa nè Felep enɛ̂, “Nàti du mbà mbùuŋgòŋ, njep nduunjì ce yi lǒ à rla' Jɛ̀rusalɛ̀m a du à rla' Gaasà.” Yu nduunjì ce yi yu à rìŋ. 27E natì a ce dù, a ka' ce dù, a yɛ ŋwɛ̌ à to' Ìtopìyà. À m ba ŋwɛ̀ ce a m sòŋ, ce e m ce fà' njeptii Mayǎa Kandɛ̀s ce e m ce sa' to' Ìtopìyà. Buu Mayǎa wɛɛwɛ à m ba mba yě mmbò. E m dù à rla' Jɛ̀rusalɛ̀m à rgèe rloo nè Nyʉ̀, 28a ka' ce kʉti, a cu mbe yì mutù ce à m ce sʉ̀ŋ ba mnyàabàrà', a ce bè' ŋwǎ' Àsayà ŋwɛ̀ ncep ntuu Nyʉ̀. 29Yʉ' yi laa nè Felep enɛ̂, “Dù tee mutù ca.” 30Felep à ka' caŋ dǔ bà', a yu' àmbò e ce bè' embe ŋwà' Àsayà ŋwɛ̀ ncep ntuu Nyʉ̀. E bipshì nè ye enɛ̂, “Wɛ̌ bè' wa'a, a riŋ yuu ce yi ce làa a?” 31E laa enɛ̂, “Àde' m riŋ à njɛ̌ɛ kɛ ce ŋwɛ̀ mò' à ka' tɛ nàshi nè mɛ̀ ka'?” E m làa nè Felep enɛ e ko' cu a ye mbe mutù anà.
32Dì' embe Ŋwǎ' Nyʉ̀ ce e m ce bè' à m ba dì' ce a saŋ enɛ̂,
“Àmbò njèe ce a ke dù àgho à rsɛɛ,
kɛ̀ muu njèe ce a ke koo mnyǒr efa gho e ce war ka' nà,
e m mʉ̀' yi cùu ka'.
33Bèe a m lòr ye à yuu cicì,
a sa' vi mnsa' nè mnàŋ-ŋwɛ̀.
Ŋwɛ̀ mò' yu ce àde' e suŋ àmbò yi ràrà ka',
njobè' a tee li ryòŋ enjep ŋgòŋ.”
34Ŋwɛ̌ nsòŋ ca à laa nè Felep enɛ̂, “Suŋ là mɛ̀, ŋwɛ̀ ce ŋwɛ̀ ncep ntuu Nyʉ̀ anà ce làa du kuu ye yu nda? E ce làa ba àmbò yì nyor kɛ̀ àmbò ŋwɛ̀ mò' lɛ?” 35Felep à kɛ' embe dì' ce ŋwɛ̀ anà à ba ce bè' nà, a fe'shi Nsuŋ Mbòŋmboŋ kuu Jisòs nè ye.
36Wowèe a ka' ce dù, a yɛ rdip mo', ŋwɛ̌ nsòŋ ca a laa enɛ̂, “Yɛ̂, a rdip na. Yuu ce àde' yi jepsì wɛ̀ efa rbàptir mɛ̀ yu kɛ?” 37[Felep à laa enɛ̂, “Wɛ̀ ka' byemi nè yo ntee-ŋwɛ̀, m baptìr wɛ̀.” E beesì enɛ̂, “Mɛ̀ byemi enɛ Jisos Krǎis yu muu Nyʉ̀.”] 38E ka' bèesi wa'a, a lâa, mutù cà à tɛɛ. E ka' tɛɛ, Felep ba ŋwɛ̌ nsòŋ anà a suu njep rò, Felep à baptìr ye. 39Wowèe a ka' fʉʉ enjep rò, Yʉ' Tata yi lor Felep a du àgho, ŋwɛ̌ nsòŋ ca à ker yɛ ye ka', a nati a ce dù, a ce lu'shi. 40Felep à ka' lò a ku yɛ enɛ e yu à rla' Àsotòs, a ka' ce càa, a ce fè'shi Nsuŋ Mbòŋmboŋ à mla' wɛɛwɛ caar a du a ba' Sisàriyà.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 8: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.