Ñwaè' Mfaè' Ñgaâa Ntuu Jisoès 26
26
1Agripà à laa nè Pol enɛ̂, “Mɛ̀ fa wɛ̀ njì enɛ à laa eku wɛ̌ cùu.” Pol à naa bo mbekì a laa yuu. E m làa enɛ̂, 2“Ŋkʉʉ Agripà, mɛ̀ yɛ mɛnɛ mɛ̀ koni rbǒŋtu ntìni na à rtɛɛ a wɛ̌ bsii làa yuu kuu buu wɛɛwɛ ce Jus a làa kuu mɛ̀. 3Yi yu wa' ghup njobè' wɛ̀ rìŋ ndèe to' Jus ker ba buu ce wowèe a ke sɛr mnsɛr àtu mo, banɛ m ce bu' mmbo nè wɛ̀ enɛ à kur ntee yu'shi yuu ce m be làa. 4Jus wɛɛwɛ a rìŋ njɛ̀ɛ ŋwɛ̀ ce mɛ̀ m ba, kɛ' embe nfè' mɛ̀ m ba ghàrŋwɛ̀ a ce cu a mɛ̌ to' ker ba à nfè' ce mɛ̀ m ce cu à rla' Jɛ̀rusalɛ̀m. 5Wowèe a rìŋ mɛ̀ kɛ' ese à nfè' njìsàp sê. Wowèe a ka' koŋ à rlàa, àde' a ku laa enɛ mɛ̀ m ba mò' efa mʉ̀ bèe ce a ke gèe mcɛ̌r à njɛ̀ɛ njì ce a ke loo nè yàp Nyʉ̀ ka', a cu àmbò ŋwɛ̀ Farìsî. 6Mɛ̀ tɛɛ mbena sè'ni à mnsa' njobè' mɛ̀ byemi, a ce kè' buu ce Nyʉ̀ à m kà' nè visèe btâ, 7à ba buu ce visèe mntɛ̌' ncòp baa-à-rrʉ̀ʉ a ce loo nè Nyʉ̀ nètʉ' ba nèmootì, a ce kè' foŋ enɛ a be koni vi. Tàr Maŋgòŋ, yu njobè' rbyemì ca ce enɛ Jus a lòr mɛ̀ à mnsa'. 8Yi yu tatap nè wèe à rbyemi enɛ Nyʉ̀ e ke fʉr bèe ce a kweŋger efa rkwe njokɛ?
9“Mɛ mɛ̀ foŋ à m kwà'shi mɛnɛ mɛ̀ ba gèe yuu wɛɛwɛ ce àde' m gêe, à rkani buu ce vi m ba kuu Jisòs à rla' Nasarɛ̀t. 10A yuu ce mɛ̀ m gèe à rla' Jɛ̀rusalɛ̀m. Mɛ̀ m loo njì ese běe bgòrgòr efa mʉ̀ ŋgǎa taŋshi taŋshì, a du a fa bèe Nyʉ̀ magòr se à shaŋ. Bèe a ka' ce yʉshi wowèe, mɛ̀ byemì foŋ. 11Mɛ̀ m dù à mndap mloo à nfè' àŋgoo à rfa ŋgɛ' nè wowèe, a gheter à rgèe tɛ wowèe a kani enɛ a be kèr byemi nè Jisos Krǎis ka'. Ntee yi m bep mɛ̀ nè wowèe sê, mɛ̀ du a fa ŋgɛ' nè wowèe caar a ba' à mlǎ' à bto' mo'.
12“À ka' kèr ba à nfè' mò', mɛ̀ ker nati a ce dù à rla' Dàmaskòs, běe bgòrgòr efa mʉ̀ ŋgǎa taŋshi taŋshì a saŋ ŋwà' a fa mɛ̀ ŋger enɛ m du koo wowèe. 13Tàr Maŋgòŋ, nyʉ̀ à ka' kùu ŋgòŋ, mɛ̀ yɛ àmbò rraa li raa embe bùu, mbe mɛ̌ ndù, ker ba à ndù bèe ce wèr wowèe à m ce dù. Rraa anà li m raa a caa nyʉ̀. 14Wèr wɛɛwɛ à gweŋgèr à nshè, mɛ̀ yu' àmbò njèndoŋ ce làa nè mɛ̀ à li Hibrù enɛ̂, ‘Sôl, Sôl, À ce fa mɛ̀ ŋgɛ' njokɛ? Wɛ̀ ka' yɛ lùr ku tʉʉ kùu njo, banɛ yi be yaŋ ba wɛ̀.’ 15Mɛ̀ beesì mɛnɛ̂, ‘Tatâ, a wɛ̀ nda?’ Tata à laa enɛ̂, ‘A mɛ̀ Jisòs ce à ce jar nè ye nà. 16Nàti tɛɛ mbekì, njobè' mɛ̀ vʉ̀ tɛ m bo ce wɛ̀ à yà ŋwɛ̀ rfà', ker ba à ŋwɛ̀ ce à be ce suŋ bèe buu ce wɛ̀ yɛ ese mɛ̀ ntìni na, ker ba vì ce m be lò dùŋshi wɛ̀. 17M be fʉr wɛ̀ embà mmbo bèe Isrɛ̀l, ba embà mmbo bèe enje jɛɛ. 18M ce tuu wɛ̀ enɛ à du mʉ' map mmir, gee tɛ wowèe a fʉʉ efa tʉ̀'nji du à rraa, lo enjeptii Satàn du njeptii Nyʉ̀, tɛ a bo fòosi wowèe efa yàp buu bbebep, tɛ wowèe a koni dì' à mʉ̀ bèe ce Nyʉ̀ à gèe wowèe a ba brara njobè' wowèe a byemi nè mɛ̀ nà.’
19“Yi ka' ba wa'a, ŋkʉʉ Agripà, mɛ̀ kani efa rgèe yuu ce Nyʉ̀ à m suŋ mɛ̀ à njɛ̀ɛ rlo mo' nà ka'. 20Mɛ̀ m kɛ̀' a fe'shi nè běe à rla' Dàmaskòs entòmbì, a ka' du a fe'shi à rla' Jɛ̀rusalɛ̀m ba à ŋgǒŋ Jùdiyà, a ker fe'shi nè bèe enje jɛɛ foŋ enɛ wowèe a kupse, ma' yàp buu bbebep, kʉti à mbèp yì Nyʉ̀, gee buu ce vi ce dùŋshi enɛ wowèe a kupse ghup. 21A mbùu ce Jus a m koo mɛ̀ mbe Ndàp Nyʉ̀ a ce ròo à ryʉ mɛ̀. 22Nyʉ̀ à jà' mɛ̀ a ba' ntìni na, mɛ̀ tɛɛ tǎa a ce fè'shi nè běe bkɛ'kɛ' ba běe bgòrgòr. M ce làa yuu mo' jɛɛ caa efa yì ce ŋgǎa ncep ntuu Nyʉ̀ ba Musìs a m làa enɛ yi be kè ba ka'. 23Wowèe a m làa enɛ Krǎis anà be kè yɛ ŋgɛ', ba ŋwɛ̀ entòmbì à rfʉʉ efa rkwe, suŋ nè yì bèe ba bèe enje jɛɛ àmbò rraa ce li raa.”
24Pol à ka' ce làa buu ca à njɛ̌ɛ wa'a, Fɛstòs à waa, a laa enɛ̂, “Pôl, tu yi ce kar wɛ̀ embo! Ku' yo ŋwà' ce wɛ̀ yɛ'ni anà yi gèe wɛ̀ ce baa.” 25Pol à beesì enɛ̂, “Màsà Fɛstòs, tu yi ce kar mɛ̀ embo ka', buu ce m ce làa vi yu mini, a ba nè bfee-ŋwɛ̀. 26Ŋkʉʉ rìŋ buu ca. M ka' ce làa nè ye m ker ce wɛp yuu mo' ka'. Mɛ̀ rìŋ nè mini-ŋwɛ̀ enɛ e mɛŋni mo' efa buu ca ka' njobè' a m gèe vi ba à bsʉ̀ti ka'. 27Ŋkʉʉ Agripà, wɛ̀ byemi yuu ce ŋgǎa ncep ntuu Nyʉ̀ a m làa a? Mɛ̀ rìŋ mɛnɛ wɛ̀ byemi.” 28Agripà à laa nè Pol enɛ̂, “Ǎ kwà'shi enɛ àde' à ku lor nfè' mʉcàcàr wa'a, gee m ba ŋwɛ̀ rbyemì a?” 29Pol à laa enɛ̂, “Kɛ̀ yu nfè' yǐ mʉcàr ɛ̀, kɛ̀ yu yǐ njìsàp ɛ̀, m ce loo nè Nyʉ̀ mɛnɛ wɛ̀ ker ba bèe wɛɛwɛ ce a ce yu' yuu ce m ce làa ntìni na, a ba ba àmbò mɛ mɛ̀ yu na, ke' ba ŋgǎa shaŋ foŋ àmbò mɛ̀ ka'.”
30Ŋkʉʉ ba govanò ba Bɛ̀nîs, ker ba bɛr bèe wɛɛwɛ a natì mbekì. 31A ka' nàti dù, a sèesî, a laa enɛ̂, “Ŋwɛ̀ ca ce gèe yuu mo' ce àde' a ba yʉ ye kɛ̀ fa ye à shaŋ ka'.” 32Agripà à laa nè Fɛstòs enɛ̂, “Ŋwɛ̀ ca à ka' tɛ bà làa enɛ ŋkwe Rum a ŋwɛ̀ ce e be sa' vi mnsa' ka', sèe à ba mà'shi ye tɛ e dû.”
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 26: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.