Ñwaè' Mfaè' Ñgaâa Ntuu Jisoès 24
24
1Mnòŋ vi ka' càa tâ, Ànàniyàs ce e m ba tu nè ŋgǎa taŋshi taŋshì à lor bleebèe ba loyà mò' ce a m ce too enɛ Tɛ̀tulò, wowèe a du a suŋ govanò buu ce Pol à m gèe. 2A kɛ' Pôl, e ka' vʉ̀, Tɛ̀tulò à kɛ' a ce suŋ govanò buu ce Pol à m gèe, a ce làa nè ye enɛ̂, “Wɛ̀ sa' wèr, wèr à cu nè cumʉnyaŋ-ŋwɛ̀ sê. À ka' ba njo' buu ce wɛ̀ gèe nè wèr, bdì' wɛɛwɛ efa yer ŋgòŋ vi ba yɛɛnì. 3Wèr à byemi yuu ce wɛ̀ gèe na à bdì' wɛɛwɛ ba à nfè' wɛɛwɛ, a ce yòŋshi wɛ̀ magòr sê. 4M ce kòŋ mɛnɛ m caasi yò nfè' ka', a ce bu' mmbo nè wɛ̀ enɛ à fa mʉ nfè' mò', yu' yuu ce wèr be suŋ wɛ̀. 5Wèr à yɛ ŋwɛ̀ ca à ba ŋwɛ̀ ŋgɛ' sê. E ce tèesi btu ese Jus à ŋgòŋ wɛɛwɛ, a ba tu mo' nè bèe ce a dà' enjep nduunjì Nyʉ̀ ce a too enɛ Nasarɛ̂n. 6E m ghèter foŋ enɛ e gee tɛ Ndap Nyʉ̀ ba jàpri, wèr à koo ye. [Wèr à m ce kwà'shi wernɛ wèr be lòr yer ncir sa' vi mnsa' àgho. 7Wèr à ka' ce kwà'shi wa'a, Lesà ce e yu tu yǐ gòr à vʉ̂, a koo ye ese wèr à ŋger, 8a laa enɛ bèe ce a ce kòŋ à rsa' mnsa' a Pol nà a vʉ yɛ wɛ̀.] Wɛ̀ ka' bipshi buu nè ye, wɛ wɛ̀ foŋ ku riŋ yuu ce yi yu mini kuu buu ce wèr à suŋ wɛ̀ enɛ e gèe na.” 9Jus a m bèe njì Tɛ̀tulò, a laa enɛ buu ce e làa vi yu mini.
10Govanò à naa bo enɛ Pol lâa, Pol à laa enɛ̂, “Mɛ̀ rìŋ mɛnɛ wɛ̀ sa' to' ca à bfè' àŋgoo, mɛ̀ ce lu'shi à rsuŋ yuu ce yi yu. 11Àde' wɛ wɛ̀ foŋ ku fyɛ' yɛ enɛ kɛ̌' nyʉ̀ ce mɛ̀ m dù à rla' Jɛ̀rusalɛ̀m à rloo nè Nyʉ̀ vʉ ba' ntìni na, ku ba ba mnòŋ ncòp baa-à-rrʉ̀ʉ. 12Jus a m yɛ mɛ̀ ce sɛr mnsɛr wèr ŋwɛ̀ mò' embe Ndàp Nyʉ̀ ka', a ker yɛ enɛ mɛ̀ ce kɛ̀' ŋgɛ' à mndàp mloo kɛ̀ à dì' mo' à rla' na ka'. 13Àde' wowèe a duŋshì nè wɛ̀ enɛ buu ce a ce suŋ enɛ mɛ̀ gèe na vi yu mini ka'. 14Yuu ce m ce byemi a wɛ̌ bsii yi yu enɛ, m ce loo Nyʉ̀ wêr bta à nduunjì mo' ce Jus a làa yap enɛ a nduunjǐ yɛɛnì ka'. Mɛ̀ byemi buu wɛɛwɛ ce a saŋ mbe ŋwǎ' mncir ba mŋwǎ' ŋgǎa ncep ntuu Nyʉ̀. 15Mɛ̀ byemi nè Nyʉ̀, a ce kè' àmbò wowèe foŋ a byemi a ce kè' enɛ běe bbòŋboŋ ba běe bbebep a be kè fʉʉ efa rkwe nà. 16Yi ka' ba wa'a, mɛ̀ ce ghèter sê, à rlɛ̀ ya ntee rara à nfè' wɛɛwɛ à bsii Nyʉ̀ ba ŋwɛ̀.
17“Bfè' mo' vi ka' càa, mɛ̀ lo a vʉ̌ a mɛ̌ to' tɛ m bo jà' ŋgǎa ŋgɛ' nè mbàa, kèr fa rfa nè Nyʉ̀. 18Mɛ̀ ka' ce gèe buu ca, wowèe a vʉ a yɛ mɛ̀ mbe Ndàp Nyʉ̀. Wowèe a m ce yɛ mɛ̀ wa'a, mɛ̀ gèe nè yuu ce ncir yi làa enɛ ŋwɛ̀ gee tɛ e bo ba rara à bsii Nyʉ̀ nà wɛɛ, a ba wèr kʉr bèe ka', ŋgɛ' mò' à ba ka'. 19Ka' yi yu wa'a, Jus mǒ' à ŋgǒŋ Ɛshà a m ba àfo. Wowèe a ba vʉ̀ tɛɛ a wɛ̌ bsii, làa yuu, ce yi ka' ba enɛ wowèe a tʉr yuu kuu mɛ̀. 20Ka' bèe ce a vʉ̀ na, a ba suŋ fàa ce mɛ̀ m gèe ka' kè tɛɛ mbe kansùr. 21Ku ba yuu yi mo'sir ca ce mɛ̀ rìŋ mɛnɛ mɛ̀ m làa mbe kansùr: Mɛ̀ m làa mɛnɛ̂, “Mɛ̀ tɛɛ mbe kansùr ntìni na njobè' mɛ̀ byemi mɛnɛ bèe ce a kweŋger a be kè fʉʉ efa rkwe.”
22Fɛlìs ce e m rìŋ nduunjì anà bòŋboŋ sê, à ku' mnsa', a laa nè wowèe enɛ̂, “Lesà ce e yu tu yǐ gòr nè bsoogɛ̀ nà à ka' vʉ̂, m ka' teni wee mnsa' ca.” 23E m làa nè tu nè bsoogɛ̀ rjèe enɛ a ke'ni Pôl, a ker laa enɛ a kè'ni wa'a, a gee tɛ e ce koo mbɛp, ma'shi tɛ bkar vi a ce vʉ̀ ce jà' ye nè buu.
24Mnòŋ mo' vi ka' càa, Fɛlìs à vʉ a ŋgwa yì ce a m ce too enɛ Dusilɛ̀ ce à m ba muu Jûs. E tuu bèe, a vʉ nè Pôl, Pol à ka' vʉ̀ a suŋ àmbò rbyemǐ nè Jisos Krâis, e ce yu'shi. 25Pol à ka' kɛ̀' ce suŋ àmbò ŋgěe yɛɛnì ba àmbò àde' ŋwɛ̀ kur ntee ker ba àmbò nòŋ mnsa' Nyʉ̀, Fɛlìs à wɛ̂p, a laa enɛ̂, “Wɛ̀ làa yi ghɛɛ sè'ni. Dù yo yu. M be koni fɛŋ tɛ m ka' kèr tuu bèe tɛ a vʉ nè wɛ̀.” 26E m ce kwà'shi foŋ enɛ Pol be yuni ye. E ka' ce kwà'shi wa'a, a ce kɛ' Pol àfo àfo a ce de' a ye. 27Bfè' vi ka' cǎa bbaa, Poshò Fɛstòs à lor dǐ' Fɛlìs, a ba à govanò. Fɛlìs à m ce kòŋ enɛ e gee tɛ nyor boŋ Jûs. E ka' kòŋ wa'a, a ku lɛ Pol mbe shaŋ.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 24: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.