Ñwaè' Mfaè' Ñgaâa Ntuu Jisoès 14
14
1Wowèe a ka' bà' à rla' Ìkonìyòm, a niŋ mbe ndap rloo Jus àmbò a m niŋ à rla' Antìyòk nà, a fe'shi bòŋboŋ sê. Jus magòr sê, ker ba bèe enje jɛɛ a byemì. 2Ka' yi m ba wa'a, Jus ce a m byemi ka', a m barsi bèe enje jɛɛ, a karsi wap btu, a gee wowèe a baa bfʉr. 3Pol wèe a m lòr nfè' a cu àfo a ce fè'shi àmbò Tatâ, nè ntee-ŋwɛ̀. Tata à m fa wowèe ŋger, wowèe a duŋshì mncòo, a gee buu bbɛ̀ɛ à rdùŋshi enɛ yuu ce wowèe a m ce fè'shi àmbò rbǒŋ Nyʉ̀ yi yu mini. 4Běe à rla' anà a m fʉʉ nto'nì baa, bèe mo' a du à ŋgʉ̀' yì Jûs, bèe mo' a du à ŋgʉ̀' yì ŋgǎa ntuu Jisòs. 5Bèe enje jɛɛ ba Jûs, ker ba bèe ce a m ba btu nè wowèe, a kwa'shì a byemi enɛ a be jar nè ŋgǎa ntuu Jisòs, tʉʉshi wowèe nè blùr. 6Wowèe a ka' yu', a caŋ a du a ŋgǒŋ Lìkonìyà, a ka' bà', a du à rla' Listrà ba Dɛbè, ba mla' ce mi m ba àgee mla' ca, 7a ce fè'shi Nsuŋ Mbòŋmboŋ àfo.
8Ŋwɛ̀ mò' à m ba à rla' Listrà ce e m kepŋger. E m ku ba wa'a kɛ' embe nfè' ce a m bi ye. E m be jɛr ka'. 9E m yu' àmbò Pol ce làa. Pol à ke' ye a yɛ enɛ e tʉr njɛ̀ɛ rbyemì ce àde' li gee ye e jɛ̂r. 10E ka' yɛ wa'a, a laa mbekì enɛ̂, “Nàti, tɛɛ mbekì.” Ŋwɛ̀ anà a nyɛɛ mbekì, a kɛ' a ce jɛ̀r. 11Kʉr bèe a ka' yɛ yuu ce Pol à m gèe na, a waa, a laa à li Lìkonìyà enɛ̂, “Mnyʉ̀ vi kʉti àmbò bèe wa'a, a vʉ fa sěe mʉ.” 12Wowèe a m too Bànabàs enɛ Siyùs, a too Pol enɛ Hɛmɛ̀, njobè' a ye ce e m ce làa yi buu gòr. 13Ndap Siyùs à m ba àgee rla'. Ŋwɛ̀ taŋshi taŋshì nè nyʉ̀ anà à vʉ nè nà' ba fʉ̀lawà njep cǔu ŋka' njobè' ye ker ba yì bèe a m ce kòŋ à rtaŋshi taŋshì nè ŋgǎa ntuu Jisòs. 14Bànabàs ba Pol a ka' yu' yuu ce bèe ca a m ce ròo à rgèe nè wowèe, a shashi wap bcɛ̀', a caŋ a niŋ mbe wǎp mʉ, a laa mbekì enɛ̂, 15“Yèr bèe, wèe ce gèe wa' njokɛ? Wèr yu bèe àmbò wèe. Wèr à vʉ̀ à rfè'shi Nsuŋ Mbòŋmboŋ nè wèe tɛ wèe bo mà'shi buu bcicì ca, byemi ba nè Nyʉ̀ ce e yu ntèe, à ba Nyʉ̀ ce e m boo rbuu ba nshe ba mdip ker ba buu wɛɛwɛ. 16À m ba mbe nfè' entòmbì, e ma'shì bto' wɛɛwɛ vi ce gèe àmbò vi gwɛɛ. 17Ka' yi m ba wa', Nyʉ̀ à m be borni efa rdùŋshi wèe njɛ̀ɛ ŋwɛ̀ ce e yu à nfè' wɛɛwɛ à buu bbòŋboŋ ce e ce gèe nè wèe ka'. E gèe mbèŋ ce gwè, wèe ce koni byee njep nfě' mbòŋmboŋ, ce ye, ce yu', ce lu'shi.” 18Ka' wowèe a m làa buu ca wa'a, wowèe a m lòr nfè' se à rgèe enɛ bèe ca a borni efa rtaŋshi taŋshì nè wowèe.
19Jus mo' a lo a vʉ̌ à rla' Antìyòk ba Ìkonìyòm, a ka' bèesi mntee ese bèe, a wowèe bsìp a tʉʉshì Pol nè blùr, a ka' kwà'shi enɛ e kwe, a sʉŋ à nshè a fʉʉ àgho efa là'. 20Ŋgǎa yɛ'ni buu Jisòs a ka' vʉ̀ mbe yě ndù, e natì mbekì a kʉti à mʉ̀ rla'. Tʉ̀' à ka' raa, a Bànabàs a natì a du à rla' Dɛbè.
21Wowèe a m fè'shi Nsuŋ Mbòŋmboŋ à rla' anà, a gee bèe magòr a byemì, a ba ŋgǎa yɛ'ni buu Jisòs. A ka' mìsi, a kʉti a caa rla' Listrà ba Ìkonìyòm, a ba' à rla' Antìyòk à ŋgǒŋ Pìsidìyà. 22Wowèe a m fa ŋger nè ŋgǎa yɛ'ni buu Jisos à mla' anà, a ce làa nè wowèe enɛ wowèe a tɛɛ tatap njep rbyemì. A m làa enɛ̂, “Sèe be kù yɛ ŋgɛ' wɛɛ ka' niŋ mbe dǐ' kʉʉ Nyʉ̀.” 23Wowèe a m ce btu embe cor nè bcor wɛɛwɛ à mla' anà, a ce loo ce jì mdip, ce fa wowèe mbà mmbo Tata ce wowèe a m byemi nè ye nà. 24Wowèe a ka' càa ŋgǒŋ Pìsidìyà, a ba' à ŋgǒŋ Pàmfilìyà, 25a fe'shi blàa Tata à rla' Pɛgà, a nati a du à rla' Àtalìyà. 26Wowèe a natǐ àfo, a niŋ mbe keŋ a du à rla' Antìyòk, fàdì' ce a m fa wowèe mbà mmbo Nyʉ̀ tɛ Nyʉ̀ bo kè'ni wowèe, tɛ wowèe a gee rfà' ce wowèe a m gèe a misi nà. 27Wowèe a ka' bà', a kɛ' ŋgǎa cor wɛɛwɛ, a suŋ wowèe buu ce wowèe a m gèe à ŋger Nyʉ̀. A m suŋ wowèe àmbò Nyʉ̀ à fa fɛŋ nè bèe enje jɛɛ à rbyemì. 28Wowèe a m cu àfo a ŋgǎa yɛ'ni buu Jisos wèe à nfè' njìsàp.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 14: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.