Ñwaè' Mfaè' Ñgaâa Ntuu Jisoès 10
10
1Ŋwɛ̀ mò' à m ba à rla' Sisàriyà ce li rlii li m ba enɛ Kòniyùs. E m ba tu nè kʉr bsoogɛ̀ ce a m ba rjèe. A m ce too kʉr bsoogɛ̀ anà enɛ bsoogɛ̀ enje Italè. 2À m ba ŋwɛ̀ ce a yì ndap à m fa yàp nyor nè Nyʉ̀, a ker ce wɛp ye foŋ. E m ba mmbo mtoo nè bèe wɛɛwɛ, a ce loo nè Nyʉ̀ à nfè' wɛɛwɛ. 3À ka' ba à nòŋ mo', àmbò à nyʉ̀ taar nèmootì, e yɛ yuu mo' àmbò rlo wa'a. E m yɛ ncìndap Nyʉ̀ bòŋboŋ se àmbò e vʉ̀, a niŋ mbe ndàp, a laa nè ye enɛ̂, “Kòniyùs.” 4Kòniyùs a ke' ye enɛ ntuŋ-ŋ-ŋ, a kâŋ, a laa nè ye enɛ̂, “Tatâ, yu kɛ?” E laa nè ye enɛ̂, “Nyʉ̀ à yu' lo rloo, a yɛ enɛ à yu mmbo mtoo, a ce kuushi wɛ̀. 5Banɛ à tuu bèe à rla' Jopà tɛ wowèe a du vʉ̀ nè Saimʉ̀n ce li rlii mo' li yu enɛ Pità nà. 6E ce cu a Saimʉ̀n ŋwɛ̀ yaati mŋgǔp nyàa, ce yì ndap yu àwǎa rdip rgòr nà.”
7Ncìndap Nyʉ̀ ce e m làa nè ye nà à ka' dù, e kɛ' boo mfà' embe yě ndàp a baa ker ba ŋwɛ̀ soogɛ̀ ce e m fa yì nyor nè Nyʉ̀, ce e m ba mò' efa bèe ce a m ce fà' nè ye. 8E ka' suŋ wowèe buu wɛɛwɛ, a tuu wowèe à rla' Jopà.
9Tʉ̀' à ka' raa, wowèe a ce dù, a ka' bà' àtʉtʉ, Pità à ko' mbe tu ndap àmbò à nyʉ̀ ncòp-baa wa'a, à rgèe rloo. 10E ka' ce loo, njè à ka' kɛ̀' ce yaŋ ye, e koŋ à rye yuu. A ka' ce fɛ̀r byee nè ye, e yɛ njɛ̀ɛ rlo mo'. 11E m yɛ àmbò rbuu li mʉ̀'ti, yuu mo' yi ce sùu embo àmbò ma cɛ̌' bɛ̀bɛr wa'a, a ghashì à bcùu kyèe efa gho a suusi njep nshè. 12Mnyàa njɛ̀ɛ jɛɛ jɛ̀ɛ jɛɛ vi m ba njep cɛ̀' anà, ker ba buu mò' àmbò mnyo, ba bbar, ba bsiŋ. 13Njèndoŋ à laa nè ye enɛ̂, “Pità, nàti mbekì, shɛshi, ye.” 14Pità à laa yi yu enɛ̂, “Tatâ, mɛ̀ ka'. Mɛ̀ m be ye ya yu yuu ce ncir yi kani ka'.” 15Njèndoŋ ca à ker laa nè ye enɛ̂, “Nyʉ̀ à ka' gee yuu yi ba rara, à fa lòr yuu anà àmbò yuu ce yi raa ka' ka'.” 16Ca yi m koni nfè' taar, a lor yuu anà njà' mò'sir, a kʉti àgho mbe bùu.
17Pità à ka' ce seŋ enɛ rlo ce e yɛ nà li ce làa ba enɛ kɛ lɛ, bèe ce Kòniyùs à m tuu nà a banì vʉ a roo ndap yì Saimʉ̀n a yɛ, a tɛɛ njep cùu ŋka' ce a m sìr ndap anà àgho, 18a bipshi enɛ, “Saimʉ̀n ce li rlii mo' li yu enɛ Pità nà ce cu mbe ndàp na a?” 19Pità à m ku bii ce seŋ àmbò rlo ce e m yɛ nà, Yʉ' yi laa nè ye enɛ̂, “Yɛ̂, bèe a mntaar a ce ròo wɛ̀. 20Nàti, suu njep nshè. Fa wɛp à rdù wèe wowèe ka', njobè' à tuu mɛ̀ a tuu wowèe.” 21Pità à suu a yɛ wowèe, a laa enɛ̂, “A mɛ̀ ŋwɛ̀ ce wèe ce ròo nà. Wèe à vʉ̀ à rròo mɛ̀ enɛ kɛ?” 22Wowèe a beesì enɛ̂, “Kòniyùs ce e yu tu nè bsoogɛ̀ rjèe, à tuu wèr. E yu ŋwɛ̌ nyɛɛnì, a ce wɛp Nyʉ̀, Jus wɛɛwɛ a ce làa buu bbòŋboŋ kuu ye. Ncìndap Nyʉ̀ mò' ce nrara à laa nè ye enɛ e kɛ' wɛ̀ tɛ à vʉ mbe yě ndàp, tɛ e bo yu' yuu ce à be làa nè ye.” 23E lâa, a wowèe a niŋ mbe ndàp a nôŋ.
Tʉ̀' à ka' raa, e natì a du a wowèe, bfʉr mǒ' à rla' Jopà a du a yě mbùu. 24Tʉ̀' mò' à ka' kèr raa, wowèe a ba' à rla' Sisàriyà. Kòniyùs à m cu a ce kè' wowèe, a kɛ'shi bèe ce a wowèe a m ràte, ba bkar vi vi mntee, wowèe a vʉ mbe yě ndàp. 25Pità à ka' niŋ, Kòniyùs à konì ye, a gwe njep yě tìi a ca'ni ye àmbò a ke cà'ni Nyʉ̀ nà. 26Pità à naa ye mbekì, a ce làa nè ye enɛ̂, “Nàti mbekì, mɛ mɛ̀ foŋ ku ba ŋwɛ̀ àmbò wɛ̀.” 27E ka' ce de' a ye, a ye a niŋ mbe ndàp, e yɛ ku' bèe àmbò a cu mbo. 28E m làa nè wowèe enɛ̂, “Wèe rìŋ weenɛ ncir yi yɛ'ni enɛ ŋwɛ̀ ce e yu ŋwɛ̀ Jus kar kɛ̀ ca'ni ŋwɛ̀ enje jɛɛ ka'. Geewa'a, Nyʉ̀ à gèe mɛ̀ riŋ mɛnɛ àde' m ker lor ŋwɛ̀ mò' àmbò ŋwɛ̀ ce àde' wèr ye buu efa rkar ka'. 29A mbùu ce wɛ̀ ka' tuu bèe enɛ a vʉ kɛ' mɛ̀, mɛ̀ laa yuu mo' ka', a ku nati a ce vʉ̀. M ce bipshi nè wɛ̀ enɛ wɛ̀ tuu bèe enɛ m vʉ gee kɛ lɛ.”
30Kòniyùs à laa enɛ̂, “Mnòŋ vi càa sè'ni kyèe ce mɛ̀ mʉ ba mbe mɛ̌ ndàp, à nfě' sè'ni ce yu nyʉ̀ taar nèmootì na, a ce loo. Ŋwɛ̀ mò' à ku lo a tɛɛ kùntombì nè mɛ̀, a yar bcɛ̀' ce vi m ce raa sê, 31a laa enɛ̂, ‘Kòniyùs, Nyʉ̀ à yu' lo rloo a yɛ enɛ à yu mmbo mtoo, a ce kuushi wɛ̀. 32Banɛ à tuu bèe à rla' Jopà tɛ wowèe a du vʉ̀ nè Saimʉ̀n ce li rlii mo' li yu enɛ Pità nà. E ce cu mbe ndàp mbe Saimʉ̀n ŋwɛ̀ yaati mŋgǔp nyàa, ndap anà à ba àwǎa rdip rgòr.’ 33Mɛ̀ càasi nfè' ka', a tuu bèe enɛ a vʉ kɛ' wɛ̀. Wɛ̀ gèe yuu bòŋboŋ sê, a vʉ̂. Wèr yu mbena sè'ni à bsii Nyʉ̀, tɛ wèr bo yu' yuu ce Tata à làa nè wɛ̀ enɛ à laa nè wèr.”
34Pità à laa enɛ̂, “Mɛ̀ rìŋ nè mini-ŋwɛ̀ enɛ Nyʉ̀ e ke lòr ŋwɛ̀ mò' jɛɛ ka'. 35Ŋwɛ̀ wɛɛwɛ ce e ka' ce wɛp Nyʉ̀, ce gèe yuu ce yi yu yɛɛnì, kɛ̀ ŋgàŋ yu ŋwɛ̌ à to' efɛ ɛ̀, banɛ Nyʉ̀ be koo ye mmbo mmbaa. 36Wèe rìŋ ntuu ce Nyʉ̀ à m cep nè běe à to' Isrɛ̀l, a ce suŋ bèe Nsuŋ Mbòŋmboŋ àmbò cumʉnyaŋ ce e ce lò ese ye njì enjep Jisos Krǎis ce e yu Tata nè bèe wɛɛwɛ. 37Wèe rìŋ yuu ce yi m koni à ŋgǒŋ Judà wɛɛwɛ. Yi m kɛ̌' à ŋgǒŋ Galèlê, rfè'shì ce Jǒn à m ce fè'shi tɛ e bo bàptir bèe nà li m banì caa wɛɛ. 38Yi m ba enɛ Nyʉ̀ à m sùusi Yʉ' Rara mbe tu Jisòs, a ce ye, a fa ye ŋger. E m dù à bdì' wɛɛwɛ a ce gèe buu bbòŋboŋ a ce gèe bèe wɛɛwɛ ce nyʉ̀rkà' à m tʉr ŋger mbe wǎp ndù a ce lùŋ, njobè' Nyʉ̀ à m ba a ye. 39Wèr à m yɛ buu wɛɛwɛ ce e m gèe à bbu' mla' à ŋgǒŋ Jùdiyà ba à rla' Jɛ̀rusalɛ̀m nè mer mmir. Wowèe a m yʉ ye, a m kɛ̀ti ye ba mbe ce, e kwê. 40Geewa'a, mnòŋ vi ka' bǎ' btaar, Nyʉ̀ à fʉr ye efa rkwe, a gee e yɛɛtì àwaŋ. 41E m yɛɛti nè bèe wɛɛwɛ ka'. E m yɛɛti ba nè wèr ce Nyʉ̀ à m ce enɛ wèr suŋ bèe àmbò ye, wèr à ba bèe ce wèr à m yeŋger a ker noŋger àbee wèr wowèe à nfè' ce e m fʉʉ efa rkwe. 42E m fa rsa' nè wèr enɛ wèr fe'shi nè bèe, suŋ bèe enɛ yu ye ce Nyʉ̀ à m ce enɛ e ba ŋwɛ̀ ce e be kè sa' bèe ce a cu btèe ker ba bèe ce a m kweŋger. 43Ŋgǎa ncep ntuu Nyʉ̀ wɛɛwɛ a m làa àmbò ye, a suŋ bèe enɛ ŋwɛ̀ ce e ka' byemi, banɛ Nyʉ̀ be fòosi ŋgàŋ efa yì buu bbebep a yě rlii.”
44Pità à ka' kù bii ce làa, Yʉ' Rara yi suu mbendù bèe wɛɛwɛ ce a m yu' blàa ca. 45Ŋgǎa rbyemì efa mʉ̀ bèe ce a m gèe bʉ̀ ce a m vʉ̀ a Pità wèe nà, a m bɛ̀ɛŋger se njobè' Nyʉ̀ à m sùusi yi Yʉ' mbendù bèe enje jɛɛ foŋ. 46Wowèe a m yu' àmbò wowèe a ce làa bli ce wowèe a m yɛ'ni ka', a ce ku'si Nyʉ̀. Pità à lâa enɛ̂, 47“Bèe ca a koni Yʉ' Rara àmbò see sèe à m koni nà. Àde' ŋwɛ̀ mò' kanì enɛ a fa bàptir wowèe ka' a?” 48E m làa enɛ a baptir wowèe à rlii Jisos Krâis. A ka' bàptir wowèe, wowèe a laa nè ye enɛ e cu a wowèe à mʉ mnǒŋ mo'.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 10: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.