Zlr 15
15
Dzrafta Lazglafta ta wi nda Abram
1Tahula tsa skwiha ta maguta ya, ka maravatá Yawe da Abram manda skwi ma suni, kaʼa nda tsi mantsa: « Abram! Ma zləŋ ka ta zləŋ. Iʼi ná, zalama gha yu, dzaʼa vlagha vla yu ta nisəla dagala, » kaʼa. 2Ka Abram mantsa: « Rvera ɗa Yawe, nya dzaʼa vlihata ka na? Haɗ zwaŋ ya yu wa. Ilighezer mnda la Damas dzaʼa za həga ɗa, » kaʼa. 3Ka Abram guli mantsa: « Wya vliha a ka ta zivir wu, mndu ya lu ma həga ga ini a dzaʼa za həga ɗa, » kaʼa. 4Wya gwaɗa mnana Yawe: « Tsatsi a dzaʼa za həga wu, ama zwaŋa huɗa gha ya dzaʼa yata ka, dzaʼa za həga gha, » kaʼa. 5Ka klagaptá tsi dzibil, kaʼa nda tsi mantsa: « Nghadaf ngha ta luwa, ka mbəɗafta ka ta tekwatsaha, ka dzaʼa laviŋ lava ka ta mbəɗafta, » kaʼa. Kaʼa guli mantsa: « Manda tsaya dzaʼa yafta zivira gha, » kaʼa. 6Ka zlghaftá Abram ta skwi mnana Yawe. Tsaya kəl Yawe ka klafta ka tɗukwa mndu. 7Kaʼa nda tsi mantsa: « Iʼi ná, Yawe yu, ta klagaghapta ma Ur ta haɗika Kaldiya, ŋa vlaghatá na haɗik na ŋa gha, » kaʼa. 8Ka Abram nda tsi guli mantsa: « Rvera ɗa Yawe, ndaw dzaʼa grafta yu kazlay ŋa ɗa dzaʼa nzakwa tsi kəʼa na? » kaʼa. 9Kaʼa nda tsi mantsa: « Kliɗik kla ta rva sla hkən viŋa ni#15:9 Viŋa ni: Tsaya vakwa sla ta mbəɗ lu manda yata., nda gu hkən vakwa ni, nda maŋazak hkən vakwa ni, nda ghərbuʼ, nda kuku, » kaʼa. 10Ka hlaftá Abram ta tsa skwiha ya, ka tsatsanapta his his his ka fafata, sani mbəŋ nda sani, sani mbəŋ nda sani, ama tsatsanap a ta tsaha ka ɗyak ya wa. 11Ka saha zarakha da tsukwafta ta ghəŋa tsa mbla rini ya, ama ka ghəzlə Abram ta həŋ.
12Dɗata fitik, ka dzatá mghama hani ta Abram. Ka bukwamtá mghama grusl ta ga zləŋ. 13Ka Yawe nda Abram mantsa: « Snaŋ sna ɗina kazlay na dzaʼa nza nza zivirha gha ka mayəm ta haɗik kul nzakway ka ŋa taŋ kəʼa. Dzaʼa nuna həŋ ka vuʼa, ŋa dulay lu ka həŋ ka vaku fwaɗ dərmək. 14Ama dzaʼa tsanagha tsa yu ta guma ta tsa mndəra mnduha dzaʼa ganaptá vuʼa ta həŋ ya. Tahula tsa, ŋa sliʼapta taŋ nda skwa gadghəl dagala katakata. 15Kagha, ŋa dzaʼa gha slanaghatá dadaha gha nda zɗaku. Ma halakwa zɗaku dzaʼa lamta lu ta kagha. 16Ta mafwaɗa zivir dzaʼa vrakta zivirha gha da hadna, kabga ta ndəghaf a dmakwa la Amuru karaku wu, » kaʼa.
17Manda dɗatá fitik, ka saha grusl tɗik katakata, ka lab zlghakwa vu nda ɗiŋ, ma takataka tsa rini tsatsanap lu ya kay. 18Baɗu tsa fitik ya dzrafta Yawe ta wi nda Abram, kaʼa mantsa: « Nana haɗik na, sliʼafta ni ta wa lika Masar dikw ta wa mghama zala ta nzakway ka Yufratis, vlaŋ vla yu ta zivirha gha. 19Haɗikha la la Keŋ, nda la Kənaz, nda la Kadmuŋ, 20nda la Het, nda la Periz, nda la Rafa, 21nda la Amuru, nda la Kanʼana, nda la Girgas, nda ya nda la Yəbus həŋ, » kaʼa.
Επιλέχθηκαν προς το παρόν:
Zlr 15: xed
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Wycliffe Bible Translators, Inc. All rights reserved.