KAOBAK 42
42
Josef Jaisishuong Ijep To Nyaknola Haubü
1 #
Ykj 7.12 Ladang Jakobei Ijep kaodakaje nyak kia dogo ditkei haoei haoeibü shousi shuong to laukei, “Kan aila chühyoko ong shaida?” 2Haoei athakko laukei, “Ngei Ijepa nyak kia dogo ditda; hibü sen mühei ashemlabü lele khüto yanan sen shanga nyak jekba.” 3Hibü Josefeibü jaisi shuong müt an kho Ijep kaodak to nyak jekla yankei. 4Lausikei Josefeibü na Benjaminje, Jakobei jaisi shuong yoa ohauti, aieilausi thushed denche kühshuoksi amaibüla dogo hao hatkei.
5 #
Ykj 7.11 Hibü lubü nyak jekla haubü shuong yoa Israeleibü shousi shuongkei haukei, aishanga Kanan kaodakakei mühsinou kikei.
6Tou Josef Ijep kaodaka bunyubou yeian, haoei kaodak pendou kabü mütshuong la nyak yaakkukei. Hibü ladang Josefeibü jaisi shuongkei lousühkei, haoenei hao thedanga kaoa khüpetkei. 7Kheijinei Josefei haoeibü jaisi shuong hapbei hoba haoen tongde shenkei, lausikei yenbou to tegü shoulole jongaiko haoen to laukei, “Kan laka louda?” Haoenei jongaikei, “Kanan kaodak ka nyak jekla louda.” 8Josefei haoeibü jaisi shuong shenasikei, haoeneije hao ashen. 9Josefei haoen shangabü mangh kho damenko haoen to laukei, “Kan kokpheibü mütshuong! Kün kaodak hau akibü chühla loukei.” 10Haoenei hao to jongaikei, “Aying, ngeibü bunyubou, kün kaibü sambü shuong nyak jekla ong loukei. 11Kün pendou bou cheeibü shou ki. Künje ngühmaanglanbü mütshuong, kün kokpheibü shuong aying.”
12Kheijinei haoei haoen to laukei, “Aying! Kan kün kaodak hau akibü chühla loukei.” 13Lausikei haoenei laukei, “Kaibü sambü shuong kün jaisina müt anthüknyi Kanan kaodaka kibü müt cheeibü shou, hoba chühashi, kün yoka nashouboutham abou yoa kia, hoba cheje aki.” 14Kheijinei Josefei haoen to laukei, “Kan kokpheibü shuong dogo ngei lauanai! 15Hoei kan takteilabü: Faraoeibü nyena ngei kan to thedalanda, kaneibü na napeibou hato leian aloulonga, kan haka asattilabü. 16Kan yoka che hautian napeibou kho leiba, hoba kanje thüngan photeilabü, khoei ong kaneibü ngüh tükde si jije ngelabü. Amlang yingan kialonga Faraoeibü nyena thekolanko lauda, kan kokpheibü.” 17Hobaje haoei haoen jemala semnyet sühko thüngshanga thüngan phokei.
18Sembounyet Josefei haoen to laukei, “Kanei hai kümashi hoba langkei kishi, aieilausi ngei Mühghaü to hatda. 19Kan ngühmaanglanbü müt yingalonga kaneibü na che thüngshang hanei phokushi, hoba kaneibü chem to müh shanga nyak künan hauashi. 20Hobaje kaneibü na napeibou kho kü jungto leiba, kheijinei kaneibü ngüh ngühmai yinglabü hoba kan ühailabü.” Hobaje haoenei kho kümla khangkei. 21#Mt 7.2 Kheijinei haoenei sangkuko laukei, “Maimaitham sen seneibü na shangabü shedbü kia; aieilausi haoei sen to aeibou sujijajinei hao maang leilubü hapsikei senei ngüha ale. Khoei kho khonsak sen jungto louda.” 22Kheijinei Reubenei laukei, “Ngei kan to nashoubou khulimbo shedbü teküm dogo alausi? Lausikei kanei ngüha ale! Tou chühshima, hao haibü sii sen thükto loungaida.” 23Josefei haoen ai lauyoda kho ditan kikei, lausikei haoenei haoei aditenda dogo dambei, aieilausi Josefei ngüh japbou phoan joyokei. 24Kheijinei Josef haoen thedang ka thenyek sepeian haapbei hoba toukei hao nyiboukei haoen jungto sepeinyu longeian haoen to joyokei, hoba haoen yoka Simeon lapjung louan haoenei hapbo hao khühkei.
Josefeibü Jaisishuong Kanan to Ngaibü.
25Kheijinei Josefei haoeneibü neimoka shaubü shenko jinkula, haoen wekoeibü neimoka lulueibü nam jinngaikula hoba walama shaulakei kushi dogo ngühkhüm kukei; hoba haoen to kho khei kümbei. 26Kho phaia haoenei lulueibü gadua künlekei hoba haoen khüka meimeikei. 27Hobaje nangnak yepshanga haoen yoka cheei haoeibü gadu la oknyinla neimok sengsi haoeibü nam neimok sembunga kiteikei. 28Kheijinei haoei jaisinasi shuong to laukei, “Ngeibü namje ngaitikuakei. Hanei ngeibü neimok sembunga kia.” Hibü haoen on tokan maangpangko joyoko laukei, “Mühghaüei sen to ho ai kümbei?”
29Ladang haoenei Kanan sühkei, haoen to ai kümbei kho pendou bou Jakob to lenkei. 30Haoenei laukei, “Khei Ijep kaodak bunyubouei kün to kaangkosekko joyokei, hoba kaodak kokpheibü shuong dogo laukei. 31Lausikei künei hao to, ‘Kün ngühmaanglanbü mütshuong; kün kokpheibü aying,’ dogo jongaikei. 32Kün bou cheeibü shou müt anthüknyi hoba cheje haia; napeibou kho ong Kanan kaodaka abou yoa kia.” 33Kheijinei kho kaodak bunyubouei kün to laukei, “Kan ayepeibü müt yingalonga hoei ngei ngelabü; kan jaisina yoka müt che kü yoa phokuashi hoba chema mühbünoubü shanga nyak künan ngaishi. 34Lausikei kaneibü na napeibou kho kü jungto leiba, khei yingsi ong kan kokpheibü aying, tükdebü müt yingkei dogo ngei ngelabü. Kheijinei kaneibü na kho kan la ngaitikulabü hoba kün kaodaka kan namyak namseiko kila thükkei.”
35Kho phaia neimok ka shaubü haakletsi mütpem wekoeibü nam lulueibü neimoka hapbei. Hobaje haoenei hoba bouei namsen kho hapan aeibou hatyokei. 36Haoeneibü bou Jakobei haoen to laukei, “Kanei ngo shousi akibüla yeitia. Josef aki, Simeonkei aki, hoba tou Benjaminkei kanei leian haumang sühda. Pendou kho kükhu limbo ki.”
37Kheijinei Reubenei bou to laukei, “Ngei hao ka jungto nyibou aleibalonga küshou nyi ham kho haitishi. Hao kho kü la nongkushi, hoba ngei ka jungto leingaibakho.”
38Kheijinei haoei laukei, “Kü shouje kan yoa ohautilabü; aieilausi haojai haian hao ong jouakei, hibü kaneibü walama denche thushed kühshuokalonga kanei ngo khuthu phaman maangmaua heekhün to attilabü.”
Zur Zeit ausgewählt:
KAOBAK 42: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
