KAOBAK 34
34
Dina hoba Shekhembü
1Tou Lea si Jakobeibü nouyangshou Dina Kanan kaodak kabü yaksa at pean chühla haukei. 2Ladang kho kaonyek kabü yaangenbou Hivbü Hamoreibü shou Shekhemei sao hapbei; haoei senan sungan sao to yepbei, hoba himou bautikei. 3Hobaje haoeibü maang Jakobeibü nouyangshou Dina to kuan apbei hoba haoei sao to sanoukei, hoba haoei medeinyu to eaaoa joyokei. 4Hobaje Shekhemei haobou Hamor to joyoko laukei, “Ho medeinyu ngei yakla lela leiba.”
5Tou Jakobei haoshou nouyangnyu leilua dogo ditkei, lausikei haoshousi shuong shatsinam yoa yama kikei, hoba haoen alungshongko Jakobei ngüh üangko kikei. 6Kheijinei Shekhemeibü bou Hamorei Jakob to joyola haukei. 7Tou Jakobeibü shousi shuong kho ditbüyam yam ka lungkei, hoba mütshuong kho khauangkei, hoba aeibou maangpokyokei; aishanga haoei Jakobeibü nouyangnyu to yepan Israel awealauko jungeikei; laobou kümsilei Israela jungeila janbü aying. 8Lausikei Hamorei haoen to joyoko laukei, “Küshou Shekhemeibü maangponei kaibü nouyangnyu maikuan apa, hibü hao la yakla lela sao kushi dogo ngei ka to sudajada. 9Kün to laolam yaknga leyoashi, kaneibü nouyangshou kün la labü, hoba kan shanga küneibü nouyang shousi leiyettiashi. 10Kan kü yoa kilabü; kan kimang sühbü kaoena kiashi, hoba khünei kian seiatakashi hoba langleko küten ongenashi.”
11Kheijinei Shekhemei yaksanyueibü bousijaisi shuong to laukei, “Kanei kü la kaneibü maangshik haptikai, hoba kanei kü ka ai ong hilaje kho ngei kulabü. 12Yaksa shanga munam hoba jongsak ajanjan pendou hiashi, hoba kanei kü la lenbü tegü ngei kulabü, lausikei medeinyu kho ong küyak la lela labü.”
13Haoei haoeneibü na Dina leilukuabüba Jakob shousi shuongei Shekhem si bou Hamor to huonko jongaikei. 14Haoenei hao to laukei, “Künei küneibü na akipbü müt la kula athük, aieilausi kho kün shanga himoulabü. 15Ho shanga ong künei hehoat laukho; khei kan kün tegü yeiko, kan bousu pendou kipan apshi; 16kheijinei künei küneibü nouyangnyu kan la kulabü hoba kün shanga kaneibü nouyang shousi lelabü, hoba kan yoa kiko phang che ong yeilabü. 17Lausikei kipan apla kanei küneibü ngüha alelonga künei küneibü na leian ngailabü.”
18Kho thusilam kho haoen si Hamor hoba Hamoreibü shou Shekhem thedanga maikuan kikei. 19Heshoubouei haoenei ai laukei kho kümla jih üp, aieilausi haoei Jakobeibü nouyangnyu to nyek pükkei hoba haobou chema pendou to hao aei soumo kuko kikei.
20Hibü Hamor si haoshou Shekhemei haoeneibü sangnyu bakhün to hauan haoen himshuong sangnyu kabü mütshuong to lenko laukei, 21“Habü mütshuong kho kün to paplepakei. Haoen sen kaodaka kitiashi, hoba khünei seititaktiashi, haoen shanga kao apsileko kia. Senei haoeneibü nouyangshousi lela hoba haoenei seneibü lela thükkei. 22Lausikei khübü mütshuong sen yoa kila maangangbü kho ho, haoen tegü sen mütshuong bousu pendou kipan apjan. 23Haoeneibü shatsinam, samkeisamuk hoba haoenei kibü pendou seneibü ayinglep lo? Hibü sen haoen to ngühthang yenkho hoba haoen sen yoa kilabü.” 24Sangnyu bakhün aibü pendouei Hamor si haoshou Shekhemeibü ngüha lekei, hoba sangnyua kibü bousu pendou kipan apbei.
25Sembounyet haoen mou amaiko shatyoko kibü jiha Jakobeibü shousi yoa Dinaeibü jai nyi Simeon si Leviei inlou jungan hauan huphanga sangnyu to louan bousu pendou haitikei. 26Hobaje haoenei Hamor si haoshou Shekhemkei haitikei hoba Dina Shekhem chem ka leilangkei. 27Jakobeibü shousi shuongei haibü mang thükto longan sangnyu khümbo maklangkei, aieilausi haoenei haoeneibü na leilutikei. 28Haoenei haoeneibü sanlon shuong, masu shuong hoba haoeneibü gadu shuong sangnyua kibü si yama kibü ham langkukei. 29Haoenei haoeneibü nyaksinam, nashou hoba yaksi shuong pendou hoba haoeneibü chema kibü pendou kulangkukei. 30Kheijinei Jakobei Simeon si Levi to laukei, “Kanei kaodakbü shuong thedanga lüm hilabü lele Kananbü si Perizbü yoa ngo mangsenbü yeitilabü lele khonsaktia. Sen shisho ong hibü haoenei ngo khulimbo takshatan ngo shilabü, hoba ngo hoba ngeibü chemdang khümbo shemtilabü.” 31Lausikei haoenei laukei, “Haoenei küneibü na to suonlamnyu tegü jungeilep lo?”
Zur Zeit ausgewählt:
KAOBAK 34: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
