LEIYENBÜ 6
6
1Kheijinei Bunyubouei Mosa to laukei, “Tou ngei Farao to ai kümlaje kho nyi haplabü; aieilausi haukibü kü ikei haoei haoen litilabü, hoba haukibü ikei haoei jembü kaonyek ka haoen shian sattilabü.”
Mühghaüei Mosa Ngabü
2Mühghaüei Mosa to joyoko laukei, “Ngo Bunyubou ki! 3#Jn 8.58 Ngo, Abraham, Isak hoba Jakob jungto Thükenbou Mühghaü tegü longkei, lausikei haoen la ngei ngo Bunyubou nyeneije angetiko kikei. 4Hobaje Kanan kaodak laonei haoen yenla lean kikei, kho kaodak haoen la kula ngei haoen yoa ngeibü thebülanbükei lea. 5Toukei Ijepbüei aaola phobü Israel shousi shuong wiyobü dida; hoba ngei ngeibü thesilan damena. 6Hibü Israel shousi shuong to lenashi, ‘Ngo Bunyubou kia, hoba ngei kan Ijep aaothu onat ka leiyenlabü, hoba haoeneibü aaola lebü thu ka kan püetlabü, hoba ngeibü phak shingan haoen thükto matjem kayang sungbalabü, hoba ngei kan anglabü. 7Hobaje ngei kan kü mütshuong tegü sungletlabü, hoba ngo kaneibü Mühghaü yinglabü. Kheijinei Ijep aaothu onat ka leiyenbou Bunyubou, kaneibü Mühghaü ngo kia dogo kanei ngelabü. 8Hobaje Abraham, Isak, hoba Jakob la kula laobou kaonyek shanga ngei ngeibü ik tuokko thekeilankei kho kaonyek to ngei kan leian loulabü; hoba ngei kho kanla phetphan shanga kulabü. Ngo Bunyubou ki!’ ” 9Kho tegü Mosaei Israel shousi shuong to joyokei; lausikei maangnoubü ka hoba yongko asanouko aaola lebü ka hao to aditku.
10Kheijinei Bunyubouei Mosa to laukei, 11“Hauan Ijep choba Farao to Israel shousi shuong haoeibü kaodak ka sattiashi dogo lenshi.”
12Lausikei Mosaei Bunyubou to jongaikei, “Chühashi, Israel shousi shuongei kü ngüha ale; khei yingalonga ngo ngühang asasabü müt che to Faraoei ailai ditkula?”
13 Bunyubouei Mosa si Aron to joyoko laukei, “Israel shousi hoba Ijep choba Farao to ngei kasi la Ijep kaodak ka Israel shousi shuong leiyenla sakkubü kua dogo lenashi.”
Mosa si Aron Chemdang shangabü Le
14Habü ho bousi shuongeibü chemdang kongnyubou ki. Israeleibü shaang bukbü Reubeneibü shousi shuong Hanok, Pallu, Hezron, hoba Karmi; ho Reuben chempen shuong. 15Hobaje Simeoneibü shousi: Jemuel, Jamin, Ohad, Jakin, Zohar hoba Kanan sao cheeibü shou Shaul: ho Simeon chempen shuong. 16Hobaje Levi shousi shuong nyen haoen müt thensilenei habü ho ki: Gershon, Kohat hoba Merari. Levi salang po 137 kikei. 17Gershon shousi shuong: Libni, hoba Shimei; kho haoeneibü thensilen yoa. 18Kohateibü shousi shuong: Amram, Izhar, Hebron, hoba Uzziel, hoba Kohat salang po 133 kikei. 19Hobaje Merari shousi shuong: Mahli hoba Mushi. Habü ho Levi chempen thensilen kikei.
20Amramei haoeibü yakla lela hao boueibü na Jokhebed lekei; hoba saoei hao la Aron si Mosa bukkukei. Amram salang po 137 kikei. 21Izhar shousi shuong: Kora, Nefeg, hoba Zikri. 22Uzziel shousi shuong: Mishael, Elzafam, hoba Sithri.
23Aronei Nashoneibü na Aminadab nouyangnyu Elisheba yakla ngakei, hoba saoei hao la Nadab, Abihu, Eliazar hoba Ithamar bukkukei. 24Kora shousi shuong: Asir, Elkana, hoba Abiasaf. Habü ho Kora chempen. 25Hobaje Aron shou Eliazarei Putieleibü nouyangshou yoa che yakla ngakei; hoba saoei hao la Fenihas bukkukei. (Habü ho Levi chempen pisibou chung thensilen ki).
26Aron si Mosa kho Bunyubouei “Israel shousi shuong Ijep kaodak ka tan sheienbüa leiyenashi,” dogo lenbü dan ki. 27Ijep choba Farao to Ijep ka Israel shousi shuong leian longla lenbü kho haosi ki.
Bunyubouei Mosa si Aron la Ngühkhüm Kubü.
28Ladang Ijep kaodaka Bunyubouei Mosa to joyokei, 29haoei laukei, “Ngo Bunyubou kho ki. Ngei ka to joyobü pendou nyi Ijep choba Farao to lenshi.”
30Lausikei Mosaei Bunyubou to jongaikei, “Chühashi, ngo ngühang asasa, hoba Faraoei kü to lai küman ditkula?”
Zur Zeit ausgewählt:
LEIYENBÜ 6: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
