LEIYENBÜ 5
5
Mosa si Aron Ijep choba Thedanga
1Kho phaia Mosa si Aron Ijep choba jungto hauan laukei, “Bunyubouei lauda: ‘Yama haoenei kü shangabü lem lilabü lele kü mütshuong hautiashi.’ ”
2Hobaje Faraoei laukei, “Israelbü hautila ngei hao ngüha lelabü lele Bunyubou kho ao? Ngei Bunyubou kho angekei, hoba toukei ngei Israelbü ohautilabü.”
3Kheijinei Mosa si Aronei jongaiko laukei, “Ibribü Mühghaü kün to haüyoa. Bunyubou küneibü Mühghaü to lemla shanga kün chalou sem lam koutikai dogo künei ka to sudajada; khei ayinglonga haoei mühsinou hoba inlouei kün shieikoelabü.”
4Lausikei Ijep chobaei haosi to laukei, “Mosa si Aron, kasiei aila mütshuong haoeneibü kümkaleika nangtida? Kan lulueibü kümtoleito hauashi!” 5Hobaje Faraoei laukei, “Chühashi, tou kaonyeka kan mütshuong mütshang juongbou hoba kanei haoen lulueibü kümsilei ka haksotida!”
6Khünyettham, Faraoei aaoleibü si ikjaibü shuong to laukei, 7“Shangied tegü kanei mütshuong la thamjuoklaang kümla youho teku, haoenei haoen lolo youho yoshaitiashi. 8Lausikei shaangla haoenei thamjuoklaang lajuche kümbei khüjoche kümshi dogo sakkujan; kanei kho to ashitijan. Haoen haulohaushed, khoei haoenei ngekko lauda, ‘Küneibü Mühghaü to lemla hautishi.’ 9Mütshuong la kümsilei sekbou kushi; haoen khünei kümtishi, hoba haoen amlangbü ngüha maang teku.”
10Kheijinei aaoleibü shuong si ikjaibü shuong hauan mütshuong to laukei, “Farao Chobaei ho tegü lauda: Ngei kan la youho akulabü. 11Kan lolo hauan, kanei laka haplaje yoshaishi, lausikei kaneibü kümsilei aikei ashitilabü.” 12Hibü mütshuong Ijep kaodak pendou ae youho shanga youkung lamla aakei. 13Hobaje aaoleibü shuongei laukei, “Youho kijinei kümbü tegü kanei chalou angbou takletbü kümsilei khümtiashi.” 14Faraoeibü aaoleibü shuongei haoen phanga phobü Israelbü ikjaibü shuong to ngümbo phekei, “Shangied thamjuoklaang kümbü tegü kanei aila mietkei tatkei kümsilei ayeiti?”
15Kheijinei Israelbü ikjaibü shuong Farao jungto sühko louan laukei, “Kaibü sambü shuong to nyi aila hainyu jungeida? 16Kaibü sambü shuong la youho akunyu haoenei kün to thamjuoklaang kümashi dogo lauda! Chühashi, kaibü sambü shuong to ngümda, lausikei kaibü eikshuong shedbü yingkei.”
17Lausikei Faraoei laukei, “Kan haulo haushed, kan haulo haushed, khoei ong kanei, ‘Kün Bunyubou to lemla hautikai,’ dogo kanei lauda. 18Hibü tou kümsilei to ngaiashi. Kan la ai youho akulabü, lankei kanei thamjuoklaang takletbü longtijan.” 19Kanei kaneibü chalou angbou thamjuoklaang takletbü ontijan dogo laujinei Israelbü ikjaibü shuongei haoeneibü thu amaiboua kiteikei dogo damenkei.
20Hobaje haoen Farao jungka longjinei haoenei Mosa si Aron lama haoen haiteiko loan haüyokei. 21Haoenei haosi to laukei, “Bunyubouei kasi to nachüh hoba mat najema! Farao si haoeibü yaangenbü shuong thedanga kün kasiei mangsentia hoba haoen ikto kün haitila inlou yembua.”
Mosaei Bunyubou to Aolinbü
22Kheijinei Mosa Bunyubou jungto sepeijung ngaian laukei, “Aila habü mütshuong to amaiko jungeikei? Aila nyi ngo hautikei? 23Aishanga ngo Farao jungto ka nyena joyola haubü ka jaüan haoei habü mütshuong to amaiko jungeikei; hoba nyi ka mütshuong khümenla aikei aküm.”
Zur Zeit ausgewählt:
LEIYENBÜ 5: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
