Galesia 2
2
Amam aposel opalef etifim maloma Pol
1Afagof hiami 14-peleim mafe'ma ea', ae' afe' Jerusalem wapoti'. Aloma Barnabas wafe' etin. Ae' ao'wa Taitus wapoti' nafe' nalomafa. 2God nihi'ambe na'ama ea' afe'. Basef amama bu'wami awalapam esis anona wambota owa' Judaisi ihi'ambama esis Kristen sape Jerusalemi wapoti'. Ea' aloma amam agufumi atom mape, ihi'ambamam. Ae' andaiwa'ma maol fowa' anda'anai naloma dei' anda'anai notaga falafunai atona, owa'. 3Taitus anan alupunai ae'anai, amam mogawa anan aman Grikinai. Ea' amam ina matopa'mana alop si'i amam Juda manda'am, owa'. Ma'i aho'ma anan. 4Basef amama Taitus natopa' alop o ina natopa' alop mataga na'ama. Fowa' amam mambaso'ami ma'i amam Kristen sahin owan endilisimi motopa' alop amamunai. Ea' mandambaho' mawisi nomona ape' Kristen ma'i miti waf bu'unai Jisas Krais nase'apana ape' mape la'ifipama Anan. Ea' dei' natagahepa ma waf aonai mape wafifipa. Amam ma'i mogawa waf anama mape wafifipa ea' ma'i muli'akwapa mope owina basef amamumi fowa'imi. 5Ape' ina ma'i aho'ma mila basef amamumi, owa'. Dei' main, ape' ma'i mumafi basef bu'wami endilisimi mope andeande'ma ipe' pembale'efam.
6Amam agufumi esis Kristen sa'i agufumi asasimi, ae' andaiwa'ma efela agof enis epesi, owa'. A'i agof hiami falafumi atom. God ina nati alop ande' nowalogas, owa'. Anan nati ukup epesi nomon nawalogas. Amam ina ma'ipi anom basef wapoti' ma iwalipasam, owa'. 7Ea' amam mogawa God nase'e maol anama ma awalipasa basef bu'wami esis owa' Judaisi, si'i nase'anana Pita nawalipa esis Juda. 8God nandandepa Pita nanda'ana nataga la'ifina ma nanda' maol aposel nawalapa basef Godi ma esis Juda. Ea' na'ama etina God nandandepe nanda'e la'ifiwi ma enda' maol aposel awalipasa basef ananimi isima owa' Judaisi. 9Esis Kristen sa'i agufumi asasimi Jems naloma Jon naloma Pita. Amam mogawa God nagiambame na'a nase'e maol anama. Ea' manda'afa alupufai onda' maol atotona Godi. Ea' amam wanom ma'i aho' maso'afa lagof aloma Barnabas mihi'amba esis afa' waloma amam wape opalef etifim wanda' maol Godi atona. Ea' amam wanom ma'i aho'ma ondawalagatanima ma afa' biafa ofe' ma esis owa' Judaisi, ea' amam mafe'ma esis Juda. 10Amam ma'ipafa basef amama atom ma'i afa' biafa ope wigiambama esis Kristen sape Jerusalemi kwahusi, otamba maim a'asi. Maol anama ae' okom na'iana endilisi.
Pol na'ipa Pita ma waf aonai ma naep epes hiesi
11Nemaf anama Pita nafi'i wambel Antiok, ae' esambala basef ananimi ma naep esis Kristen hiesi. Dei' main, anan nanda' waf aonai. 12Nali' nafi'i nape naloma esis Kristen owa' Judaisi na' gwa'aimi nalomas. Anom nimeguf mafe'ma ea', nati amam amama Juda Jems nasapa'am mafi'i, Pita umbamahana ma amam Juda la'ifima maila waf anama matopa' alopanai. Ea' nandamboma natanima nakwaha esis Kristen owa' Judaisi, ina ata' na' gwa'aimi nalomas wapoti', owa'. 13Enis Kristen Juda wapoti' umbamahas sakwaha esis owa' Judaisi saila Pita. Barnabas wapoti' umbamahana nanda'am na'ama etin si'i esis.
14Nogota anama ae' ati waf anama amam manda'anai, ina maila waf bu'unai dende'ma basef bu'wami Godi endilisimi, owa'. Ea' a'ipana naep epes hiesi a'i, “Ine' Judainai. Ea' dei' ine' naila waf anona wambota epes sololama Godi. Waf ape' Judai, ine' nakwahona ea'. Dei' maina ine' la'ifina endilisi ma nanda' epes hiesi saila waf ape' Judai? Na'ama ina andeande', owa'.
Emi egafis sembale'efa Jisas sataga bo'wes andeande' ma naep Godi
15Ape' mataga wambota Judai, ape' ina mataga epes isima owa' Judaisi sanda' waf aonai, owa'. 16Ape' mogawa God ina okom napoma epen inima nembale'efa mi'uli ananinai ea' nanda' epen inima bo'wen andeande', owa'. Epen nembale'efa Jisas Kraisi atona, God nofalan na'i bo'wen andeande'. Ape' wapoti' mombale'efa Jisas Krais ea' God na'i ape' epes bu'upai Ananipai ma mombale'efa Krais. Ea' mi'uli owa'. Dei' main, ina enin epen naila mi'uli anama God naso' Mosesanai, dei' God nofalan na'i enin bo'wen andeande', owa'. 17Ape' mape la'ifipa maloma Jisas Krais dei' God nofalapa epes bu'unai Ananipai. I'i basef amama endilisimi, dei' mape ma'imama? Epes siti ape' owa' mila mi'uli anama fowa' God naso' Mosesanai, atuwasi sofalapa si'i ape' epes aopai si'i isima owa' Judaisi. I'i esis si'ipapa na'ama, ape' ina mi'i Krais nafela ape' manda' waf anama aonai, owa'. 18I'i ae' ali' akwaha waf ape owina mi'uli Godi ea' itanimai ila mi'uli anama wapoti', amama mawalapa ae' aman atopa' mi'uli anama.
19Dei' main, mi'uli anama nahe si'i aga'. Ina la'ifina nefela ae' wapoti', owa'. Dei' nahe aga' ma etaga epe namowe efa' ambal namunai ila okom Godi. Ea' ae' ape la'ifiwi ma Krais aga' ail alomana lawag usi'inai tu'wanainai. 20Ae' ina ape namowe ma ambal ae'anai atona, owa'. Krais atona nape namunai opaf ae'anai. Dei' ape etap anae', ape aila pepel Nogalomana Godi embale'fa Anan atona. Anan okom nainaili endilisi, naso' ambal Ananinai God ma nagiambame. 21Ae' ina ewa' alafugama waf God nagiambamapa na'a, owa'. I'i mi'uli fowa' God naso' Mosesanai nonda' epes sotaga bo'wes andeande' ma naep Godi, dei' waf Krais naga'manai falafifunai atona ofagena owa'.”
Zur Zeit ausgewählt:
Galesia 2: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.
