Galesia 1
1
1Ae' Pol aposel Jisas Kraisi anda' basef amama. Ina anona aman nandandepe ma enda' maol aposel, owa'. Ahalomapa God nafela Jisas Krais nohafel hi'agif amam atom mosahe'e ma ape aposel awalipasa basef Godi. 2Esis Kristen sahin owan hiesi sape na'ae salome, wanda'mepago danifela ipe' Kristen hipei pape wambel hianai etap hiagoma Galesia.
3Ae' a'i Ahalomapa God noloma Jisas Krais Dembinai ape'inai monda'epa petaga la'ifipa migiabamepa na'a ma opalef ipe'imi mope awanem. 4Jisas Krais naila okom Ahalomapa Godi naga' ma naso' ambal ananinai nafe' ma God nakwaha waf aonai ape' manda'anai. Anan nanda'am na'ama natagahepa ma waf aonai hianai dei' nape etap anae'.
5Ae' a'i amam nematawa hiesi sefela agel Godi lu'una ma nafifili ananinai atona la'ela'ef. Endilisi.
Basef bu'wami Godi atom mape, anom basef owa'
6Ae' gegelalasowe ma ipe' pakwaha waf bu'unai God nofalepa, naloma Jisas Krais nagiambamepa na'a. Dei' ipe' pakwaham mehip paila anom basef dambaimi. 7Basef bu'wami Godi amama atom. Ina anom basef wapoti', owa'. Dei' maina a'ipipa basef amama? Ae' egawa enis epes samboma basef bu'wami Kraisi ma ukup ipe'imi dei' sanda' ipe' ukup mololaepa. 8Ea' i'i ae' o enin epen o anona ensel nifi'i ilif heveni ni'ipipa anom basef owa' dende' ma basef amama afa' wa'ipipami, epen inima peme'an owa', hapaini. Ae' a'i anona nemaf God nokwahin newala wambel aonai hel. 9Basef amama wali' wa'ipipam ea', dei' a'ipipam wapoti'. I'i emi egafis si'ipipa anom basef owa' mefe' dende' si'i basef amama bu'wami Godi pagi'mami, ae' a'i epes isima God nokwahis sowala wambel aonai hel.
10Ipe' ukup mape ma'imama ma basef amama? Pa'i ae' a'iama enis epes sinifelowe sefela agel ae'anai? Owa'. Ae' a'i God atotona opaf bo'onama ae'. Ipe' pa'iam pa'i a'iama enis epes sinifelowe? Owa'. I'i enda' maola ai'ipa enis epesa opalef bo'oma ae', ae' ina aman anda' maola Kraisi, owa'. Ae' ambaso'ami. Owa'. Ae' anda' maola Krais atona.
Fowa' God nofala Pola nanda' maol aposel nawalapa basef Godi
11Sahin owan alupipei ae'ipei, ae' a'i ipe' pegawa basef ae'ami. Basef bu'wami Godi awalipipami, amama ina mataga okom enin epeni, owa'. 12Ae' ina efa'ama enin epen, owa'. Ina enin epen nawalipi basef amama ofagema, owa'. Jisas Krais atona nawalipi basef amama bu'wami.
13Waf fowa' anda'anai, esis sa'ipipana pegawana ea'. Fowa' anda' lotu ma God aila waf esis Juda sanda'anai. Ae' la'ifiwi ahambombaga esis Kristen epes Godi la'ifiwi. Ae' ina atilis uwahipis, owa'. Anda' maol la'ifiwi ma ahas hi'ilas.
14Ae' ikila' epes hiesi Juda alomas aol atona, ikila'asa aila waf esis Juda sanda' lotuma Godi. Enis ina sailana la'ifis ea' ae' ailana la'ifiwi hi'alana. Ea' la'ifiwi endilisi ma aila waf fowa'inai amam akupapa manda'anai. Ae' ailana andeande' endilisi ikila'as.
15-16Ea' fowa' gani mama'we ata' owa' kolae, God nagiambame na'a nosahe'e nofale ma enda'mana maol. Anom nimeguf mafe'ma ea' nemaf anama anan na'i nihi'ambe Nogalomana Ananinai ma iwalipasa basef bu'wami ananimi isima sololama Godi, nemaf anama ae' ina afe' ahali' enin epena maol anama, owa'. 17Ae' ina afe' wambel Jerusalem ati amam God nali' nandandepama manda' maol aposeli, owa'. Nemaf anama atona afe' etap hiagoma Arebia. Anom nimeguf mafe'ma ea' etanima afe' Damaskus.
18Afagof wanom mafe'ma ea', afe' Jerusalem ati Pita ape alomana wikifah biam. 19Ea' ae' ina ati anom aposel, owa'. Ati Jems atona, Dembinai Jisas owalomana.
20Ae' a'ipipa endilisi ma naep Godi nogawa basef amama anda'ami, amama endilisimi atom. Ae' ina ambaso'mepa, owa'. 21Anom nimeguf mafe'ma ea' afe' anona wambel nape etap biefina hiagoma Siria naloma Sialisia. 22Nemaf anama esis Kristen sape etap hiagoma Judia ina sogawa ae' andeande', ata' owa'. 23Esis same' basef atoma enis epes sa'i, “Aman anama fowa' nahambombagapa maloma basef Kraisi, nandaiwa'ma bale'ef ape'inai ea' dei' owa'etin. Anama nawalapa basef amama atom fowa' nahambombagami.”
24Ea' God nagiambame embale'efana. Amama atom dei' safela agel Godi lu'una.
Zur Zeit ausgewählt:
Galesia 1: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.
