KALATE METATAʼA 1

Ntéane biôm

(Né 9:6; Sam 124:8; Yer 32:17; 10:12; Rm 1:20; Nli 4:11; Yo 1:1-3)

1Atataʼa, Zambe a nga té yôp a si.

2Si é nji bi ngum éyekaʼa nalé fe teke jôm été; dibi é mbe atane beta yee; ve Nsisime Zambe ô mbe ô tyiñelaʼan e mendime yôp.

3Zambe nye na: Efufup é boʼok! A éfufup é nga bo. 4Zambe a nga yene na éfufup é ne mvaé, a Zambe a nga kandé éfufup baa dibi. 5Zambe a nga loon éfufube na môs a dibi ke na alu. Ngôʼé jia a tyé jia: môs ôsu ñwô le.

6Zambe nye na: E ñyem ô boʼok e zañe mendim asu ya kandé mendim a mendim. 7Ane ñhe Zambe a nga bo e ñyeme te, a kandé mendim me ne e ñyeme si a ma me ne e ñyeme yôp. Nalé a nga boban. 8Zambe a nga loone ñyeme na yôp. Ngôʼé jia a tyé jia: môse baa ñwô le.

9Zambe nye na: Mendim me ne yôbe si me kôʼane vôme wua a na éfas é ne nkôt é yenéʼé. Nalé a nga boban. 10Zambe a nga loon éfas é ne nkôte na si, a éndendame mendime na mañ. Zambe a nga yene na nalé a mbe mvaé. 11Wôna Zambe a nga jô na: Si é kuik bilok bi beʼe memvoñ avale dap, nalé fe bilé bia wume bibuma bi beʼe memvoñ avale dap. Ane nalé a nga boban. 12Si é nga kui bilok: élok ése mvoñ avale dé, a bilé bia wume bibuma, bi bili mvoñ avale dap: Zambe a nga yene na nalé a mbe mvaé. 13Ngôʼé jia, tyé jia: môse lale ñwô le.

14Zambe nye na: Ateté e boʼok e ñyeme yôp, asu ya kandé môse baa alu; ateté te e too mendem ma liti biyoñ, mimôs a mimbu; 15nge di e ne e ñyeme yôp, asu ya faé si éfufup. E nga bobane nalé. 16Zambe a nga kôm ateté abaé e ne menen, wu ô ne anen asu ya jôô a amôs, wu ô ne tyôtyoé asu ya jôô a alu; a nga kôme fe ateté avok. 17Zambe a nga telé de ébaé yôp asu ya faé si éfufup, 18asu ya jôô a amôs, a asu ya kandé éfufup baa dibi. Zambe a nga yene nalé mvaé. 19Ngôʼé jia a tyé jia: môse nyini le.

20Zambe nye na: Mendim me tame jaé ne lut a bitétéa bi vee, a na e si nyô anon é yeleʼe e ñyeme yôp. 21Zambe a nga té betite be mañ be ne menen mevale map, nalé fe bitétéa bi vee bi joʼok, bi boʼo mendime na me fôʼôsan abui; a nga té fe ônon ôse ô beʼe mefap avale dé. Zambe a nga yen na nalé a mbe mvaé. 22Zambe a nga botane bie a jô na: Bian a fôé a jalé mendim me mañ; a na anon é fôék e si nyô. 23Ngôʼé jia, tyé jia: môse tane ñwô le.

24Zambe nye na: Si é tame biaé bitétéa bi vee mevale map, betit, bitétéa bia woñ, betite ya si, jia ése yʼété avale dé. Nalé a nga boban. 25Zambe a nga bo betite ya si avale dap, bone biyem avale dap, betite bese ba woñe si avale dap. Zambe a nga yene na nalé a mbe mvaé.

26Zambe nye na: E mboʼone môt a éveʼela jangan a funaʼane bia, asu ya na a jôô kose mañ, anone ya yôp, bone biyem, si ése a betite bese ba woñ.

27Zambe a nga té môt a éveʼela jé;

a nga té nye a éveʼela Zambe

fam a minga a nga té be.

28Zambe a nga botane be a Zambe a nga jô be na: Bian a fôéan, jalaʼane si a jôô je. Jôʼane kose mañ, anone ya yôp a tit ése ja woñe si nyô. 29Zambe nye na: Mi lôô ma ve mia éloʼo ése é beʼe mvoñ a e nje é ne si nyô ése, nalé fe élé ése ja wume bibuma é beʼe mvoñ: bidi bienan e mbie le. 30E mfaʼa tit ése ya si, ônon ôse ya yôp, jôm ése ja woñe si é bili mvebe ényiñ, ma ve be éloʼo ése é bili nyôle kaé élok ane bidi. Nalé a nga boban.

31Zambe a nga yene na jôm ése a nga bo é mbe mvaé. Ngôʼé jia, tyé jia: môse samane le.

Zur Zeit ausgewählt:

KALATE METATAʼA 1: BULU09

Markierung

Kopieren