Sawal la giled’a 89
89
Vun ma djin ma Alona mi djinim ki David-na mi nga ni lara ge?
1Ni sawal la gile d’a Etan ma Esara-na mi hlata.
2Ma didina, an mba ni hle sawala
yam o mang nga didinda burâ ki burâ,
an mba ni de woi ki vunan
yam d’engzeng manga kur atchogoi d’a lara ge pet mi.
3Gagazi, an nga ni dala:
O mang nga ang tinita ni d’a gak didinda,
d’engzeng manga ang sirat akulo mi.
4Ang dala:
An djin vunan ki ma an manama,
an gun tan mazong mana David ala:
5An mba ni sira andjavang ad’enga burâ ki burâ,
an mba ni tin zlam mang nga amula
kur atchogoi d’a lara ge pet mi.
Tchol ndjö
6Ma didina, ar ahle suma ang lazi sä kur akulod’ina
a gileng yam sun nda atchap pa ang lata,
ar mang suma akulona
a gileng d’engzeng manga kur tok mazid’a mi.
7Ma didina, ma kur akulod’a ma mi nga tam ki sed’engâ nga d’i,
alo ma hle tam d’igi ang na na nga d’uo mi.
8Angî ma ngol ma kal tegles
ma de d’alâ aduk toka hi malaikanid’a,
angî ma kal papana aduk suma akulo suma a nguyungâ.
9Ma didina, Alo ma ad’engêng kal petna,
ma ad’eng ma d’igi ang na na ni nge ge?
Ma didina, d’engzeng manga ti nguyungû.
10Angî ma te yam subur tad’a halum ma ngolîd’a,
ata yima abilâ tchol led’ina, ang nga vum vunam kä.
11Angî ma tileî suma Ezipte-na kä
d’igi sana mi tileî harâ kä na na,
ang ndjoî mang suma djangûna woi kad’eng manga.
12Akulod’a ni manga, andagad’a ni manga mi,
duniyad’a ki zlat pet kahle suma kurutna pet,
ni ang ba, tinit ad’ud’u.
13Abo ma norâ kabo ma sutna, ni ang ba, laziya.
Ahina d’a Tabor-ra ki d’a Hermon-nda
a nga gileng simiyêngû.
14Ni bigang ang ba, tad’enga kal pet,
nabong ang ba, mi sib’ika kal pet,
abong ma ndjufâ, mi nga zid’a akulo mi.
15D’ingêra ki sariya d’a ka d’a irata
nad’u ged’a hi leu mang nga ted’id’a,
o mang nga didinda ki gagazid’a a nga tit avorongû.
16Ma didina, suma a nga le furîd’ina
ni suma a nga gilengâ,
a nga tit kur b’od’a avorongû.
17Kayam simiyêngû, a nga le furîd’a burâ ki burâ,
kayam d’ingêr manga a nga subur taziya.
18Kayam angî ad’eng mazi d’a kal papad’a.
Ni yam suma manga ba, ami nga suburumi tamiya.
19Ma didina, angî mbarei mamid’a,
angî ma tin tang irat vat yam suma Israel-lîna,
angî amul mamina mi.
20Kur bur tu ang nde tang ngeyo,
ang de mi mang suma d’engzengâ ala:
An had’enga mi man ma gangrang ma dur ayîna,
an subur gor azongâ aduk suma.
21An fazong mana David,
an vom mbul man ma an tinim iram vama kamu.
22An mba ni hum ad’enga,
an mba ni siram ngingring mi.
23Ma djangûna mba mi nde kam dumuzi d’i,
sama bei hum vuna ba na mba mi hulongôm yam kä d’uo mi.
24An mba ni kizak mam suma djangûna kä iramu,
an mba ni to suma a noyôma mi.
25D’engzeng manda ki o man nda didinda a mba hum ad’enga,
mba mi fad’enga ni yam simiyên mi.
26An mba ni hum ad’enga á te yam alum ma ngolâ,
yam alum ma gureina mi.
27Mam mba mi yan ala: Angî abunu!
Alo mana, angî ahina d’a sud’unda!
28Anu, an mba ni mbud’um goron ma avo’â,
an mba ni tinim amul ma ngol
ma kal amulei suma yam andagad’ina.
29An mba ni tagam o manda burâ ki burâ;
vun ma djin ma an djinim ki sed’ema
mba mi ka’î hina ngingring.
30An mba ni ngomom andjavam gak didin,
leu mam mba ted’a mba d’i kak didin mi.
31Le andjavam a ar gat manda woyo,
le a tit nga yam nga hur mana d’uo,
32le a tchila yam gat manda,
le a ngom nga vun man ma hed’a d’uo mi ni,
33an mba ni mba á ngobozi ki totogod’a
yam bei hum vun mazina,
an mba ni tozi á gad’azi yam tchila mazid’a mi.
34Wani an mba ni ar o man nda didin nda kamba woi d’i,
yam d’engzeng manda, an mba ni mbud’um iram mbi.
35An mba ni b’lak vun ma djin ma an djinim ki sed’ema woi d’i,
an mba ni djok vunan yam zla d’a ndavunanda d’uo mi.
36Yam bei tcho manda an ni gun tan ni ki iran fafat,
na ni an ndak á ka zlad’a mi David tchu?
37Andjavam mba mi ka’î hina gak didin,
leu mam mba ted’a mba d’i kak avoron gak didin
d’igi afata na.
38Mba d’i ka’î d’igi til ma nga mi le glangâs ma iratna
sä kur akulod’ina na.
Tchol ndjö
39Wani ang gum mbeyo, ang aram mbeyo,
ang hurung zal ata ma ang manama.
40Ang b’lak vun ma djin ma ang djinim kazong mangîna woyo,
ang gum avaval mamba kä woi andaga.
41Ang tcho ir kangâ mama teteng,
ang b’lak gulumun mam ma ad’eng ma ngunguna woyo.
42Suma a nga kalâ pet a hurumumu;
mi mbut ni vama ngula hi ndromina.
43Ang he mam suma djangûna ad’enga,
ang ar mam suma djangûna pet a le furîd’a mi.
44Ang guluyôm sï mbigeu mamba,
ang ndjunum nga ata yima dur ayîna d’i.
45Ang pad’am subur mamba woyo,
ang zud’um zlam mam mba amula kä.
46Ang mbud’um mamara atogo,
ang mbud’um zulona mi.
Tchol ndjö
47Ma didina, ang mba ngei tang hina gak mindja ge?
Ayî mangâ mba mi fo ni d’igi akud’a na gak su?
48Ang djib’er yam burunu, mi ni gid’enga,
sana mi we d’uo ni d’igi ang le suma ná bad’a woi hawa na.
49Sama mi ndak á kak karid’a bei matnina nga zu?
D’oze sama mi ndak á prut tam mbei
ata yima azuleinina nga zu?
Tchol ndjö
50Salad’a, sun mang nga o d’a ang lat adjeu
d’a ang gun tang kat mi David yam d’engzeng mangid’a,
ti nga ni lara ge?
51Salad’a, ang djib’er yam ngula hazungeî mangîd’a,
ang djib’er yam suma ablau
suma an nga ni zizi didigan pet wana.
52Ma didina, ang djib’er
yam ngul la mang suma djangûna a nga ngulumba,
a nga ngul ma ang manama.
53Ar ei suburi Ma didina bei ara ba!
Amin! Amin!
Zur Zeit ausgewählt:
Sawal la giled’a 89: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.
