Sawal la giled’a 81
81
Furî d’a yam gonga hAlonid’a
1Ni sawal la gile d’a Asaf mi hlat kadingâ mi hat mi ma ngolâ hi suma hle sawalina.
2Agi hlagi sawala ki furîd’a mAlo mala nad’eng meid’a na,
agi hlagi sawala ki furîd’a mAlona hi Jakob-ma.
3Agi hlagi sawala, agi bugi tchigiyeud’a,
agi bugi ading ma nglona
kading ma gurei ma delem tchi djivid’ina.
4Agi bugi adifa kur bur ma tilâ deîna,
kur b’o mam mba ndindinga kur bur mei ma vun tilâ mi.
5Kayam ni gat ta yam Israel-lîd’a,
ni vun ma hed’a hAlona hi Jakob-mina.
6Wana ni vun ma he ma mi hum mi Josef simiyêma
ata yima mi nde woi á dur ambas sa Ezipte-d’ina.
An hum del la an humut nga yan tu d’uo d’a ala:
7An hlaneka woi kangû,
ang tchuk abong ngei ata gagalagad’a mi.
8Kid’a ang kur ndakid’a, ang yanu,
an prud’ung ngeyo,
an hulongông humba
ata yima ngeid’a kur breîd’a halonid’a,
an kugung avun mbiyo ma Meriba-na.
Tchol ndjö
9Sum mana, agi humugiya, an nga ni gagi humagiya!
Israel-lâ, ladjï agi tinigi humagi á humunu ni!
10Ar a fe alo ma ka zlad’a avo hatagi d’i!
Ar agi grivigi kä avok alo ma ding nguo mi.
11An ni Ma didina Alo magina!
Ni an ba ni pad’agï woi avo Ezipte.
Agi ngogi vunagi woyo,
an mba ni oyôgiziya.
12Wani sum mana a humun nga vunan ndi;
Israel-lâ a minin nga d’uo mi.
13Kayam ndata, an arazi kur hur mazi ma b’al ma kiki na;
a tit bugol nga hur mazina mi.
14Ladjï sum mana a humunu,
ladjï Israel-lâ a tit ni kur lovot manda ni,
15an hulongôzi wa mazi suma djangûna
yazi kä ad’uzi atogo zak,
an mbut wa iran á dur ki suma a nga lazi ndakina.
16Suma a noî Ma didinina
a hulong wa yazi kä avoromu,
wani a kak wa ki djivid’a burâ ki burâ.
17Alona mi haziya wa awu ma djivi ma kal teglesâ,
mi hoboziya wa kayum ma abageina mi.
Zur Zeit ausgewählt:
Sawal la giled’a 81: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.