Ad’u Tinda 7
7
Noe mi kal kur batod’a
1Ma didina mi de mi Noe ala: Ang kal kur batod’a ki sum mangâ pet, kayam an wang angî sama d’ingêrâ avoron kur atchogoi d’a wanda. 2Ang yo ahle suma ari suma djivina#7.2 ahle suma ari suma djivina: Nala, Ahle suma ari suma ndak á ngad’azi buzuna mAlonina, mina ni Israel-lâ a ndak á tazina mi. kakap andjofâ kid’iziya, aropma kid’iziya, ang yo suma tchona mbàmbà mandjufâ katchad’a, 3ang yo aluweina kakapa kid’iziya, mandjufâ katchad’a, kayam azi pet a zul andjavazi avogovok yam andagad’a pet. 4Kayam ar burâ kid’iziya, an mba ni salona yam andagad’a burâ dok fid’i falei kandjege. An mba ni dap ahle suma ari suma an lazina woi pet yam andagad’a. 5Noe mi lahlena pet d’igi Ma didina mi hum vuna na.
Alona mi b’lak andagad’a ki mbina
6Ata yima mbina kus yam andagad’ina, Noe bizamî kikis karagaya. 7Noe mi kal kur batod’a kamamba ki groma kamiyôzina á sut tazi abo mbiyo ma nga mi kusâ. 8Ahle suma ari suma djivina ki suma tchona kaluweina kahlena pet suma dram kä na 9kakap mandjufâ katchad’a, a mba gen Noe kur batod’a d’igi Alona mi hum vuna na. 10Kid’a bur ma kid’iziyana ndaka, mbina kus yam andagad’a.
11Kur biza d’a kikis karagayad’a hi Noe-d’a, kur bur ma dogo yam kid’iziyana hi til ma mbànina, ir mbiyo ma lau ma yiyi’â mal lei pet, mbiyo ma akulona iram mal lei mi. 12Alona mi se mbina yam andagad’a burâ dok fid’i falei kandjege. 13Kur bur máma Noe mi kal kur batod’a kamamba ki groma, nala, Sem, Ham ki Jafet kamiyôzina mi. 14Azureina, ambureina, d’uwarâ, ahle suma a dram kä na kaluweina ad’u andjavazi pet, a tchuk kur batod’a ki sed’em mi. 15Ahle suma ari suma yam andagad’ina kakap a tchuk gen Noe kur batod’a 16d’igi Alona mi hum vuna na. Bugola, Ma didina mi dugum vuna kamu.
17Mbina mi kus yam andagad’a, mi le burâ dok fid’i, mi hop akulo, mi hle batod’a akulo woi yam andagad’a. 18Mbina mi hop akulo akulo, batod’a ti hlakulo yam mbina. 19Mbina mi hop akulo akulo gak mi hlup ahuniyô suma fuyogeina kä pepet. 20Mbina mi hop akulo gak kal akulo yam ahuniyôna kal metred’a kid’iziya.
21Ahle suma ari suma yam andagad’ina pet, nala, aluweina, d’uwarâ, azureina, ambureina, ahle suma a dram kä na pet ki suma pet, a bo woyo. 22Ahlena pet suma a nga muzuk katchinazi suma a nga yam andagad’ina pet, a bo woyo. 23Alona mi dap ahle suma ari suma yam andagad’ina woi pet, nala, suma, azureina, ambureina, ahle suma a dram kä na kaluweina. Arî Noe ki suma a nga ki sed’em kur batod’ina hol. 24Mbina mi ar tchola yam andagad’a gak burâ kis yam dok vahl, mi nde ngara kä.
Zur Zeit ausgewählt:
Ad’u Tinda 7: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.
