Ad’u Tinda 15
15
Alona hle vunam mi Abram
1Bugol ahle suma lena, Ma didina mi nde tam mbei ir Abram, mi dum ala: Abram, ang le mandar ri; an ni mbarei manga, wurak manga mba d’i zul avok ngola.
2Abram mi hulong dum ala: Salad’a Ma didina, djivid’a an mba ni fat kur ahle suma ang mba handjina ni me ge? Goron nga d’i; sama mba mi tan djona nazong mana Eliyezer ma Damas-sâ. 3Gola! Ang han nga gor ri, ni ma vut avo hatana ba, mba mi tan djonu.
4Ata yi máma Ma didina mi dum ala: Hawa! Nga ni Eliyezer ba, mba mi tang djong ngi. Wani ni gorong ma kurungâ ba, mba mi tang djongû.
5Mi nde ki sed’em abua, mi dum ala: Ang gol irang akulo; ang le ndak á ndum tchitchiud’a ni, ang ndumud’u. Andjavang mba mi zulî hina dedege mi. 6Abram mi he gagazid’a yam Ma didina; ni kayam ndata ba, Alona mi ndumum ala ni sama d’ingêrâ.
7Ma didina mi dum kua ala: An ni Ma didin ma pad’angî woi kur andaga d’a Ur ra Kalde-d’a á hang ambas sa wandina.
8Abram mi hulong dum ala: Salad’a Ma didina, ni nana ba, an mba ni wala ti mba d’i mbut andaga manda ge?
9Ma didina mi hulong dum ala: Ang halan amuhl hla wei d’a bizat hindid’a, ahu b’ë d’a bizat hindid’a, gamlâ ma bizam hindina, gugud’a tu ki gugu bed’egera tu mi. 10Abram mi hal ahle ndazina pet, mi wagazi aduk mbàmbà, mi ndjarazi avun tazi memet, wani mi wal nga aluweina aduk ki. 11Aluwei suma te hliuna a tchuk asezi kä yam har máma, wani Abram mi digizi woyo.
12Kid’a afata ar go á nikid’a, Abram sena mi lum ngola. Gola! Mandarâ nga mi lum ngola, yina mbut nduvunda kamu. 13Ma didina mi dum ala: Ang we woi tetet ala andjavang mba mi i mbeid’a yam andaga d’a nga ni mazid’a d’uo d’a; azi mba laziziya, a mba lazi magomba bizad’a kikis fid’i. 14An mba ni ka sariyad’a yam andjaf ma ding ma mba mi lazi magombina, wani sum mangâ a mba buzuk kei ki beged’a ngola. 15Wani ang mba mit ki halasa, ang mba le furîd’a ki mamarang gak a tozong kiya. 16Kur atchogoi d’a fid’id’a azi a mba hulongî ka hî, kayam tcho d’a suma Amor-râ a lata nga bei ndak tua tala an mba ni digizi woyo d’a.
17Kid’a afata nik dad’a, yina mbut nduvunda i’îlik. Gola! Ata yi máma andos nga mi buzugï aduk akud’a ki sin akud’a bibiliu a nga kal aduk hliu ma mi walam mbeina. 18Ni kur bur máma ba, Ma didina mi djin vunam ki Abram, mi dum ala: An hambas sa wanda ni mandjavangû; tinï ad’ud’a navun toliyon nda Ezipte-d’a dei gak mba avun alum ma Efrat-na, 19nala, ambasa hi suma Ken-na, hi suma Kenis-sâ, hi suma Katmon-na, 20hi suma Het-na, hi suma Peris-sâ, hi suma Refa-na, 21hi suma Amor-râ, hi suma Kanan-na, hi suma Girgas-sâ, hi suma Jebus-sâ mi.
Zur Zeit ausgewählt:
Ad’u Tinda 15: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.
