Ad’u Tinda 13
13
Abram azi ki Lot a wala
1Abram mi tcholï Ezipte, mi i iram abo ma Negef-fâ, mam kamamba kahle mama pet. Lot mi nga zlapa ki sed’emu. 2Abram ni sama bege d’a heîna; mi nga ki d’uwarâ, bege d’a hapa ki lora mi.
3Mi tcholï abo ma Negef-fâ, mi i nde nde gak mi mbaza Betel ata yima mi ve zlub’ud’a kua avo’â, aduk Betel ki Aï. 4Nata yi mam ma mam min yima ngal ahle suma ngat buzuna kua avo’â ba, mi tchen ki simiyê Ma didina kua.
5 Lot ma i ki Abram-ma, mi nga kaho’â, amuzleina ki zlub’ud’a mi. 6Andaga ndata ndak nga á kagazi d’i; kayam d’uwar mazina mablaud’a, azi ndak á kak ata yima tuna d’i. 7Yalâ tchol aduk suma pola hi Abram-ma ki suma pola hi Lot-na. Suma Kanan-na ki suma Peris-sâ a nga kaka yam andaga ndata tua.
8Kayam ndata, Abram mi de mi Lot ala: Ar yalâ mi tchol adigei d’i, d’oze aduk man suma pola ki mang suma pola d’uo mi, kayam ei ni b’oziyo teya. 9Andagad’a ba sä avorong wan pet tuo zu? Ang wal adigang ngei ki anu; ang le i ni irang abo ma gulana ni, an i iran abo ma ndjufâ; le ang i ni irang abo ma ndjufâ ni, an i iran abo ma gulana mi.
10 Lot mi hle iram akulo, mi gol yam andaga d’a Jurdê-d’a gak Sowar, mi wat mbina nga kua ngola. Ti ni d’igi asinena hi Ma didinina#13.10 asinena hi Ma didina: Nala, Asine ma Eden-na. na, ni d’igi andaga d’a Ezipte-d’a na, kayam Ma didina nga bei b’lak Sodom ki Gomor rei tua. 11Lot mi man andaga d’a Jurdê-d’a pet, mi mber mi i iram abo ma yorogona; ni hina ba, adigazi wala.
12Abram mi ar kaka yam andaga d’a Kanan-nda. Lot mi kak kur azì ma abagei hur fulina, mi ve zlub’u mamba abo ma Sodom-ma. 13Wani suma Sodom-ma ni suma murud’umba ngola heîna, ni suma le tchod’a avok Ma didina ngola heîna mi.
Abram mi mber iramu
14Kid’a Lot mi wal ki Abram wala, Ma didina mi de mi Abram ala: Ang hle irang akulo, ata yima ang nga kua wana, ang gol irang abo ma norâ, abo ma sutna, abo ma yorogona kabo ma fladegena#13.14 abo ma norâ, abo ma sutna, abo ma yorogona kabo ma fladegena: Nala, Ata yima pet. mi. 15Kayam andaga d’a ang wat pet wanda, an mba ni hangzi ni mi ang kandjavang gak didin. 16An mba ni zulung andjavang d’igi andaga d’a gugud’upa na; le sana mi ndak á ndum andaga d’a gugud’upa ni, mi mba mi ndumung andjavang mi. 17Ang tchol akulo, ang tit yam andagad’a, ang wat fiyagat ki bubuwad’u, kayam an mba ni hangziya.
18Ata yi máma Abram mi hô zlub’u mamba, mba mi kak ad’u agu ma nglona hi Mamre ma nga Hebron-na, mi min yima ngal ahle suma ngat buzuna mi Ma didina kua.
Zur Zeit ausgewählt:
Ad’u Tinda 13: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.
