Pe eya 16
16
Tolla ge Ismayel ne
1Saray ge Abram gwale be tol na vya to. Na sḛ da ne kale a̰me ɗu, ndu ge suwal Masar ne, na dḭl Agar. 2Saray jan Abram go: «Ndi ne se no, Bage ɗiŋnedin ba̰ mbi gisil. Mbo mbi kale ta, tamekyala mbi ba ɓol vya ne na ta.» Abram za̰ fare ge Saray ne. 3Saray ge Abram gwale wan na kale Agar ndu ge suwal Masar ne, hon na obe Abram na, ndwara go, na ka na gwale. Ho̰ na na swaga ge Abram ne ke del wol ge suwal Kanan go. 4Abram mbo Agar ta, na sḛ eme. Amma swaga ge Agar ne kwa tene go na da ne emel ɗe, gá ndil na ná ge yàl kaŋ senna. 5Saray jan Abram go: «Mo sḛ, hé tiiɗiya ge mbi ne ma mo pal. A mbi sḛ, ge mbi ne ho̰ mo mbi kale ne, ne swaga ge ne kwa go na da ne emel go day, ndil mbi kaŋ senna. Bage ɗiŋnedin na ka bage kun nee ne mo fare buwal ne!» 6Abram jan Saray go: «A mo kale ne, ke na kaŋ ge mo laar ne ɓyare.» Saray ɗage ke na yál gḛ ge be to, na sḛ syat na pe só uzi ya kaal ne na ta.
7Maleka ge Bage ɗiŋnedin ne ɓol na gwa ne mam ɓulla ge ne viya̰ ge mbo Chur go, ful pul zi. 8Jan na go: «Agar ge Saray kale, mo te ɗage da ne le da ya, mo mbo ndwara le da ɗaa?» Agar jan na go: «Mbi sya mbi ná ge yàl ndwara zḛ.» 9Maleka ge Bage ɗiŋnedin ne jan na go: «Gwa̰ mo ná ge yàl ta ya, mo gwan ne mo pala na pe se.» 10Maleka ge Bage ɗiŋnedin ne gwan jan na go: «Mbi mbo zuli mo pehir ma se lala̰y, ne ɓase gḛ ge nama ne pe, ndu ge mbyat isi nama mbo kat to bat.» 11Gwan jan na go:
«Ndi mo da ne emel,
Mo mbo tol vya son,
Mo mbo tol na dḭl Ismayel,
Ago, Bage ɗiŋnedin za̰ mo tiiɗiya ge mo ne zi.
12Na sḛ mbo kat dimma ne kwara ge ful zi ge go,
na sḛ mbo ke ho̰l ne naa pet,
naa pet a mbo ke ho̰l ne na me.
Mbo kat na yàl uzi ya hini cat ne na kaam ma.»
13Agar hon Bage ɗiŋnedin ge ne jya̰ fare ne na dḭl go: «El-Roy#16:13 El-Roy: Sḭ go, Dok ge ne kwa mbi., Dok ge ne ndil mbi.» Ago, ka janna go: «Go go no, mbi te be kwa na ge ne kwa mbi tyatyat to’a?» 14Da ne pe no, a tol tub ge ne Kades ma ne Bered buwal zi no go Lahay-Roy#16:14 Lahay-Roy: Sḭ go, Bage ne ndwara ge ne kwa mbi.. 15Agar tol vya son, Abram hon na vya ge Agar ne tó na dḭl Ismayel. 16Swaga ge Agar ne tó na vya go, Abram ka da ne del wara tiimal para myanaŋgal.
Zur Zeit ausgewählt:
Pe eya 16: FGN2013
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en langue Kim © Alliance Biblique du Tchad, 2013.
