SALMOS 7
7
1X̱ana' Dios, žx̱en ḻaža'a Le'.
Beslá neda' ḻo na'gak benne' ka' žsáka'gake' neda', na' gokḻen neda',
2nich bi séngake' neda' ka žon bež yix̱e',
na' bi wchéza'gake' neda' gan bi zoa no benne' gákḻene' neda'.
3X̱ana' Dios, cha' bena' neda' ki;
cha' zoa bi da' ẕinnj da' ben ni'a na'a;
4cha' zoa bi da' bi nak chawe' da' bena' che no benne',
bennen' ẕgá'nḻene' neda' chawe',
(san neda' gókḻena' bennen' bi ẕḻe'ele' neda' chawe' ḻa'kze bi be bena' chie')
5cha' ki bena', be' latje bennen' bi ẕḻe'ele' neda' chawe' kwia ḻaže'e neda', na' sene' neda'.
Be' latje bennen' wleje' neda' ḻo yo, na' wca'ne' ca'ze yeḻa' ẕen chia'.
6X̱ana' Dios, ḻo yeḻa' ẕža'a chio', wzó ža'.
Bdiḻ-ḻen benne' ka' žsáka'gake' neda' ḻo yeḻa' ẕža'a chégake'.
Bseḻa' da' gakḻen neda' kate' žin ža wchi'a ḻažo'o da' žak cheto'.
7Benne' yógo'te yež ka' ḻá'gake' ḻawo' Le'.
Wnná bia' benne' ka' ḻo yeḻa' ẕen chio'.
8Le', X̱ana' Dios, wchi'a ḻažo'o benne' yógo'te yež.
Bchi'a ḻaže' neda' ka nak da' chawe' dan' bena',
dan' bena' ḻo da' nak ḻi ḻaže' chia'.
9Bchinnj da' žongak benne' wen da' ẕinnj ka',
san ben chawe' benne' chawe' ka',
dan' nako' chawe', Dios, na' ẕwio' da' yo'o ḻo yichj ḻáẕdo'gak yógo'te benne' ka'.
10Dios na'kze žape chi'e neda'.
Žeslé' benne' ka' zej nake' ḻi ḻaže'.
11Nak chawe' ka ẕchi'a ḻaže' Dios da' žongak benne' ka'.
Yógo'te ža ẕža'a Dios che da' žongak benne' wen da' ẕinnj ka'.
12Cha' bi yeyát ḻáže'gake' Dios kweje' ya ntoche' chie' ka'.
Za' wsíe' yag ntóche'do' chie' ka'.
13Za' wkonle' žin ya chie' ka' che wdiḻe.
Za' wsíe' yag ntóche'do' ka' zoa yi' ḻáwe'gaken.
14Benne' wen da' ẕinnj ẕkweze' da' ẕia da' gone'.
Yo'o yichj ḻáẕda'we' da' ẕinnj da' gone', na' gone' da' wen ḻaže'.
15Ba bche'ne' to yežw gže' nich yéx̱jwgak benne' ka' ga na', san bex̱jwe' ḻekze' ḻo yežwn'.
16Da' ẕinnj da' bene' žesbaga'n ḻekze' ẕia,
na' da' bsake'e benne' ka' yebí'i Dios chekze' ḻe'.
17Wká'n ẕena' X̱ana' Dios ni'a che da' chawe' da' žone'
na' góḻteza' che La la'y che X̱ana' Dios, Benne' ẕente.
Zur Zeit ausgewählt:
SALMOS 7: zty
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2002, Wycliffe Bible Translators, Inc. All rights reserved.