Luk 21

Jisas haemapem wei blong wanfala pua woman

(Mak 12:41-44)

1Nao taem Jisas hemi lukluk goraon, hemi lukim olketa ris pipol wea olketa kam an putum seleni blong olketa insaet long boks fo putum koleksin long hem, wea hemi stap insaet long Tambuhaos. 2Hemi lukim tu wanfala wido woman wea hemi pua fogud. Woman ya, hemi putum go tufala blaksens#21:2 “blaksens” Long langguis long Grik hemi sei,“lepton”. Lukim “Seleni” long diksonari. nomoa insaet long boks ya. 3Nao hemi tok olsem, “Mi talem yufala tru samting nao, wanem pua woman ya hemi putum nao hemi barava bikfala tumas moa winim olketa seleni wea olketa nara pipol ya olketa putum. 4Olketa nara pipol ya olketa putum nomoa lelebet haf long olketa risis blong olketa. Bat disfala woman wea hemi no garem naf samting, hemi putum nao evrisamting wea hemi garem fo laef long hem.”

Jisas talemaot dat Tambuhaos ya bae olketa brekemdaon

(Matiu 24:1-2; Mak 13:1-2)

5Nao samfala disaepol blong Jisas, olketa gohed nao fo tokabaotem Tambuhaos ya, wea hemi barava luk gudfala tumas wetem olketa nambawan ston blong hem an wetem enikaen gud samting wea olketa pipol i givim fo mekhae long God. Bat Jisas hemi tok olsem long olketa, 6“Mi talem long yufala, evrisamting wea yufala lukim long hia ya, bae long samfala taem bihaen, olketa wol long ston ya bae olketa brekemdaon finis ya, an bae no eni lelebet ston nao hemi save stap long ples wea hemi stap long hem distaem.”

Jisas talemaot dat plande trabol bae hemi kam

(Matiu 24:3-14; Mak 13:3-13)

7Nao olketa disaepol olketa askem hem olsem, “?Tisa, long wataem nao bae olketa samting ya hemi hapen? ?An watkaen saen nao bae hemi kamap fo somaot dat olketa samting ya hemi kolsap fo kamtru?”

8Nao Jisas hemi sei, “Yufala mas lukaot gudfala, nogud eniwan hemi trikim yufala. Bikos bae plande pipol olketa yusim nem blong mi an bae olketa sei, ‘!Mi nao ya!’ an bae olketa sei moa, ‘!Olketa samting ya olketa kamtru nao!’ Bat yufala no falom olketa ya. 9An taem yufala herem nius abaotem olketa woa o yufala herem dat olketa pipol i faetem gavman blong olketa, yufala mas no fraet, bikos olketa samting ya i mas hapen fastaem ya. Bat diswan hemi no minim wea hemi en blong disfala wol yet ya.”

10An hemi sei moa, “Bae olketa pipol long wanfala ples olketa faetem olketa pipol long nara ples, an wanfala kantri bae hemi faetem nara kantri. 11An bae olketa bikfala etkuek tumas tu olketa sekem olketa ples long disfala wol. An olketa bikfala taem blong hanggre an olketa nogud siknis tu bae olketa spoelem plande pipol long plande ples. An bae enikaen nogud samting hemi hapen fo mekem pipol fraet tumas, an bae enikaen bikfala saen olketa soaot kam long skae tu. 12Bat bifoa evrisamting olsem hemi hapen, bae olketa pipol i kasholem yufala an meksave long yufala. An bae olketa tekem yufala go long kot long olketa preahaos, an bae olketa putum yufala insaet long prisin tu. An bikos olketa laek fo spoelem nem blong mi, bae olketa kotem yufala long ae blong olketa king an olketa primia. 13So long taem ya, yufala save talemaot Gudnius ya long olketa nao. 14An#Luk 12:11-12. wanfala samting nao yufala mas tingim, yufala no wari tumas long wanem nao bae yufala talem fo sevem yufala.

15Bikos mi nao bae mi givim toktok an gudfala tingting long yufala, mekem no eniwan long olketa enemi blong yufala hemi save tok agensim toktok blong yufala o tokdaonem toktok blong yufala. 16Bae olketa mami an dadi blong yufala, an olketa brata blong yufala, an olketa long laen blong yufala, an olketa fren blong yufala nao, bae olketa givim yufala go long han blong olketa enemi blong yufala. An bae olketa kilim dae samfala long yufala tu. 17An bae evri pipol nao olketa heitem yufala, bikos yufala blong mi. 18Bat nomata olsem, no eni lelebet hea long hed blong yufala nao hemi save lus. 19Bae yufala kasem tru laef ya from yufala stanap strong olowe.”

Jisas talemaot wanem bae hapen long Jerusalem

(Matiu 24:15-21; Mak 13:14-19)

20An Jisas hemi sei moa, “Taem yufala lukim olketa soldia olketa stap evriwea raonem Jerusalem, bae yufala save nao dat hemi kolsap fo olketa spoelem biktaon ya finis nao ya. 21Long taem ya, olketa hu i stap long Jiudia olketa mas ranawe go fo haed long olketa maonten. An olketa hu i stap long biktaon ya, olketa mas ranawe from ples ya nao. An olketa hu i stap long olketa eria raonem biktaon ya, olketa mas no kam moa long biktaon ya. 22Bikos#Hosia 9:7. taem ya, hemi taem blong God fo panisim olketa pipol ya, mekem evrisamting wea Buktambu hemi talem, hemi save kamtru. 23!So olketa woman hu i babule o garem olketa smolfala pikinini wea olketa susu yet long taem ya, olketa mas lukaot! Bae bikfala sore hemi kam long olketa pipol long disfala kantri an bae kros blong God hemi kasem olketa tu. 24Samfala long olketa bae olketa kilim olketa dae wetem naef fo faet, an samfala moa bae olketa kasholem olketa an tekem olketa go long olketa deferen kantri. An olketa pipol wea olketa no Jiu, bae olketa nao i rul ovarem evri ples long Jerusalem#21:24 “rul ovarem evri ples long Jerusalem” Long langguis long Grik hemi sei,“step long Jerusalem”. Lukim Revelesin 11:2. go-go kasem en long taem blong olketa.”#21:24 “taem blong olketa” Hemi minim taem wea God hemi makem fo olketa pipol hu i no Jiu, mekem olketa save duim spesol waka blong olketa long hem.

Jisas talemaot dat bae hemi kambaek moa

(Matiu 24:29-31; Mak 13:24-27)

25An#Aesaea 13:10; Esikiel 32:7; Joel 2:31; Revelesin 6:12-13. Jisas hemi sei moa, “An bae samfala saen olketa soaot long san an long mun an long olketa sta antap long skae. An long olketa kantri long wol, bae evriwan olketa barava fraet fogud nao long bikfala noes blong solwata wetem olketa bikfala wev blong hem. 26Bae olketa pipol olketa hafded from olketa fraet, taem olketa weitem olketa samting wea bae hemi kam fo spoelem disfala wol ya. Bikos evri strongfala samting long skae, bae olketa seksek tumas nao. 27Nao#Daniel 7:13; Revelesin 1:7. bihaen nomoa, bae olketa save lukim dat mi San Blong Man, bae mi kambaek antap long wanfala klaod wetem saen blong bikfala paoa blong God. 28Taem olketa samting ya i stat fo hapen, yufala mas stanap stret an luk goap, bikos God bae hemi kolsap kam fo sevem yufala nao.”

Tokpiksa abaotem olketa fig tri

(Matiu 24:32-35; Mak 13:28-31)

29Bihaen, Jisas hemi talem disfala tokpiksa ya long olketa olsem, “Yufala ting fastaem abaotem olketa fig tri ya an olketa nara tri ya moa. 30Taem yufala lukim olketa lif wea olketa stat fo kamaot niufala moa, yufala save dat taem fo evrisamting fo grou hemi kam kolsap nao. 31Long semkaen wei tu, taem yufala lukim olketa samting ya hemi hapen, yufala save dat kingdom blong God, hemi kolsap tumas fo kam nao.

32“An mi talem yufala tru samting nao, bae evrisamting ya hemi hapen taem olketa pipol blong distaem olketa no dae yet. 33Skae wetem disfala wol bae hemi finis nomoa, bat toktok blong mi bae hemi nating save finis.”

Jisas talemaot samting abaotem taem blong hem fo kambaek

34An Jisas hemi sei moa, “Yufala mas lukaot, nogud yufala gohed nomoa fo kaikai an dring an wari nomoa abaotem olketa samting long disfala laef. Nogud yufala seknomoa long de wea olketa samting ya hemi kasem yufala, 35olsem animol hemi save sek taem hemi pas insaet long trap. Bikos bae disfala de hemi kam kasem evriwan long disfala wol ya. 36Yufala mas lukluk gudfala an gohed fo prea oltaem, mekem yufala save stanap strong nomata evrisamting ya bae hemi hapen. Sapos olsem, bae yufala save kam an stanap long frant blong mi San Blong Man.”

37Nao#Luk 19:47. long evri de, Jisas hemi gohed fo tisim olketa pipol long disfala Tambuhaos blong God. An long olketa ivining, Jisas hemi goaot fo stap long disfala hil wea olketa kolem “Hil blong Oliv tri”. 38Long eli moning long evri de, olketa pipol olketa save kam fo hipap long Tambuhaos ya fo herem toktok blong hem.

Zur Zeit ausgewählt:

Luk 21: SIPB

Markierung

Kopieren