Matiyew 5
5
Yezu a tatəkadata gawla ŋga hay ka 'ar ma mamba
(Mk 3.13; Lk 6.12-13, 20)
1Andza Yezu ma nəkadata ndaw ana ma kusa hiya na hay na, ŋga me tsəley a mamba, ŋga me ndzey ɗar. Gawla aŋga hay ma gurafama. 2Ŋga ma zlar me tsey guma, ma tatəkadata:
3«Ndaw ta mevel ma ndaw
mbarga na hay na taya da wuiya zləna,
Slala ma 'ərlam ma vəlaha ma ta.
4Ndaw ləfeɗeɗe ana hay na, taya da wuiya zləna,
a da ndzafama dala.
andza na ma Bay'ərlam ma ləvatara na.
5Ndaw ma tuway ana hay na taya da wuiya zləna,
a da bədadəmata.
6Ndaw may ma tsatar,
ma harta hiya ta dzerey ana hay na,
taya da wuiya zləna, a da rəham.
7Ndaw na ndaw hay ma kəmatar
da vaw ana hay na taya ta wuiya zləna,
hərway a da kam da vaw tey.
8Ndaw na ta mevel tsəzlakka na hay na,
taya da wuiya zləna,
a da nəkadama Bay ma Bəla ta dey ta.
9Ndaw na ma kam mber ma zozoy hay na,
taya da wuiya zləna,
a da zəlamata na bəzey ma Bay ma Bəla ahiya.
10Ndaw ma kadəmata tatakway
hərway ma dzerey ana hay na,
taya da wuiya zləna,
Slala ma 'ərlam ma vəla ha ma ta.
11Ka da ndzam da wuiya, kendzey andza a tsaɗəmakwar,
kwa andza a kadəmakwar tatakoy,
a tsafəmakwar so ha ka tek haya kakay ana hay tabiyaha hərway ɗaw na. 12Ayaw, ndzam da wuiya, ndzam perkeke,
hərway masa kwar da 'ərlam ma paha ɗuhwa ha, zləna,
akwa a kadəmatərawa tatakoy ta ndaw sek ana hay,
ma da husawa ka kuray ana na, andza ha.»
Mandaŋ ta waw me nəkey dey
(Mk 9.50; 4.21; Lk 14.34-35; 8.16; 11.33)
13Kuray na mandaŋ ma dala hay. Kendzey andza mandaŋ a vəɗey sakay na, a da təradama ka vəɗey na ta mey sa mey? Tsoy a nefey sakay, seŋgey; sey a batəkwadama na a bəla, ndaw hay a halam ta 'arra. 14Kuray na waw me nəkey dey ma bəla hay. Wuraw ma kaha tsaŋ ka 'ar ma mamba na, a kəzley kakay. 15Kendzey a kam waw ka lalam na, ma da hwarkwafa 'uwaŋ kakay seŋgey, ama na a padama na tsaŋ ka slam ma luwey lalam, ma ka nəkatar dey a ndaw na da 'ay ana hay tabiya ha. 16Andza ha satsa na, waw a kwar ka wuɗey ka slam dey ma ndaw hay, ma ka nəkadama tek a kwar hayna hay ma kam ana na, ka hasəkadəmara bəzay a Baba kwar na da 'ərlam ana.
Yezu ta mewey
17Ka da dzalam da 'ar a kwar, i sawa na ma da mbəzladata Mewey hay, dakay na guma ma ndaw sek hay kakay: i sawa na ma da mbəzladata kakay, amana ma da ndasladata. 18Hərway i ɓadakwar dərka na, ha aza ka me ndəvey ma ndasl ma 'ərlam ta dala na, kwa tek asləta, kwa tek ketekwəɗey ma da devesey da Mewey na, dakay ha kasl ke me ndəvey ma bəla. 19Zla ekəɗey, ndaw ma mbəzlada kwa na bəza na ketekwəɗey ana da walaŋ ma mey ma mewey eɗey hay na, ma tatəkadata ndaw hay ka kama andza ha na na, a da ləvam bəza ha ketekwəɗey da Slala ma 'ərlam na ŋga. Dzadzak na, ndaw ma ka tərre, ma tatəkadatara a ndaw hay ka kam andza ha na na, a da ləvam ɗuhwa ha da Slala ma 'ərlam na ŋga tok. 20Hərway i ləvakwar ekəɗey na: haɗaw dzerey kwar me key ka fəna ma ndaw me sesəkey Mewey ana hay, ta na ma Fariziyeŋ hay kakay na, ka da fuləkwam aha a Slala ma 'ərlam kakay.
Me kəɗey ndaw vagay aha ta me pəɗey mbəlor a vaw
(Mk 11.25; Lk 12.57-59)
21Kuray ka tsənadama ba, a ləvamatərawa a baba tete hay na: Ka da kəɗey ndaw vagay aha zlay. Zləna ndaw ana ka kəɗey ndaw ba vagay aha na, a zəgama a slam ma sariya. 22Ama yah ekəɗey, i ləvakwar: Kwa way way ma kafa mevel ka malam aŋga tsana, a zəgama ka slam ma sariya; kwa way way ma ləvar a malam aŋga: ‹kah na dəla ha na›, a zəgama ka slam ma sariya ɗuhwaha. Ndaw ma ləvar a malam aŋga: ‹'ar me mbəɗey na›, kassla ma dada a waw ma laɓaha na. 23Kendzey ka da da tek ma ger a ɗek ka ŋgwa kuley na, haɗaw ka da dzala ka slam ana, dugwan ma malam eɗek ka kah daha na, 24mbəkada tek ana hwoɓ ka slam ma ŋgwa kuley ana, daway da pəɗəmawa mbəlor a vaw, dazladəmərawa mey ana ba, ta malam eɗek ɗagay. A dəba na na, mawa, vəladara tek eɗek a Bay'ərlam tok. 25Kendzey ka dawam aha a slam ma sariya ta ndaw dugwan eɗek na, səpey tsam tsam ma dazladama mey ba, zləna, dakay na ndaw dugwan ana hana na a da vəladaka a har ma ndaw me key sariya, ndaw me key sariya tey a da vəladaka a har ma sowedzey, sowedzey tey a da kəladaka a daŋgay. 26Ayaw dərka na, i ləvaka ekəɗey: ɗaɗa a da kəladəməkawa ha da huɗa kakay, ha ka pas eɗek ma wurəka tərre ta sisey a dzay ana.
Yezu me tsey ka me key madama
(Mt 18.8-9; Mk 9.43, 47-48)
27Kuray ka tsənadama ba a tsəmawa na: Ka da key madama zlay. 28Ama yah ekəɗey i ləvakwar: kwa way way me nəkey dey zur zur ka ŋgwas na, ka key madama tsoy ta ŋgwas ana, da mevel aŋga. 29Haɗaw dey ma har zəmay ɗek a vahaka ba a meŋgəsey na, tsursla, kəlada ba dəreŋ ta kah, hərway ŋgama mezəvey ma vaw ɗek asləta ka zəɗey, ta neney kah ma da daw ta 'ar eɗek adzay kərem, a waw ma laɓa ha na na. 30Haɗaw har zəmay ɗek a vahaka ba a meŋgəsey na, rətsa, kəlada ba dəreŋ ta kah; hərway ŋgama mezəvey ma vaw ɗek asləta ka zəɗey, ta neney kah ma da daway ta 'ar eɗek adzay kərem, a waw ma laɓa ha na na.
Yezu me tsey ka me ɓəley ŋgwas
(Mt 19.7-9; Mk 10.4-5, 10-12; Lk 16.18)
31Ka slam naŋgar ma tsa ha na: haɗaw ndaw a da ɓəla ŋgwas aŋga na, ka kar ɗeriwel ma me ɓəley vaw a har. 32Ama yah ekəɗey, i ləvakwar: kwa way way ma ɓəla ŋgwas aŋga na, a kəlada ŋgwas ana a madama -sey a zəga ŋgwas ana na, kendzey Mewey a wuɗey kakay. Ndaw me zəgey ŋgwas ma ɓəla ha na na, a ndəɓey madama.
Yezu a tsey ka me mbəɗey
33«Kuray ka tsənadama ba satsa, a ləvəmatar a baba tete hay na: ‹Ka kar masəfaya a me mbəɗey ɗek ana zlay, ama na ka tek ma me mbəɗey ɗek ana ka slam dey ma Bay’ərlam ana.› 34Ama yah ekəɗey i ləvakwar: ɗaɗa ka da mbəɗam tizlay tabiyaha: kwa ta ndasl ma 'ərlam na, ka da mbəɗam zlay zləna, hərway koriwal ma Bay ma Bəla, 35kwa ta dala zlay, hərway slam me pey sek aŋga, kwa ta Zeruzalem zlay, hərway wuraw ma Bay ɗuhwa ha. 36Kwa ta 'ar eɗek na, ka da mbəɗada zlay, hərway ka slafa ma tərada mbez 'ar eɗek asləta babara ha, dakay na zezeŋ aha kakay. 37Kendzey ka tsam guma na, ləvam: 'Ayaw na, ‹ayaw›, a'ay na, ‹a'ay›; sa na tabiyaha, a sawa na da ndaw wewer.»
Yezu me tsey ka me mey gandaf
(Lk 6.29-30)
38«Kuray ka tsənadama ba, a tsəmawa na tsosl dey na, tsosl tey! Tsoy sler na, tsoy tey! 39Ama yah ekəɗey, i ləvakwar: ka da madəmatara gandaf ma ndaw seweɗ zlay. Dzadzak haɗaw ndaw ka kəlaka marawa ba, ka tsakay sləmay ma har zəmay na, ɓadara naŋgar sa. 40Ndaw me wuɗey ma dadaka a slam ma sariya ma da zəgadaka gabak eɗek ba na, gəradara ka zəga ta dawra na dzay. 41Kendzey ndaw a təkaka ɗay kəsadaya sek gabal na, dawam sek gabal tsew dzay ta ŋga na tok. 42Ndaw a tsəhafaka tek na, vəlar. Ndaw a wuɗey me dedəɗey tek ka kah na, ka da mbəɗar dəba zlay.»
Yezu me tsey ka me wuɗey ndaw dugwan hay
(Lk 6.27-28, 32-36)
43«Kuray ka tsənadama ba, a tsəmawa na: ‹Wuɗa ndaw ka tsakay ɗek ana, ndaw dugwan a ɗek na ka da ŋgəlada dey zlay.› 44Ama yah ekəɗey i ləvakwar: wuɗəmata ndaw dugwan a kwar hay, ɗulafəmata mey ka ndaw ma kadəmakwar tatakoy ana hay, 45ma kuray ka da təram dərka na bəzey ma Baba kwar da 'ərlam ahiya, hərway ŋga na, a sləradərawa pas aŋga na, ka ndaw seweɗ ana hay, ta ndaw kokwoɗ ana hay dzay; a pawa yam na, ka ndaw dzerey ana hay, ta ndaw dzerey kakay ana hay dzay. 46Hərway haɗaw ka wuɗam na ndaw ma wuɗəmakwar ana hay dada na, ka da ndzafam masa na ka mey sa mey tok? Ndaw me tsekeley dzaŋgal hay tekeɗe na, a kam aha andza ha tey seŋgey. 47Haɗaw ka tsəmatar guma na a malam a kwar hay dada na, ka kam tek me rəzley ndaw aha da huɗa na na waray tok? Ndaw na Zuif ahiya kakay ana hay tekeɗe na, a kam aha andza ha tey seŋgey. 48Kuray tok na, ka da təram na kərem kokwoɗ a hiya, andza Baba kwar da 'ərlam, ŋga na kərem kokwoɗ aha na.»
Zur Zeit ausgewählt:
Matiyew 5: MOF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Le Nouveau Testament en langue Mofu © 2007 Alliance Biblique du Cameroun
