San Juan 3

Allempo Nicodemopaꞌ wapa Jesúsesho

1Allempopaꞌ eñall poesheñarr yakma ñeñth fariseo ñeñth sochetsa Nicodemo. Ñeñthñapaꞌ poesheñarr ñeñth amhchaꞌtarethtetsa judioneshakop. 2Ñañapaꞌ wapa Jesúsesho tsapopaꞌ ateth otos:

—Maestrochaꞌ yeñoteneph phapaꞌ añ pellsenseneꞌ Yompor atthoch peyxhatosey kowen tharroꞌmar yapaꞌ yeñoteñ añach orrtatyeneꞌ partsoteñets ñeñth awamenkath pen Yompor.

3Jesúsñapaꞌ ateth otaph:

—Eꞌñe poꞌñoxh notaph, eseshaꞌch ama eñalleterrtso ello ñetñapaꞌ amach errothenoth poeyochreshaꞌ perraneto Yompor.

4Nicodemoñapaꞌ ateth otererr:

—Amatheꞌ errothenoth yeꞌñalleterrerroña poꞌpocheñoñaꞌ oꞌkaꞌye yepoꞌnmeꞌten. Errothenothwatheꞌñakaꞌ yexherrerrña yachor paꞌtho atthothchaꞌ yeꞌñalleterrerr poꞌpocheño.

5Jesúsñapaꞌ ateth otererr:

—Eꞌñe poꞌñoxh noteneph, erraꞌtsenchaꞌ ama eñalleterrtso oñoth ñamha Yompor Poekamkëñoth, amatheꞌ errothenoth poeyochreshaꞌ perraneto Yompor ñeñthoꞌmarña amach eshek oꞌpatapreteretoña Yompor poꞌkowenña ñeñth attho ayochreshathtena ña. 6Ñeñth attho eñalletena arromñatheneshaꞌpaꞌ ñeñthpaꞌ arromñatha. Tharraña ñeñthchaꞌ eñalleterrtsa Parets Poekamkëñoth, ñeñthpaꞌ ñeñthña kamoekñetsotets ñeñthñapaꞌ ama arromñatheshayaye. 7Ñeñth ateth noteneph, “allowenespaꞌ añ sepalltena oꞌch seꞌñalleterrerr ello”, phapaꞌ amach xha peꞌcharrtatsto peyoxhro, amach xha photatsto añoꞌtheꞌ errothenoth peꞌñalleterrerroña ello poꞌpocheño. 8Ñeñthpaꞌ eꞌñe ateth pena ñerraꞌmrratheꞌ mhorr. Mhorrpaꞌ erra moeneꞌpaꞌ allchaꞌ mhorraren. Peꞌmoentheꞌ ateth maꞌmoreten, ama peñoteñe erroththeꞌña wena ñamha erratheꞌña sen. Atethchaꞌ perra ñamha allowen erraꞌtsenchaꞌ eñalleterrtsa Yompor Poekamkëñoth.

9Nicodemoñapaꞌ alla aꞌphthoꞌtererr:

—Ñeñthpaꞌ ¿errothenaꞌtña añ?

10Jesúsñapaꞌ ateth otererr:

—Phapaꞌ amaꞌt añepeñ israelneshaꞌ poꞌmaestror, amaꞌt peñotenoña añ. 11Eꞌñe poꞌñoxh noteneph: Alloweney ya ñeñth yeñotenpaꞌ ñeñthchaꞌña yeserrpareꞌten ñamha ñeñth yentyenpaꞌ ñeñthchaꞌña yaꞌpothen tharraña sapaꞌ ama xhennasoña seyoxhro añ ñeñth yaꞌpothen. 12Ñerraꞌm aña notenes ñeñth ateth yeyxhena añe patsro, saña ñerraꞌm ama sameꞌñennopaꞌ errothenothwatheꞌñakaꞌye notasña ñamha entoꞌmar ñeñth Yomporekop.

13‘Ama eñalle amaꞌt poesheñarra ñeñthchaꞌ aꞌtapoets ento ñamha ñeñthchaꞌ sowerrtsa ñeñthara entoth. Napthaña na Ñeñthen Acheñetosets ñeñthen sowatsa entoth, naptha nentar Nompor poeꞌntaño tharroꞌmar napaꞌ ñeñth naꞌnetser nepen. 14Ñewa, awath Moiséspaꞌ yexhkatan ñeñth atmaꞌntatareth shecheph all amayo, ñeñthñapaꞌ wankëꞌ tsachopaꞌ oꞌ echantampes enoneth. Attho Moisés echantamphsan shecheph all amayopaꞌ, napaꞌxhoꞌña ñeñth poktetsa nokop atethchaꞌ perrnet namha, korsochothchaꞌ echantamphsarethen. 15Allochñapaꞌ allowen amaꞌt erraꞌtsena ñeñthchaꞌ nameꞌñerraya na, ñetñapaꞌ amach chenkërreto, eꞌñech korretseta poksheñeshokmañen eꞌñe thayotheñ errponañowen.

Attho atarr morrentenya Yompor alloweney acheñeneshay

16‘Attho atarr morrentenya Yompor alloweney acheñeneshay arr patsro ñeñthoꞌmarña apoey Poechemer ñeñth poꞌpathrror pen, allochñapaꞌ allowen ñerraꞌm eseshaꞌ ameꞌñerraya ña amach chenkërreto, ñetñapaꞌ korretsetach poksheñeshokmañen eꞌñe thayotheñ errponañowen. 17Yomporpaꞌ amakaꞌye añekpayeꞌ moeñanoña Poechemer arr patsro atthoch moeñosan acheñeneshaꞌ koñcheñtso. Ñapaꞌ añekopña moeñe atthoch ñach aꞌkeshphatoseꞌña acheñeneshaꞌ arr patsro.

18‘Erraꞌtsenchaꞌ ameꞌñerraya ña ñetñapaꞌ amach amñarethterreto koñcheñtso. Tharraña ñeñthchaꞌ ama ameꞌñerrayo ñokpoetñapaꞌ anarethtet atthoch amñarethterret koñcheñtso tharroꞌmar ñetpaꞌ ama ameꞌñoñeto Yompor Poechemer ñeñth poꞌpathrror pen. 19Ñañapaꞌ oꞌ wapa arr patsro atthoch yexhatosey ñeñth eꞌñe kowen enten Yompor, atthoña aꞌpoetarsamphsosnay yokthaphña. Tharraña shonteꞌ acheñeneshaꞌ ñetñapaꞌ ama moeneto oꞌch aꞌpoetarsamphsarethtet pokthaphñet. Ñetpaꞌ aña moenenet chekmeteꞌ tharroꞌmar amakaꞌye masosyayeꞌ kothapeꞌchyeneto. Ñeñthoꞌmarña ñetpaꞌ atthothchaꞌña amñarethterret koñcheñtso. 20Allowen ñeñth ama masosyayeꞌ kothapeꞌchyeneto ñetpaꞌ ama kowenayeꞌ enteñetoña Cristo ñeñth aꞌpoetarsampeneꞌ alloweney yokthaphña. Ñeñthoꞌmarña ama eneto alloꞌtsen ñeñth aꞌpoetarsamphsañtetsa thayeꞌtoꞌtheꞌ orrtatarethtet pokthaphñet ñeñth ama masosyo. 21Añña ñeñth eꞌñe ateth peneꞌ ñeñth poꞌñoxh kowen enten Yompor, ñetpaꞌ eꞌñe pokteꞌ enteñet oꞌch onet alloꞌtsen ñeñth aꞌpoetarsamphsañtetsa tharroꞌmar ñetpaꞌ añ moenenet oꞌch eñotateret poꞌpotantañ ñetpaꞌ Yompor awamenkath penawet ñeñthoꞌmarña ñetpaꞌ añ orrtatyenet ñeñth kowen enten Yompor.

Allempo Juan ñeñth apatañtetsa Yomporekop, ñapaꞌ alla kowentaterranerr Jesús

22Allempoña Jesúspaꞌ awerrerr Judeo epoet poeyochreshaꞌ. Allñapaꞌ alla allponmat epoet poeyochreshaꞌ. Allña Jesúspaꞌ apatyesan acheñeneshaꞌ Yomporekop. 23Ñamha allempo Juanpaꞌxhoꞌña arr apatyenan acheñeneshaꞌ all oteñet Enón eꞌñe alla allameꞌtets Salimo, tharroꞌmar allpaꞌ shonteꞌ oñexhno. Acheñeneshaꞌpaꞌxhoꞌña shonteꞌ waxhaꞌtyeset atthoch apatarethetyeset Yomporekop. 24Ñewa, allempopaꞌ ama yottampeñetaꞌ Juan.

25Allempoña Juan poeyochreshaꞌpaꞌ serrpareꞌtet epoet judioneshaꞌ. Allpaꞌ añ serrpareꞌtatannaꞌtet estheꞌ poktetsaña atthoch yaꞌkowentatarethta Partsokop, añtheꞌ ñeñth attho apatyen Juan amapaꞌ ñatoꞌ añtheꞌ attho apatyen Jesús. 26Ñeñthoꞌmarña awanmoet Juaneshopaꞌ ñetñapaꞌ ateth otoset:

—Maestrochaꞌ ñeñth epaph awaña yomhtaꞌn Jordanaso, ñeñth peserrpareꞌtatosey, ñapaꞌxhoꞌña ñepaꞌtkaꞌyeña apatyets ñamha. Ñeñthoꞌmarña allowenetpaꞌ oꞌkaꞌye awanmoet ñesho.

27Juanñapaꞌ ateth otapanet:

—Amaꞌt poesheñarrotheyapaꞌ ama awamenkatheyayye ñerraꞌm ama Yompor awamenkath yephaye. 28Sapaꞌ amaꞌt señoteñe ñeñth ateth notwanmas awaña, napaꞌ ama añeyayno ñeñthenchaꞌ Cristoterrets. Napaꞌ attha moeñan nanom atthoch nota. 29Jesúspaꞌ eꞌñech ateth netmaꞌntacha ateth ñerraꞌmrratheꞌ yakma ñeñth senaꞌtetsa. Ñewa, ñeñth senaꞌtetsa ñeñthñakaꞌyeña agëneꞌña koyaneshaꞌ ñeñthchaꞌ poethapor phaꞌ. Tharraña ñeñthña poeyempaꞌ ñeñth parro epoet then ñerraꞌm añ eꞌm poeyem poꞌñoñ ñeñth senaꞌtetsapaꞌ ñañapaꞌ atarrchaꞌ koshapretana poeyem. Ñeñthoꞌmarña na theꞌpaꞌ atarr nokshapreteña Jesús. 30Jesúspaꞌ eꞌñe pokteꞌ alloꞌnepaꞌñakaꞌyeña enteñet poꞌñoxhpaꞌ ñakaꞌyeña atarr sherbets. Nañapaꞌ eꞌñe pokteꞌ alloꞌnepaꞌña entennet napaꞌ ama eꞌñeyeꞌ nesherbeno. Arrpaꞌ allowa ateth ot Juan Cristokop.

Attho yeñoteñ ñeñth wetsa entoth Yomporeshoth ñeñthkaꞌyeña atarr sherbets

31Ñewa, yeñoteñ ñeñth wetsa entoth Yomporeshoth eñchetepaꞌ ñapaꞌ atarrkaꞌye amhchaꞌtareth. Tharraña ñeñth patsoꞌmarneshaꞌ ñeñthpaꞌ alla eñorena patsoꞌmar. Ñeñth wetsa entoth Yomporeshoth eñchetepaꞌ ñapaꞌ atarrkaꞌye amhchaꞌtareth. 32Tharroꞌmar allowen ñeñth entyen Pomporesho ñamha ñeñth allpon eꞌmyen all, ñapaꞌ ñeñthkaꞌyeña serrpareꞌtateney, tharraña amaꞌt poesheñarrothapaꞌ ama eseshayeꞌ xhapawetoña poeyoxhreto ñeñth ateth otenanet. 33Ñeñth xhapa poeyoxhro ñeñth ateth serrpareꞌtatenanet ñeñth wapatsa Yomporeshoth ñetñapaꞌ ateth otet: Yomporpaꞌ eꞌñetheꞌ poꞌñoxh ateth oten Poechemerekop. 34Tharroꞌmar ñeñth llesensaꞌ Yomporpaꞌ Yomporo poꞌñoño eñorena tharroꞌmar Yomporpaꞌ ama atparethayaya chorratenanetoña Poekamkëñ. 35Yomporpaꞌ atarrkaꞌye nanak moerenanaña Poechemer. Ñeñthoꞌmarña apwaweñ allowen allpon eñall allochñapaꞌ ñach pomnaren penawet. 36Eseshaꞌch ameꞌñenaya Yompor Poechemer ñetpaꞌ korretsetach poksheñeshokmañen thayotheñ amaꞌt errponañowen. Añña ñeñth athpareꞌteneꞌ Yompor Poechemer ñetpaꞌ amach enterreto ñeñth korreñtsor. Ñetñapaꞌ xhachkaꞌye koñchaterranet Yompor.

Zur Zeit ausgewählt:

San Juan 3: ame

Markierung

Kopieren