Gén 38
38
Ri Judá y ri ixoq rubini'an Tamar
1Y xk'uluwachitej k'a chupan ri q'ij ri', chi ri Judá xuch'er-el ri' chike ri rach'alal y xbek'oje' pa rachoch jun achin rubini'an Jirá ri k'o chupan ri tinamit ri nibix Adulam chire. 2Y rija' xutzu' ruwech jun xten aj-Canaán rumi'al jun achin rubini'an Súa; xuk'uaj y xok k'a rixjayil. 3Y re ixoq re' xyawej k'a chirij ak'ual y xk'oje' jun ti ral ala' y rija' Er ri rubi' ri xuya'. 4Xyawej chik k'a chirij jun ak'ual y xk'oje' ri ruka'n ral y Onán ri rubi' ri xuya'. 5Y xyawej chik k'a jun bey y xk'oje' ri rox ral y Selá ri rubi' ri xuya'. Y ri Judá chiri' k'a pa tinamit Quezib k'o-wi toq xalex ri ak'ual ri'.
6Y toq ri Er ri nabey ruk'ajol ri Judá xnimer yan, ri Judá xuk'uluba' rik'in jun xten rubini'an Tamar. 7Xa jak'a ri Er man utz ta xuben chuwech ri Jehová y roma ri' ri Jehová xrelesaj ruk'aslen. 8K'ari' ri Judá xubij chire ri Onán ri ruka'n ruk'ajol: Tak'ama-qa la rixjayil kan ri animal y kak'ule' rik'in, richin keri' tik'oje' rijatzul ri animal, xcha'.
9Jak'a ri Onán kan retaman-wi chi wi yek'oje' rijatzul rik'in ri rixnan, man ye'ok ta richin rija' y roma ri' toq nik'oje' rik'in ri rixnan nuben chi man nijatzun ta kan rik'in, xa pan ulew nuya-wi-el. 10Y ri xuben ri Onán man xqa' ta chuwech ri Jehová y roma ri' ri Jehová xrelesaj ri ruk'aslen. 11Y jari' toq ri Judá xubij chire ri rali': Tayonij na chik k'a juba' y kabek'oje' pa rachoch ri atata' rokik nik'iy-q'anej ri nuk'ajol Selá, xcha'.
Keri' xubij ri Judá roma rik'in juba' niken chuqa-el ri Selá. Y ri Tamar xbek'oje' k'a pa rachoch ri rutata'.
12Y toq janila yan k'a k'iy q'ij tiq'ax, jari' toq xken-el ri rixjayil ri Judá. Y toq k'isineq chik el juba' ri rubis, rija' xbe-q'anej kik'in ri yesokan rusumal ri rukarne'l pa tinamit Timnat rachibilan-el ri Hira ri aj-Adulam. 13Y re' xbeya'ox rutzijol chire ri Tamar y xbix chire: Ri awalinan nijote-q'anej pa Timnat richin niberusokaj kij ri rukarne'l, xecha' chire. 14Roma ri' rija' xujel kan ri rutziaq ri nik'utu chi rija' jun malka'n ixoq y xuq'uj-el jun tzieq y xutz'apej-el rupalej rik'in jun tzieq richin man jun netaman ruwech. Y xbetz'uye' chuchi' ri tinamit Enaím, chuchi' ri bey ri nibe pa tinamit Timnat. Rija' rutz'eton chik k'a chi ri Selá xk'iy yan q'anej, y k'a man jani ya'on ta chire richin chi nok rachijil.
15Y toq ri Judá xutz'et, xuch'ob chi jun ixoq itzel ruk'aslen, roma rutz'apen ri rupalej. 16Y roma ri Judá man retaman ta chi xa ja ajk'a ri rali' ri pa'el ri chiri', rija' xpa'e-qa y xjel-apo rik'in ri chiri' chuchi' ri bey y xubij chire: Taya' q'ij chuwe richin yik'oje' awik'in, xcha' chire.
Y ri Tamar xubij chire: ¿Achike naya' chuwe richin yak'oje' wik'in?, xcha'.
17Y ri Judá xubij: Ninteq-pe jun ti alaj tzuntzun chawe ri nincha-pe chikikojol ri wawej, xcha' chire.
Y ri Tamar xubij: Taya' kan jun retal chuwe richin kan nateq-pe ri ti alaj tzuntzun chuwe, xcha'.
18K'ari' ri Judá xuk'utuj chire: ¿Achike retal nawajo' chi ninya' kan chawe?, xcha'.
Y ri Tamar xubij: Taya' kan la a-sello rik'in la rutzeqebal y la ach'ame'y la ak'uan, xcha' chire.
Y ri Judá xuya' ri xuk'utuj chire y xk'oje' rik'in, y ri Tamar xyawej kan; 19y ri Tamar kan xaxe xuben ri keri', man jun chik achike ta ri xroyobej xa kan jari' xbe; xberelesaj k'a ri tzieq chupalej y xberukusaj chik jun bey ri rutziaq ri nuk'ut chi kan malka'n.
20Y ri Judá xuteq k'a ri alaj tzuntzun, xuteq chirij ri rachibil ri aj-Adulam, richin nitzolix-pe ri retal ri ruya'on kan chire ri ixoq; y ri rachibil ri Judá xa man xril ta ri ixoq. 21Ri achin ri' kan xuk'utula' k'a chike ri achi'a' ri e aj chiri', y kere' k'a ri xuk'utula' chike: ¿Akuchi k'o-wi ri ixoq*f30* ri nik'oje' chuchi' bey, ri akuchi ek'o-wi ri tiox; chuchi' bey richin ri Enaím?, xcha'. Y ri achi'a' xkibij: Ri chiri' man jun bey k'o ta jun ixoq, ri yeroyobej achi'a', xecha' chire.
22K'ari' rija' xtzolin rik'in ri Judá y xberubij chire: Man xinwil ta kan ri ixoq; chuqa' ri achi'a' ek'o chiri' xkibij chuwe chi chiri' man jun bey k'o ta jun ixoq ri yerutz'elwachij achi'a', xecha' chuwe, xcha'.
23Y ri Judá xubij: Tik'oje' na k'a kan rik'in ri ixoq ri xinya' kan chire richin chi man jun tich'on itzel chiqij, roma xatinteq-el richin nabeya' kan ri ti alaj tzuntzun y re ixoq re' xa man xawil ta kan, xcha'.
24Oxi' yan k'a ik' tiq'ax toq xbanatej ri', jari' toq xapon rutzijol rik'in ri Judá y xbebix chire: Ri awali' Tamar xmakun rik'in achin y wakami royoben jun ak'ual, xuche'ex.
Y ri Judá xubij: Tiwelesaj-pe richin tibox pa q'aq', xcha'.
25Jak'a toq xbe'elesex-pe ri Tamar, rija' xuteq rubixik chire ri ralnan: Ri ak'ual ri woyoben richin ri achin ri rajaw re ronojel re ruya'on kan chuwe richin jun retal,*f31* kan to'atz'eta' k'a, achoq ichin na ri sello rik'in rutzeqebal y ri ch'ame'y ri k'o kan wik'in, xcha'.
26Y ri Judá xretamaj k'a chi ronojel ri' e richin rija' y xubij: Más utz ri ruk'aslen rija' chuwech ri nuk'aslen yin, roma yin man xinya' ta ri nuk'ajol Selá chire, xcha' ri Judá y man jun bey chik k'a xk'oje' ta rik'in ri Tamar.
27Toq xapon ri q'ij richin xutzir, xketamaj chi taq kua'ch ajk'a ri ak'uala'. 28Toq xalex jun chike rije', xrelesaj-pe jun ti ruq'a' y ri k'exelo'n chi'anin xuxim jun betz' keq chiruq'a', retal richin jari' ri xalex nabey. 29Jak'a ri ak'ual xa xujik' chik apo ri ruq'a', y xa ja chik ri rach'alal ri xalex nabey. Roma ri' ri k'exelo'n xubij chire, achike rubanik xaben richin chi xajeq-pe abey. Y roma ri' Fares xubini'aj ri ak'ual ri'. 30Chirij ri' xalex ri ak'ual ri ximon chik kan betz' keq chuq'a' y rija' xubini'aj Zeráh.
Zur Zeit ausgewählt:
Gén 38: KQC
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kaqchikel Bible © Bible Society in Guatemala, 2003.
