Gén 33
33
Ri Jacob xjunamatej kiwech rik'in ri Esaú
1Toq ri Jacob xutz'et-pe chi ri Esaú beneq-apo y e ruk'uan e 400 achi'a', rija' xeruch'er ri ak'uala', ek'o xebe rik'in ri Lea y ri Raquel y ri ch'aqa' chik ak'uala' xebe kik'in ri e ka'i' kisamajela' ixoqi' kan chikijujunal k'a rije' xekik'uaj ri taq kal. 2Y nabey xeruk'owisaj ri ixoqi' ri e kisamajela' kachibilan ri taq kal. Xeri' ri Lea y ri taq ral y pa ruk'isibel xbe ri Raquel rachibilan ri José. 3Y ri Jacob xik'o-pe chikiwech rije', y xxukuyaj k'a wuqu' mul toq xbe-apo k'a akuchi k'o-wi ri rach'alal. 4Jak'a ri Esaú junanin xbe chuk'ulik, xuq'etej y xutz'ubaj, y chi e ka'i' janila xe'oq'. 5K'ari' ri Esaú xerutz'et-apo ri ixoqi' y ri ak'uala' y xubij: ¿E achike la e peteneq awik'in?, xcha'.
Y ri Jacob xubij: Ja' ak'uala' re' ri e rusipan ri Dios chuwe roma ri rutzil pa nuwi' yin ri asamajel, xcha'.
6K'ari' xejel-pe ri e ka'i' ixoqi' e samajela' e kachibilan ri taq kal, xexuke-qa y xkiqasaj-ki' k'a pan ulew chuwech. 7Xpe chuqa' ri Lea kik'in ri taq ral xexuke-qa y xkiqasaj-ki' k'a pan ulew, y pa ruk'isibel xapon-apo ri José y ri Raquel, chuqa' xexuke-qa y xkiqasaj-ki' k'a pan ulew. 8Y ri Esaú xuk'utuj chire ri Jacob: ¿Achike nawajo' nach'ek rik'in ri q'ataj awej ri e nuk'ulun kan pa bey?, xcha'.
Y ri Jacob xubij: Richin yensipaj chawe richin ninwil utzil awik'in, xcha'.
9Y ri Esaú xubij: Ni, wach'alal yin. Yin k'iy k'o wik'in. Tik'oje' kan awik'in rat, la' kan e awichin wi rat, xcha'.
10Jak'a ri Jacob xubij chire: Yin nink'utuj utzil chawe chi wi kan qitzij xjunamatej-qawech, tak'ulu' re nusipanik re nuk'amon-pe chawe, roma re xqatz'et chik qawech, kan achi'el xintz'et ruwech ri Dios. Roma kan rik'in utzil xinak'ul. 11Tak'ulu' k'a re jun sipanik re nuk'amon-pe chawe, roma yin kan nuk'ulun ri rutzil ri Dios y k'o wik'in ronojel ri nik'atzin chuwe, xcha'. Y k'iy k'a mul xusuj chire y k'ari' ri Esaú xuk'ul.
12Xeri' ri Esaú xubij k'a chire ri Jacob: Jo' qachapa' bey. Y ja yin ri xkibe pa nabey, xcha'.
13Jak'a ri Jacob xubij chire: Wajaw, rat awetaman chi ri ak'uala' k'a e kokoj na, y ek'o ixoqi' taq karne'l y ixoqi' taq wákix ri k'a juba' ke'alex taq kal, y wi xqojbiyin chijun q'ij xkeken konojel taq alaji'. 14Tabana' utzil, wajaw yin, katik'o-el chinuwech yin. Yin eqal-eqal xkibe kik'in ri wawej ri e ik'owineq chinuwech, y xqojbiyin ri janipe' yojtikir kik'in ri ak'uala' y keri' xqojapon k'a pa Seir y chiri' xtiqabek'ulu-wi-qi' awik'in, xcha'.
15Y ri Esaú xubij: Wi keri', taya' q'ij chuwe richin yenya' kan e ka'i-oxi' achi'a' awik'in ri e peteneq chuwij, xcha'.
Jak'a ri Jacob xubij chire: Man nik'atzin ta chi naben keri'. Yin xa yiruben rik'in ri xinwil utzil awik'in rat, wajaw yin, xcha'.
16Keri' chupan ri q'ij ri' ri Esaú xuchop binen richin xtzolin pa Seir. 17Jak'a ri Jacob xa pa Sucot*f29* xbe-wi y chiri' xupaba-q'anej jun rachoch y chuqa' xeruben-q'anej kachoch ri rawej rik'in ruq'a-che'; roma ri' xubij Sucot chire ri akuchi xk'oje-wi-qa.
Ri Jacob xapon pa Siquem
18Y keri' rubanik toq ri Jacob xtzolin-pe ri k'a kela' pa Padán-aram, man jun xuk'uluwachij-pe y xapon ri pa tinamit Siquem ri k'o pa Canaán y xbek'oje' chiri' chunaqaj ri tinamit. 19Y xuloq' juba' rulew chi wok'al raqen pueq, chuwi' kiq'a' ri e ruk'ajol ri Hamor y chiri' xupaba-wi-qa ri rachoch ri banon rik'in tzieq. Y re Siquem re' jun chike ri e ruk'ajol ri Hamor. 20K'ari' xuben-q'anej jun porobel richin kamelabel y El-Elohé-Israel ri rubi' ri xuya'. Re bi'aj re' nel chi tzij, Dios jari' ri ru-Dios ri Israel.
Zur Zeit ausgewählt:
Gén 33: KQC
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kaqchikel Bible © Bible Society in Guatemala, 2003.
