San Juan 7
7
Ad rliladxt ree bijch Jesús laaman
1Chi gudëd gojc zian, wej Jesús loj ree guiedx rigaꞌ niz Galilea. Ad guyëntaman niejman niz Judea, guial cayguiil ree bén Judea guin laaman din gugüjt reeman laaman. 2Per guial ma zidyob lanij ni rüjn ree bén Israel, chi rbej reeman lën ranch, 3rëb ree bijch Jesús lojman:
―Brii, wej niz Judea, din në ree xbejnl bén rigaꞌ ree niz ni guguiaa milagr rüjnl. 4Din chi chu rën gagbee bejn ni rüjnman, ad rayalt güünman laan ralan. Yan ziꞌc rüjnl milagr ree, beenan loj gra ree bejn.
5Gunee ree bijch Jesús zian, guial niꞌqui laa reeman ad rliladxt laaman. 6Dxel rëb Jesús loj reeman:
―Ad wadxint da horan, per par lëjt xhietëëz horan na̱j zagdxe. 7Ad zajct guidxeꞌch bénguidxliuj lëjt, saꞌn naj rdxeꞌch reeman naj guial rën loj reeman ad laat na̱j ni rüjn reeman. 8Gol wej lanij guin, saꞌn naj ad zazaagajtan, din ad wadxint hor ni gazaan.
9Chi gulox rëbaman loj reeman zian, bayaꞌnman Galilea.
Wej Jesús xlanij ree bén Israel
10Chi ma zë ree bijch Jesús, dxel nëman zë lanij guin, per ralanzi zëman chitëë chu gagbee. 11Per yuꞌ ree bén Israel raguiil laaman loj lanij guin, rëb reeman:
―¿Con bén guin yaꞌn?
12Loj gra ree benzien we lanij guin, zienloj ni rniee reeman Jesús. Yuꞌ reeman rëb: “Benzaꞌcan”, yuꞌza reeman rëb: “Ad benzaꞌctan, rusquieeman bejn ree.”
13Per achutczi ruzaꞌt laaman loj gra bejn, guial rdxeb reeman guxtis Israel ree.
14Chi gurol xuman ni cayajc lanij guin, guyu Jesús lën yadooroꞌ Jerusalén, abiꞌ guzuloj culüüman bejn ree. 15Guiáad ree bén Israel badxaloj reeman, rëb reeman:
―¿Chexc yaꞌn contzi gra ragbeex, awa niꞌquid basiidtix?
16,17Dxel rëb Jesús loj reeman:
―Ad guictan carii ni culün lëjt, zëëdan por Dios, bén guxhaal naj. Bal chu rën güün ziꞌc rënman, zigniaꞌman bal ni carii guicanan culün lëjt o zëëdan por Dios ya. 18Bén rulüü ganaxzi ni rbëëguijcaman, rüjnman laan din guilies ree bejn xvaloraman. Per bén rüjn mazri din guilies bejn xvalor Dios, bén guxhaal laaman, laaman rniee ni diidxli, ad rusquieetaman bejn.
19’Yan, majsi basaꞌnnë Moisejs lëjt ley, per niꞌqui tijbidi ad rüjnt ziꞌc rëb ley guin. ¿Chexquiza zeel rëndi gugüjtidi naj?
20Badxiꞌ ree bén guinan, rëb reeman:
―Xindxab yuꞌ luxdool. ¿Chuczi rën gugüjt lüj?
21Abiꞌ rëb Jesús loj reeman:
―Por tijbzi milagr ni benan radxalojdi. 22Abiꞌ lëjt gunabee Moisejs lëjt guial gra ree xinguiaaw chuꞌ sen, (majsi ad por Moisejst ru bejn sen guin, mal rüjn ree dux bengol gulal ree zian), abiꞌ lëjt rguꞌdi bejn ree sen, majsi dxej raziiladx bejn. 23Yan, bal chitëë gusaglojdi ley ni basaꞌnnë Moisejs lëjt, rguꞌdi sen bejn ree majsi dxej raziiladx bejn. ¿Chexquiza zeel ralendi guial bayünan tijb bénragxuu dxej raziiladx bejn? 24Ad rüjndi xgabmal por ni ruguiaazidi rüjn bejn, yaloj xgaj gol gogbee zagdxe xhie cayüjnman.
Rëb Jesús ban zaman
25Yuꞌ ree bén Jerusalén guzuloj rniabdiidx loj lasaꞌ reeman, rëb reeman:
―¿Nid bén guinan cayguiil reeman ya din gugüjt reeman laaman? 26Abiꞌ yan laaman canee niz loj ree bejn, abiꞌ niꞌqui chut xhie rëb lojman. ¿Ni ma bililadx ree guxtis yaꞌn guial laaman na̱j Cristo? 27Per dunuj ree rayagbeechaaw ban zaman, guiáad chi guiꞌt Cristo, achut gagbee ban saman.
28Chi biguiejn Jesús zian, laꞌtgaj culüüman bejn ree lën yadooroꞌ Jerusalén, dxel guneeman rejs rëbaman:
―¡Lëjt rëb nünbeedi naj abiꞌ ragbeedi ban guzaan! Per ad zialtan por naj gajc, zialan por quijb bén rniabee bén ad nünbeetidi. 29Per naj nünbee laaman guial zialan diizd lod zaꞌman, laa tëëman guxhaal naj.
30Chi biguiejn reeman zian, guyën reeman niniaaz reeman laaman, per achut gunaaz laaman, guial gad hor gal guiniaazaman. 31Loj ree bénguixiuj zaꞌ yagaj zien reeman bililadx laaman, abiꞌ rëb reeman:
―Chi guiꞌt Cristo, ¿wen mazri zien ree milagr güünman guial loj bén guin ya?
Guyën reeman niniaaz reeman Jesús
32Biguiejn ree bénfarisew ni rniee ree bejn Jesús. Abiꞌ laa reeman con ree bixhioz rniabee, guxhaal reeman bén rajp ree roꞌ yadooroꞌ Jerusalén din guiniaaz reeman Jesús. 33Dxel rëb Jesús:
―Ad xchejtri gazunëꞌn lëjt, dxel yayaꞌn lod zaꞌ bén guxhaal naj. 34Yaguiilidi naj, per ad zadxejltidi naj, din ad zileꞌt guiꞌtidi lod gazun.
35Abiꞌ ree bén Israel guin guzuloj rniabdiidx loj lasaꞌ reeman, rëb reeman:
―¿Banczi zajc che bén guin din ad zadxejltaman? ¿Ni zejman lod zojb ree bén Israel loj ree benzit ya, chiglüüman laa reeman në ree bén ad najt bén Israel? 36¿Xhie rën guiëb guial naman: “Yaguiilidi naj per ad zadxejltan, din ad zileꞌt guiꞌtidi lod gazun”?
Nijs runee guialnaban
37Dxej rliox lanij guin na̱j mazri dxej zojbloj, dxejzii guzuli Jesús guneeman rejs, rëbaman:
―Bal chu lëjt reꞌc nijs, gol guda lon din guiëꞌdan. 38Din bén rliladx naj ziꞌc ca loj xtiidx Dios, lën luxdooman gach nijs runee guialnaban.
39Chi gunee Jesús zian, rën guiëb xtiidxaman guial gra ree bén chililadx laaman zabajnnë reeman xSprijt Dios. Din nadxel ad wayiꞌtt xSprijt Dios guial ad waguiajt Jesús lod canabeeman.
Gulaꞌ lasaꞌ ree bejn
40Yuꞌ ree bén noꞌch loj ree benzien guin, chi bacaagdiajg reeman ni gunee Jesús, rëb reeman:
―Walican, bén guin na̱j guiꞌt guidgadëë xtiidx Dios loj ree bejn.
41Yuꞌza reeman rëb:
―Bén guin na̱j bén bacaabee Dios.
Per yuꞌ reeman rëb:
―Ad laataman na̱j Cristo, din ad niz Galileat na̱j griiman. 42Loj xtiidx Dios ca guial loj xdiaa rey Davi grii Cristo, abiꞌ Belén galaman ladx gajc rey Davi.
43Zian gojc dxel gulaꞌ lasaꞌ reeman por Jesús. 44Zien reeman guyën niniaaz laaman, per achut bayax niniaaz laaman.
Ad bililadxt ree guxtis Jesús
45Chi bayejc ree bén rajp roꞌ yadoo guin lod zaꞌ ree bénfarisew guin con ree bixhioz rniabee guin. Rëb reeman loj reeman:
―¿Chexc zeel ad bidnëtidi laax?
46Dxel rëb ree bén rajp roꞌ yadoo guin:
―¡Ad goct wayu bén guiniee ziꞌc rnieex!
47Abiꞌ rëb ree bénfarisew guin:
―¿Në lëjt ma cwëjb basquieex lëjt ya? 48¿Wen yuꞌ ree dux guxtis ree, o bénfarisew ree ma bililadx laax ya? 49¿Nid ragbeedi ya guial zien ree bén guin banijt loj Dios guial ad nünbeet reeman ley?
50Per bénfarisew la Nicodemo bén bignaj Jesús tijb guxhin, rëbaman loj reeman:
51―Loj dux ley ree ca guial ad zileꞌt yaguieꞌch ree xhie casti rayal tijb bejn, chi gad dunuj ree yacaagdiajg xtiidxaman, din chileꞌ yayagbee ree xhie beenman.
52Badxiꞌ reeman laan rëb reeman:
―¿Wen në lüj zaꞌnë ree bén Galilea ya? Basiid zagdxe loj xtiidx Dios din gagbeel ad goct warii bén rudëë xtiidx Dios loj ree bejn niz Galilea.
53Dxel bareꞌch reeman zia lidx lidx reeman.
Zur Zeit ausgewählt:
San Juan 7: zas
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2010, Wycliffe Bible Translators, Inc. All rights reserved.
