San Juan 6
6
Bayaan Jesús gaay mil bejn
(Mt. 14:13‑21; Mr. 6:30‑44; Lc. 9:10‑17)
1Chi gudëd gojc zian, dxel zë Jesús stiblad roꞌnijsdoo rigaꞌ niz Galilea, nijsdoo la gajc Tiberias. 2Bénguixiuj binal laaman, guial ruguiaa reeman milagr ree ni rüjnman rayüjnman bénragxuu ree. 3Dxel wëꞌpaman tijb ruguiaꞌ abiꞌ gurenë ree xbejnman. 4Dxejzii ree ma zidyob pascw, xlanij ree bén Israel. 5Chi gules loj Jesús, abiꞌ baguiaaman zëëd ree bénguixiuj lod zaꞌman, dxel rëbaman loj Felip:
―¿Ban yusii ree ni gaw gra ree bén guin?
6Per rëbzaman zian din guidoon xhie guiëb Felip, din Jesús mal ragbeeman xhie güünman. 7Dxel badxiꞌ Felipan rëbaman:
―Niꞌqui ni rüjn bejn gan loj xhujn bëëw ad zadaant yoꞌ guiadxtil din gaw tijbgaj reeman majsi tibliaꞌdogajzan.
8Dxel gunee stijb xbejn Jesús, bén la Andrejs bijch Simón Bëd, rëbaman:
9―Laa tijb xindo caꞌ gaay guiadxtil con zatioꞌp bëjl zaꞌ guie. Per, ¿tëꞌczi taan ni guin par gra bén guin?
10Dxel rëb Jesús:
―Gol güjdx loj gra reeman din cwe reeman.
Abiꞌ guial yuꞌ daꞌt guixyaꞌ yagaj, dxel gurej reeman. Na̱j reeman cost gaay mil xinguiaaw. 11Dxel cwaꞌ Jesús guiadxtil guin ree. Chi gulox badëëman quixtëë loj Dios, badëëman laa reen loj ree xbejnman persi gudiꞌs reeman laa reen loj gra ree bén zojb yagaj. Ziangajc beenman con ree bëjl guin, badëëman laa reen ziꞌctzi guyën reeman. 12Chi ma bixienladx reeman, dxel rëbaman loj ree xbejnman:
―Gol batoꞌp gra ree ni laay bayaꞌn, chitëë xhie guizëëb.
13Zianz batoꞌp reeman laa reen, abiꞌ bacha reeman chiptioꞌp dxüm nilaay bayaꞌn ree loj gaay guiadxtil guin. 14Chi baguiaa ree bejn milagr naroob ni been Jesús, rëb reeman:
―Walican bén guin na̱j bén rudëë xtiidx Dios loj ree bejn, bén na̱j guiꞌt loj guidxliuj.
15Per gogbee Jesús guial rën reeman chinë naguiejn reeman laaman din güün reeman laaman rey, dxel bazaman yagaj, wëꞌpaman mazri ladya guijc guiaꞌ guin, lod su xtijbaman.
Rza Jesús lonijsdoo
(Mt. 14:22‑27; Mr. 6:45‑52)
16Chi ma cabej guiaal, biguiajt ree xbejn Jesús roꞌnijsdoo, 17guyu reeman loj tijb barcw, abiꞌ cadëd reeman loj nijs guin din guidxin reeman Capernaum. Ma bicajy, guiáad Jesús gadaman yadxin. 18Dxel guzuloj cabiꞌ bidoxh abiꞌ wajs xtüjp nijs guin. 19Chi ma gojc ziꞌc gaay o xhoꞌp kilometro zë reeman, baguiaa reeman caza Jesús lojnijs guin cabigaman lod zë barcw guin, dád bidxeb reeman. 20Per rëbaman loj reeman:
―¡Najn, ad rdxebidi!
21Dxel guyën reeman niuman loj barcw guin, per hor guin gajc bidxin reeman lod zë reeman.
Bigdiil ree bén bayaan Jesús laaman
22Chi bareguiaal, bén rigaꞌ ree stiblad roꞌ nijs guin, ragbee reeman guial tijbzi barcw guzu yagaj, abiꞌ gogbee reeman, lojn zë ree xbejn Jesús per ad nët laaman. 23Loj hor zii bidxin ree barcw ren za guiedx Tiberias, gajxh lod gudaw reeman guiadxtil chi gulox badëëd Jesús quixtëë loj Dios. 24Chi baguiaa reeman achutri Jesús zaꞌ yagaj niꞌqui ree xbejnman, dxel wëꞌp reeman loj ree barcw guin, zë reeman Capernaum zigdiil reeman laaman.
Jesús na̱j bén rudëëd guialnaban
25Chi bidxin reeman Capernaum, badxejl reeman Jesús, abiꞌ gunabdiidx reeman lojman, rëb reeman:
―Mextr, ¿goc biꞌtil guie?
26Badxiꞌ Jesúsan rëbaman:
―Ragbeechaawan, raguiilidi naj guial gudawidi xt bigdxinladxidi, ad guial baguiaatidi milagr ree ni rünan. 27Ad chuꞌdi xgab guialraw rara, gol guyu xgab guialraw runee guialnaban tiblayaa con Dios. Din laan na̱j ni runee Bén guxhaal Dios loj guidxliuj guial ma bacaabee Dios laaman.
28Dxel gunabdiidx reeman lojman rëb reeman:
―¿Xhie rayal yaguieenan din chileꞌ yaguieenan ni rën Dios?
29Badxiꞌ Jesús laan rëbaman:
―Ni rën Dios güündi na̱j guial chililadxidi bén guxhaalaman loj guidxliuj.
30Dxel rëb reeman lojman:
―¿Xhie gulüül dunujn din yaliduladxan lüj? ¿Xhietëë ree milagr rüjnl? 31Dux béngulal ree gudaw reeman mana chi guzu reeman niz loj yujbidx, ziꞌc rëb loj xtiidx Dios: “Badëëman guiadxtil biajb xanyabaa loj reeman gudaw reeman.”
32Badxiꞌ Jesús laan rëbaman:
―Naj rni lojdi: Ad Moisejst badëëd guiadxtil guin, da Dadan na̱j bén runee quijb guiadxtil za xanyabaa. 33Guiadxtil runee Dios, laan biꞌt diizd xanyabaa abiꞌ runeen guialnaban loj bénguidxliuj.
34Abiꞌ rëb reeman lojman:
―Dad, banee guiadxtil guin du lojn zianczi.
35Rëb Jesús loj reeman:
―Naj na̱j guiadxtil runee guialnaban guin. Bén guiꞌt lon, ad yuꞌt dxej guiliaanman, ziangajc bén chililadx naj, ad yuꞌt dxej cheꞌcaman nijs. 36Per ziꞌc rnin lojdi, majsi ma baguiaadi naj, ad rliladxtidi naj. 37Gra ree bén ma banee da Dadan lon, guiꞌt reeman lon, abiꞌ bén guiꞌt lon, ad zasiejctan laaman. 38Din naj zial diizd xanyabaa, zidgaguienan ziꞌc rën da Dadan bén guxhaal naj, ad par güntan ziꞌc rënan. 39Da Dadan bén guxhaal naj, ni rënman na̱j guial gra ree bén baneeman lon niꞌqui tijb reeman ad zunijttan, rënman yasbanan laa reeman chi nit guidxliuj. 40Din rënman guial gra ree bén yayagbee Xiꞌnman chililadx tëë reeman laaman, gap reeman guialnaban tiblayaa con laaman, guiáad naj yasban laa reeman chi nit guidxliuj.
41Dxel guzuloj ree bén Israel caneeguijdx reeman Jesús, guial rëbaman: “Naj na̱j guiadxtil ni biguiajt diizd xanyabaa.” 42Abiꞌ rëb reeman:
―¿Nid laaxan na̱j Jesús ya, xiꞌn Xiëb? Dunuj ree naguieenbee xdadix con xniaax. Yan, ¿chexc zeel nax xanyabaa biguiajtix?
43Dxel rëb Jesús:
―Gol bacwëëz rnieeguijdxidi naj loj lasaꞌdi. 44Dios na̱j bén guxhaal naj. Achut zileꞌ guiꞌt lon bal id zëëdaman por da Dadan, abiꞌ naj yasban laaman chi nit guidxliuj. 45Loj ree libr ni bacaa ree bén badëë xtiidx Dios loj ree bejn, rëb: “Dios gulüü gra ree bejn.” Zeel gra ree bén rucaagdiajg xtiidxaman, rusiid tëë reeman ni rulüüman laa reeman, laa reeman zëëd lon.
46’Achutczi waguiaa da Dadan Dios, tijbzi bén guxhaalaman loj guidxliuj ma baguiaa laaman. 47Diidxliczi rnin, bén rliladx naj rajpaman guialnaban tiblayaa con Dios. 48Naj na̱j guiadxtil ni runee guialnaban. 49Xbéngulalidi gudaw mana loj yujbidx, per niꞌczi zian güjt gajc reeman. 50Per naj canin lojdi xcwent guiadxtil za xanyabaa, bén gaw laan gapaman guialnaban tiblayaa con Dios. 51Naj na̱j guiadxtil naban ni biyajb diizd xanyabaa. Bén gaw guiadxtil guie zajpaman guialnaban tiblayaa con Dios. Guiadxtil ni rudëdan, laan na̱j quijb da cuerpan, gudëdanan din gap ree bénguidxliuj guialnaban.
52Dxel guzuloj ree bén Israel guin cadildiidx reeman, rëb reeman:
―¿Xhienaag gunee xin guin xcuerpix yadaaw ree?
53Abiꞌ rëb Jesús loj reeman:
―Naj rni lëjt, bal id zajwidi xcuerp Bén guxhaal Dios, bal id zëꞌ tëëdi xrejnman, ad zajptidi guialnaban. 54Per bén gaw da cuerpan guiëꞌ tëëman da rejnan, zajpaman guialnaban tiblayaa con Dios, abiꞌ naj yasban laaman chi nit guidxliuj. 55Din da cuerpan na̱j quijb guialraw, guiáad da rejnan na̱j quijb ni guiëꞌ bejn. 56Abiꞌ bén raw da cuerpan rëꞌ tëëman da rejnan, laaman nabannë naj, guiáad naj nabannëꞌ laaman. 57Da Dadan bén guxhaal naj, rajpaman guialnaban, abiꞌ naj nabanan por laaman. Ziangajc bén gaw da cuerpan, zajpaman guialnaban tiblayaa con Dios por naj. 58Naj cani xcwent guiadxtil ni biguiajt xanyabaa. Abiꞌ guiadxtil guie ad najtan ziꞌc na̱j mana ni gudaw xbéngulalidi, din laa reeman majsi gudaw reeman mana guin, per güjt gajc reeman. Guiáad bén gaw guiadxtil guie zajpaman guialnaban tiblayaa con Dios.
59Zian balüü Jesús bejn ree lën yadoo Capernaum.
Diidx runee guialnaban tiblayaa
60Chi gulox bacaagdiajg reeman ni balüü Jesús laa reeman, zien ree bén zinal laaman rëb:
―Nawëëg daꞌt na̱j yayigniaꞌ ree ni naman. ¿Chu zajc guidxgaꞌ laaman?
61Chi gogbee Jesús ni canee reeman, gunabdiidxaman loj reeman, rëbaman:
―¿Rüjnnaa ni rnin lëjt ya? 62¿Xhieza güündi bal guguiaadi Bén guxhaal Dios yayëꞌpaman lod guzuman gocli? 63Tijbzi por xSprijt Dios rajp bejn guialnaban tiblayaa, bejn ad zileꞌt güün laazaman xhienin. Abiꞌ naj por xSprijt Dios zëëd ree diidx ni gunen lojdi, por ree diidx guin rajp bejn guialnaban. 64Per lëjt yuꞌdi ad waliladxt.
Rëb Jesús zian guial ragbeechaawaman diizd yaloj chu ree ad rliladxt laaman chu tëë yayü laaman. 65Rëb tëëman loj reeman:
―Zeel ma rnin lojdi guial achut zileꞌ guiꞌt lon bal id zëëdaman por da Dadan Dios.
66Diizd nadxel, zien ree bén zinal Jesús guroꞌnladx laaman, abiꞌ ad guzanëtri reeman laaman. 67Dxel rëb Jesús loj guidxiptioꞌp ree xbejnman:
―¿Në lëjt rën yaguiaj ya?
68Per badxiꞌ Simón Bëd laan, rëbaman:
―Dad, ¿chu loj yoꞌn? Awa xtiidxil zidnë guialnaban tiblayaa con Dios. 69Dunujn ma baliduladx rayagbee tëën guial lüj na̱j Cristo, Xiꞌn Dios naban.
70Dxel rëb Jesús loj reeman:
―¿Nid naj gule guidxiptioꞌpidi ya? Abiꞌ yan tijb gajqui lëjt na̱j ziꞌc xindxab.
71Rëb Jesús zian por Judas Iscariote, xiꞌn Simón, din Judas guin na̱j bén bayü laaman, majsi tijb gajc xbejnman najman.
Zur Zeit ausgewählt:
San Juan 6: zas
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2010, Wycliffe Bible Translators, Inc. All rights reserved.
