یوحنا 5
5
شِلَه مِردی شفا دوعِه
1ایی مودَتی به دوملَه، یَهودیون ایلَه عیدونکا بَه و عیسی شهراورشلیمیرا شَه. 2شهر اورشلیمیکا، دَروازَ اِ گوسَندی وَر، حووضی بَه کن عبرانیون زبانینَه اَی «بِیت‌حِسْدا» اَواجین و پنج گِله اِسبو داری. 3خَیلی شِلَه آدَمونکا اَ جِگاکا اَخِسِینه، یعنی ناوینا اِن چولاغن و فَلَجن و آوی تِم هَردِ مُنتَظیر بین. 4[ اِمی خونه کن هر چَند وقت یَک بار، ایلَه فرشتَه خداوندی طَرفیکا آیوو آوی تم دَروَری؛ اوّلین کَسی کن آوی تم هَردِ بَه دوملَه حووضی دَله دَرَشی، هر آزاریکا کن داری شفا اَگِریَه.]
5چَوون دِلَکا، ِمردی به کن سی و هَش سال شِل بَه. 6وَقتی عیسی بَی ویندِشَه کن اَجِگاکا خِتَه و اَزنیَه کن خَیلی وَقتَه کن اَ جِگاکارَ، بَی واتِش: «بَپیرَ شفا بیگِری؟» 7اَ شِلَه مِرد عیساش جواب دوعَه: «آقا، کسیم نیَه کن وَقتی آو تِم بَردی، بَمن حووضی دِلَه بِبَر، و تا بَشتَن اَجگارا آمَراسنِست، دیَیری بَمِنکا بَه نَ حووضی دِلَه درَش.» 8عیسی بَی واتِشَه: «پِب، اِشتَن ختَه جِگا پِگِه و گَل بِژَن.» 9اَمِرد جَخت شفا گَتِشه و اِشتَن خِته جگا پِگَتِشَه، گَل ژِشَه.
اَ روج، یهودیون موقَدَسَه شَنبَه بَه. 10پس یهودیِن، اَ مِردی کن شفا گَتَش بَه واتِشون: «اومروج موقدسَه شنبَه یَه وشرعا تِرا جایز نیَه کن اِشتَن خِته جگا پِگِری اِشتَنَه بِبَری.» 11ولی اَ مِرد جواب داشَه: «اَ کن بَمن شفا داشه بَمِنِش واتَه، اِشتِه خِتَه جگا پِگه و گَل بژَن.“» 12اَیکا دَپَرسِستین: «اَ کن بَه تِه واتِشَه اِشتِه ختَه جگا پِگِری و گَل بژنی کییَه؟» 13ولی مِردی کن شفا گَتَش بَه نَزنیَه اَ کیَه، اِمی خونه کن اَ جگا جَمعیتینَه پور به و عیسی جمعیتِی دلَکا گین آبَه بَه.
14چَی به دوملَه، عیسی اَ مردی معبدیکا ویندشَه و بَی واتِش: «دَیس ایسَه شفا گَتِرَ، دِ گِناخ مَکَ تا اِمیکا بَتَر اِشتِه سَر مَعا.» 15اَمِرد شَه و یهودیون واتِشَه: «اَ کن بَمن شفا داشَه، عیسی بَه.»
16چیمی خونِه بَه کن یهودیِن عیسی اَیذَت آزار اَکَرینَه، اِمی خاطر کن یهودیون موقَدَسه شَنبَه روجیکا اِنتَرَ کارون اَکَریَه. 17ولی عیسی اَوون جواب داشَه: «چمن دَدَ تا ایسَه کا کار کَردِ، اَز نی کار بَکَم.» 18اِمی خاطِربَه کن، یهودیِن ویشتَر اَپیشون بَه اَی بِکِشن، اِمی خونه کن عیسی نِه فقَط موقَدَسه شَنبه روجی قانونی اَچاکنیَه بَلکَم حتی خدا نی اِشتَن دَدَ خِلِه اَکَری و اِنتَرَکه بَشتَن خدا نه یَکی آکَری.
19پس عیسی اَیِنِش واتَه: «حَییقتا بَه شمَه باتیمَه کن زوعَه بَشتَنکا کاری نِیَشا کردِ مَگَم، فقط کارِنی کن بَویندیَه دَدَ اَنجوم دَرِ؛ اِمی خونه کن هر‌چیی کن دَدَ بَکَی زوعَه نی هَتَه بَکَیَه. 20اِمی خاطر کن دَدَ، زوعَه رَی بَداشتی و گِردِ کارِنی کن اِشتَن اَنجوم دَرِ زوعَه آمونِه و کارِنی اِمونکا یالتَر نی بَی آمونِه تا شِمَه تَعجُوب بکَرَ. 21چون هَته کن دَدَ مَردَ اون زِندَ آرَکَرد و اَوون زندَگی بَبَخشِستی، زوعَه نی هر کمی کن بَپیشه، زندگی بَبخشستی. 22چون دَدَ کَسی سَردِرِ دیوون نییَکَرد، بَلکَم دیوون کردِ کارون گردی زوعَه دَست آدوعَشه. 23تا گردِ آدَمِن زوعَه ایحترام بکَن، هَته کن دَدَ ایحترام بَکَن. هَر کَم کن زوعَه ایحترامی غَم نیَرد، دَدَ اِیحترامی نی کن بَی رَونهَ کَردَشه غَم هَردَش نیَه. 24حَییقتا بَه شمَه باتیمَه، هر کَم چمن گَفون دَرَسه و بَه خدا کن بَمِنِش عَندَیَه ایمان بوعَرِ، زَیرونَه زندَگی بَداشتی و چَی سَردِرِ دیوون نیَبن، بَلکَم اَ، مرگیکا، زندَگیرا آمَیَه. 25حَییقتا بَه شمَه باتیمَه، زمانی آ، و هِم ایسَه نی آمَیَه کن، مَردَ اِن خدا زوعَه سَسی دَنّرَست و کسِنی کن دَنَّرست زِندَ آنَّب. 26چون هَته کن دَدَ اِشتَن دِلکا زندَگیی دارِ، بَه زوعَه نی عطا کردَشَه تا اِشتَنکا زندَگی بِدارِ. 27و بَی زاکین دوعَشَه کن دیوون بکَرِ، اِمی خونه کن اَ، اینسانی زوعَه یهَ. 28اِم گَفونکا تَعَجب مَکَرَ، اِمی خونه کن زمانی آ، کن گردِ اَیِنی کن قَوریکانَه، چَی سَسی دَنَّرَست و بِرِن بومَنَه. 29اَیِنی کن چَاکَ کار کَردشونَ ، زندَ آبون تا زَیرونَه زندَگی بدارن واَیِنی کن بَدَ کار کَردشونَ ، زندَ آبون تا چَوون سَردِرِ دیوون ببو. 30اَز اِشتَنکا کاری نمَشا کَردِ، بَلکَم هَتَه کن دَمَرَست دیوون بَکَم وچمن دیوون کَردِ عادیلانه یَه، اِمی خونه کن اِشتَن خاستَه دوملَه نیمَه، بَلکَم چمن رَونَه آکَری ایرادَ دوملَه ایمَه.
31«اَگَم اَز اِشتَن، تاکَه اِشتَن خونه شاهیدی بِدَرم چمن شاهیدی ایتبارِش نیَه. 32دیَرَ کَیسی هِستَه کن مرا شاهیدی بَدایَه و بَموستیم چَی شاهیدی چمن خونه ایتبار دارِ. 33شمَه آدَمِنی یحیی وَر عَندِرونَه و اَ حَییقتی سَر شاهیدی داشه. 34نِه اِمکن اَز اینسانی شاهیدی قِبول بکم، بَلکَم اِم گَفون بَژَم تا شمَه نیجات پَیدا بکَرَ. 35یحیی هِنتَه ایلَه رِشونَه چِرایی شیوار بَه کن شَپَق اَژَنیَه و شمه اَپیرون بَه ایی تیکَلی زَمانی چَی شَپَقیکا خَش ببَه. 36ولی اَز شهادتی، یَحیی شَهاتیکا یالتَر دارم، چون، اَ کارِنی کن دَدَ چمن دَست آدوعَشه، کامیل اَنجوم بِدَرم یعنی هم کارِنی کن بَکَم، اَیِن مرا شاهیدی دَرِن کن دَدَ مِنِش عَندَیَه. 37دَدَ کن بَمن رونه آکردشَه، اِشتَن مِرا شاهیدی دَرِ. شمَه هرگز چَی سَسی دَرَسترون نی و اَی ویندَرون نیَه 38وچَی کلام شمَه دِلَکا نیَه، چون اَ کَسی سَردِرِ کن اَ رَونَه آکَردَشه ایمان نیرونَه. 39شمَه موقدّسَ نِوِشتَه اون آوسکَنَه، اِمی خاطر کن فکر بَکَرون چَوون واسیطَنَه زَیرونَه زندَگی دارَ، اِمِن هَه نِوشتَه اِنینَه کن مِرا شاهیدی دَرِن. 40ولی هَنوزنی نَپیستِرونَه چمن وَر بِرَ تا زَیرونَه زندَگی بِدارَ.
41«آدَمونکا شکوه و جلال قِبول نِمَکرد، 42ولی بَموستیمَه کن شِمَه خدا موحبتی اِشتَن دلیکا نِدارَ. 43اَز اِشتَن دَدَ نومینَه آمیمَه، ولی شمَه بَمن قِبول نینَّکرد. اَگَم دیَیری اِشتَن نومینَه با، اَی قِبول بَکَرون. 44چِنتَرَ بَشارون ایمان وَردِ وَقتی کن یَندِکا شکوه و جلال قِبول بَکَرون، ولی اَ شکوه و جلالی دوملَه نیرون کن تاکَه خدا طَرَفیکا آ؟ 45فکر مَکَر اَزیمَه کن دَدَ وَریکا شمَه موتَّهم بَکَمَه؛ اَ کن بَشِمَه موتَّهم بَکَی، موسی اِ پَیغَمبَرَ، هَه کَسی کن چَی سَردِرِ اومید بَداشتیرون. 46اِمی خونه کن اَگَم موسی باور اَکَریرون، بَمن نی باور اَکَریرون، اِمی خاطر کن موسی چمن خونِه نِوشتَشَه. 47ولی اَگَم چَی نوشتَه اون باور نِدارَ، چِنتَه چمن گَفون باوَربَکَرون؟»
Zur Zeit ausgewählt:
یوحنا 5: CTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
