یوحنا 2
2
موعجیزَ وَییو اَوَریکا
1سومین روجیکا، قانا آوادیکا کن وِلَتِه جَلیلیکارَ وَییواَوَری بَه و عیسی نَنَه اَجگا کا بَه. 2عیسی و چَی شاگردِن نی وَییو اَوَریرا صَلا ژَشون بَه. 3وَقتی شراو تَمون آبَه، عیسی نَنَه بَی واتِشَه: «اَیِن دِ شَراو نیشونَه!» 4عیسی بَی واتِش: «اَی ژِن، اِم کاربَمن چه مَربوط؟ چمن وَقت هنوزَنی آرَستَه نیَه.»
5چَی نَنَه پاسَرینِش واتَه: «هر چی ایی بَه شمَه باتی، اَنجوم بدَرَ.» 6اَجگا کا شَش گِلَه سِنگَه خِم بَه کن یَهودیون مَذَبیکا چَوون آوینَه جیفینینَه چییون پاجا اَکَرینَه و هر خِمیکا صَدو بِست لِتر جِگا اَگِریهَ. 7عیسی پاسَرییِنِش واتَه: «اِم خِمون آوینَه پَتلَمَه آکَرَ.» پس اَیِنِ خِمون کوکوروپَتلَمه آکَردَ. 8عیسی اَیِنِش واتَه: «ایسَه تیکَلیی اَیکا پِگِرَ و مجلسی رَئیسی وَر ببَرَ.» اَیِن نی بَردِشون. 9مَجلسی رَئیس آوی کن شَراو آبه بَه چَشتِشَه. اَ نَزنیَه کن اِم شَراوی کِرَم جِگاکا وَردَشونَه، هَر چَنَه پاسَریِنی کن آوی پِراکنستَشون بَه، بَموستینهَ. مَجلسی رئیس بَگی خِلِه کَردِشَه 10و بَی واتِش: «گرد اَولیکا چاکَ شَراوینه پذیرایی بَکَنَه و وَقتی مِیمانِن مست آبین، اِرزونَه شَراوی بوعَردین؛ ولی تِه چاکَ شَراوی تا ایسَه غَم هَردَرَ!»
11اِنتَرَکِه عیسی اِشتَن اَوَلین نِشونَه و موعجیزَ قانای جَلیلیکا اَنجوم داشَه و اِشتَن شکوه و جَلالی آمونِستِش و چَی شاگِردِن بَی ایمان وَردِشونَه.
12چی بَه دوملَه اِشتَن نَنه و برا اِن و شاگردونَّ شهر کَفَرناحومیرا شَه، و چَند روجی اَجگا کا مَندینه.
عیسی مَعبدیکا
13یَهودیون پِسَخَه عید نِزِک بَه و عیسی شَهراورشلیمیرا شَه. 14معبدی سِراکا، ویندِشَه کن چَن نَفَر کاینَه گا و پَسُ کَفتِر خِرَتِه، و صرّافِن نی کاسِبیرا نِشتینَه. 15عیسی لافندیکا شَلاغی سِی آکَردِشَه و گردِ اَوون و چَوون پَسو گا اونَّ، معبدیکا بِرِن بَرکَردِش. و صرّافون سکَه زَمینی سَردِرِ ویکَردِش و چَوون تَختون ویگاردنِستِش، 16و کَفتِرَ خرشِنِش واتَه: «اِمون اِم جِگاکا بِرِن بِبَرَ و چمن دَدَ کَه، کاسِبیَه جِگا سِی آمَکَرَ!» 17چَی شاگردِن یاد آرَفَندشونه کن کیتاو مزامیریکا نِوشتَه آبَه یَه: «اِشتِه کَه خونِه غَیرَت بَمن بَسوتیَه.»
18پس یهودیِن عیساشون واتَه: «چه نِشونَه و موعجیزَایی اَمه آمونی تا بِزنَم اِنتَرَ کارون ایجازَ هِسترَ؟» 19عیسی چَون جَوابی داشَه: «اِم معبدی ویراوونَه کن اَز، سه روجیرا اَی هَنی سِی آمَکَرد.» 20یهودیِن واتِشون: «اِم معبدی سِی آکَردِ چلو شَش سال دَکَشیستَه، ایسَه تِه سه روجیکا اَی هَنی سِی آشَکَرد؟» 21ولی معبدی کن عیسی چَی خونِه گَف اَژَنیَه اِشتَن جَندَک بَه. 22پس هَنگومی کن عیسی مَردِ به دوملَه زندَ آبَه، چَی شاگردن چَی اِم گَفون یاد آرَفَندِشون، و موقدّسَه نِوِشتَه اون و اَ گَفی کن عیسی واتَش بَه ایمان وَردِشونَه.
23وقتی کن عیسی پِسخَه عیدی خونه اورشَلیمیکا بَه، خَیلییِن، نِشونَه اِن و موعجیزَ اِنی کن اَ اَنجوم اَدَریَه ویندشون و چَی نومینَه ایمان وَردشون 24ولی عیسی چَوون ایمانی اِیتماد نِداری، اِمی خونه کن گردی آرَزنی 25و نیازی نِبَ کَسی اینسانی خونه چَیرا شاهیدی بدَرِ، اِمی خونه کن اِشتَن بَموستی اینسانی دِلیکا چِه بَگِذَشتی.
Zur Zeit ausgewählt:
یوحنا 2: CTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
