رَسولون اَعمال 7
7
استیفانی گَفِن یهودی شورا نَ کا
1یالَه کاهِن استیفانیکا دَپَرسِستَه: «اِم گَفِن راستین؟»
2استیفان واتِش: «اَی بِرااِن و اَی دَدَاِن، چمن گَفون گوش آدَرَ! پورجلالَه خدا، زمانی کن چَمَه بابا ابراهیم پیغَمبر، بین النَهرینی منطقه کا اَمونیَه و هَنوزَنی حَرانیرا کوچِش کَردَ نِبَه، چَیرا اَیر آبَه 3و ابراهیمیش واتَه: “اِشتِه وِلَت و اِشتِه خیشون آهَرز، و وِلَتیرا کن اَز بَتِه آمونِم، بش.“
4«اَموقه ابراهیم ولَتِه کَلدانیانیکا بِرِن برمَه حَرانیکا مَندَ. ابراهیمی دَدَ مَردِ بَه دوملَه، خدا بَی اِم وِلَتیرا کن اُمروج اَیکا بَمَندیرون، کوچامنیشَه. 5اِم حالینه، خدا اِم جِگاکا حتی ویجَه ایی زَمین ابراهیمیش اِرث آنِداشَه؛ ولی وَعدَش دوعَه کن اَ زَمینی بَی و چَی بَه دوملَه چَی اودومی آرَدا، هَر چَنَه ابراهیمیرا اَموقه کا هَنوزَنی خِردَنی نِبَه. 6خدا ابراهیمیش واتَه: “اِشتِه اودوم غُربتَه وِلَتیکا خَلکی شیوار زندَگی بَکَی و چار صَد سال اَوون اسیر بکَن و چَوون سَر ظِلم بکنَه.“ 7ولی اَز اَ قامی کن اَیِن چَوون وَزییَرینَه موجازات بَکَم. خدا هنی واتِش: چَی بَه دوملَه، چمن قام اَ وِلَتیکا بَشیَه و بَمن اِم جِگاکا پرستش بَکَنَه.“ 8و خدا اِبراهیمیش سِنَت کَردِ عَهدی آداشَه. پس ایسحاق ابراهیمیرا دِنیا آمَه و وقتی کن ایسحاق هَشت روزَبَه اَشون سِنَت کردَ. و ایسحاق یعقوبی دَدَ بَه و یعقوب نی دانزَ پاتِریارخی دَدَ بَه یعنی چَمه دانزَ گِلَه یالَه بابا.
9«ولی پاتْریارْخِن زِرَ خونِه، یوسوفی مِصرییِنِشون خرتَه. ولی خدا یوسوفینَه دَرِ بَه 10و یوسوفیش گِردِ چَی غَرّونکا اَراخِمونیشَه، و بَی حیکمَت بَخشِستِش، فِرعونی چَمیکا خاجَتی آکَردِش، اَدَ کن یوسوفیش مِصری فَرمانروا و اِشتَن دَرباری رَئیس آکَردِشَه.
11«چَی به دوملَه یالَه قحطی و غَرّی مِصر و کَنعانیکا آمَه و چَمَه بابا اِن هَردِرا چی ایی پَیدا نِکَردِشون. 12ولی وَقتی چَمَه بابا یعقوب دَرَستِش کن مِصریکا گَندِم پَیدا بَبی، اَوَلین سفَریکا چَمَه بابا اِنِش اَجَگارا عَندِشَه. 13دِوومَه سَفَریکا، یوسوف بَشتَنِش اِشتَن برا اونرا آمونِستِش و فرعون، یوسوفی خانوادَ نَه آشنا آبَه. 14یوسوف اِشتَن دَدَ یعقوب و گِردِ اِشتَن خانوادَ کن گِرد هفتادو پِنج نَفَر بین، مِصریرا صَلا ژِشَه. 15یعقوب مِصریرا آمَه و هَه جِگاکا مردَ. هِم یعقوب و هِم چَمه بابا اِن؛ 16اَمّا چَوون مَیتون شهر شِکیمیرا ویگاردِنستِشون و تِربَه ایکا کن ابراهیم، تلکَه ایی نِقرَ نَه حَموری زوعَه اونکا خِریَش بَه، دَفِن کَردِشون.
17«ولی هنتَه کن خدا وَعدَ اَنجوم بِه وقت ابراهیمیرا نِزِک آرَبی، چَمَه قامی تیعداد مِصریکا ایضاف آرَبیَه، 18تا اِمکن دییَرَ پادیشاهی آمَه کن یوسوفی نِه آزنی. 19اَ پادیشا حیلَنه چَمَه قامینَه رفتار کَردِش و چَمه بابا اون سَر برکَه ظِلمِش کَردَ و اَوون دیم پِناشَه تا اِشتَن تَرَ خِردَنون بِرنیکا آهَرزِن تا زِندَ مَمونِن.
20«اِنتَرَ روزِگاریکا بَه کن موسا اِ پَیغمبر دِنیا آمَه و خدا نظَریکا برکَه خاصَه خردَنی بَه. موسی سِه ماه اِشتَن دَدَ کَکا یال آبَه. 21وَقتی موساشون بِرنیکا آهَشتَه، فِرعونی کِلَه اَی پِگَتِشَه و بَش قِبول کردَ و هِنتَه اِشتَن خِردَنی شیوار یال آکَردِش. 22اِنتَرَکِه موسی مِصریون گِردِ حیکمَتی آموتِش و گَف ژِ کا و کرداریکا قودور آبَه.
23«وَقتی کن موسی چِل سالَه آبَه، چَی دلیکا دگِنِستَه کن اِشتَن برااون، یعنی یعقوبی اودومی حال و اوضاع بوینِه. 24وَقتی ویندِشَه مِصریَه مِردی ایلَه چَی برا اون سَریکا ظِلم بَکَی، چَی پِشت برمَه و اَ مِصریَه مِردیش کِشتَه واَ مظلومی حَقّی ویگَتِش. 25موسی گَمون اَکَریَه چَی بِرااِن سَر آگِنِن کن خدا اَپیشَه چَی بالینَه اَوون بَروازونِه، ولی اَیِن سَر آنِه گِنین. 26سَو سَه، موسی دِ نَفَری گِنَه کن ژِژِ اَکَرین، چَوون آشتی دوعِه نِیَّتینَه واتِش: اَی مِردِن، شِمَه یندِنَه برا ایرون، چیرا یِندِ سَر بدی بَکَرون؟ “
27«ولی اَ مِردی کن اِشتَن خَمسوعَه سَر بدی اَکَریَه، موساش تِم آدوعَه و واتِش: “کی بَتِه چَمَه حاکیم و داوَر آکَردَشَه؟ 28اَپیرَ بَمن نی بِکشی، هَته کن ایزِر اَ مِصریَه آدَمی کِشتِرَ؟ “ 29وَقتی موسی اِمی دَرَستِش، ویریتَه و مِدیانی وِلَتیرا اَ جِگاکا غریب مَندَ و دِ زوعَه صاحیب آبَه.
30«چِل سال گِذَشتَه. ایی روج وَیاوونی دِلَه، کوه سینا نِزِکیکا، ایلَه فرشتَه آرا گَتَه چِغیکا موسی را اَیر آبَه. 31وقتی موسی اَش ویندَ، چَی ویندِ خونِه حَیرون آبَه. وَقتی نَ را شَه تا نِزِک تَر دَیَسِه، خداوندی سَس چَیرا آمَه کن اَواجیَه: 32”اَزیمَه، اِشتِه بابا اون خدا، ابراهیم وایسحاق و یعقوبی خدا.“ موسی جَندَک تَرسیرا لَرزِستَه و دَیَشتِه جورئَتی نِداری.
33«خداوند بَی واتِش: “اِشتِه پاغَبی آوَج، چون جِگایی کن چَی سَریکا پا مَندیشَه موقدسَه زَمینَه. 34یقین بزون کن اَز اِشتَن قامی موصیبتی مِصریکا ویندَمَه و چَوون نالِستِه دَرَستَمَه، و بِنیرا آمَه ایمَه تا اَوون نیجات بدَرم. ایسَه بِه تا بَتِه مِصریرا بَینِم.
35«هِم موسی کن چَمَه قام بَشون رَد کردَ و واتِشون: “کی بَتِه چَمَه حاکیم و داوَر آکردشَه؟ خدا، اَ فرشتَه کن آرا گَتَه چِغیکا چَیرا اَیر آبَه بَه واسیطَنه، هِم مِردی عَندَش بَه تا چَوون حاکیم و نیجات اَدَر ببو. 36هِم موسی بَه کن مِصریکا و سِرَ دَیرا وَریکا و وَیاوونی دلَکا چِل سال مُعجیزَاِن و نِشونَه اون چَوونرا اَنجوم داشَه و چَمَه قامی مِصریکاش بِرِن بَروَردَ.
37«هِم موسی، یعقوبی اودومیش واتَه: “خدا شِمَه بِرااون دِلَکا، چمن شیوارَ پَیغمبری شِمَرا رَونَه بکَیَه. 38اِم هَه موسی اَ کن وَیاوونیکا جَماعَتینَه دَرِ بَه. و اَ فرشتَه اینَه کن کوه سیناکا بَینَه گَف ژِشه همراه، و هِم چَمَه بابا اون همراه بَه. موسی، زندَگی بخشَه کَلامیش ویگَتَه تا چَمَرا آراسِنِه.
39«ولی چَمَه بابا اِن موسی کاشون ایطاعَت نِکردَ و بَی رَد کَردِشون و اِشتَن دِلیکا اَپیشون بَه مِصریرا ویگَردِن. 40اَیِن هارونیشون واتَه: ”چَمَرا چِن گِلَه خدا سِی آکَه تا چَمَه ناردَکَر بِشون، اِمی خونه کن نِزنَم اِم موسی سَردِرِ کن اَمَش مِصری وِلَتیکا بِرِن بَروَردَشَه، چِه آمَه یَه! “ 41اَ روجونکا بَه، کن موندَ شیوار بوتی سِی آکَردِشون و چَیرا قِربونی آداشون و اِشتَن بالینَه سِی آکَردَ چیی خونه، جَشنِشون گَتَه. 42ولی خدا اَیِنِش پِشت آکَردَ و اَیَنِش اِشتَن حالیکا آهَشتِشَه تا آستامونی آختاو و مانگ و اِسترَ اون پَرَستِش بِکَرِن؛ هَتَه کن پَیغمبَرون کیتاویکا نوشتَه آبیَه:
«”اَی یعقوبی نَتاج، مَگَم اَ چِل سالی کن وَیاوونیکا بیرون،
مِرا سَر آبیردَ مال و قِربونی وَردِرون؟
43شِمَه مُلوکی بوتی و رِفانی بوتی اَوالَه دَوراشتِرون.
اِم بوتِن، کن شمَه پَرَستِشیرا اَیِنِرون سِی آکَردَ.
و اَز بَشِمَه بابِلی اَوَریرا تَبعید بَکَمَه.“
44«چَمَه بابا اِن، شَهادَتی اَوالَه نی اِشتَنَه وَیاوونیکا دارین، هَه اَوالَه ایی کن موسی خدا فِرمونینَه، هنته نِمونَه ایی شیوار کن ویندَش بَه، سِی آکَردِش. 45چَمَه بابااِن اَ موقه کن یوشَع رَهبَر بَه، کَنعانی وِلَتی اَ آدَمِنی کن خدا چَمَه بابا اون چَمی نَ کا بِرِن برکَردَش بَه ویگَتِشون، و شهادَتی اَوالَه اِشتَنَه وردِشون و اَ اَوالَه تا داوود پادیشا موقه اَجِگاکا مندَ. 46خدا داوود پادیشاش لطف کردِش و اَ اَپیش بَه کن ایلَه کَه یعقوبی خِدارا سِی آکَرِ. 47ولی سِلِیمان پادیشا بَه کن خِدارا ایلَه کَه سِی آکَردِش.
48«هر چَنَه کن خدای موتعال، کَه اِنی کا کن اینسانی بالینَه سِی آبَه ببو نیَمَندِن، هَتَه کن اِشعَیای پَیغمبَر واتِشَه کن:
49«”خداوند باتی:
«آستامون چمن پادیشاهیی تَختَه و زَمین چمن لِنگی بَنی کَتلَه!
چِه کَه ایی مِرا سِی آکَرَ؟
و چمن ایستراحتَه جگا کِرَم جِگاکارَ؟
50مَگَم چمن بالینَه گِردِ اِمون سِی آکَردَم نیَه؟“
51«اَی یاقی اِن، اَی کَسِنی کن شِمَه گوشِن و دِلِن سِنَت آبَه نیَه! شِمَه نی هنته شَمَه بابااون شیوار اوزون خدا موقدسَه روح زِرَبَرا چَی نَکا مُقاوِمت بَکَرون. 52کِرَم پَیغمبَر کن شِمَه بابااون بالیکا اَیذَت آزار ویندَش مَبو؟ اَیِن حتی پَیغمبَرِنی کن اَ صالِحَه مِردی آمِشون پیشگویی کَردَ بَه، کِشتِشون؛ و ایسَه شِمَه اَ صالِحه مِردی تسلیمِرون کردَ و چَی قاتل آبیرون، 53شِمَه ایی کن، شَریعَتی کن فرشتَه اون واسیطَنَه شِمَرا آرستَه، قِبولِرون کردَ، ولی بَیکا ایطاعَت نینَّکرد.»
استیفانی سِنگ سار کردِ
54شورا آدَمِن وقتی اِم گَفِنِشون درَستَه، بَرک آسرَنگِستین و گازَ کِرچینِه اَکَرین. 55ولی استیفان خدا موقَدَسه روح کا پَتلمَه آستامونی دَیَشتِش، خدا شکوه وجَلالی و عیسی کن خدا راستَه بالی وَریکا پا مَند بَه ویندِش. 56استیفان واتِش: «هِم ایسَه آستامونون آج آبَه کام ویندِ و اینسانی زوعَه کن خدا راستَه بالی وَریکا پامَندَ.»
57ولی اَیِن اِشتَن گوشِنِشون گتَه، جِکَّلَه ایی ژِشونَه و گِرد استیفانی طَرَف هِژما بَردِشون، 58و بَی دَراکِن دَراکِن شَهریکا بِرِن بَردِشون و سِنگ سار کَردِشون. اَیِنی کن شاهید بین، اِشتَن شِندِرِنِشون بَروَردَ و ایلَه جَوانَه مِردی لِنگون وَر کن چَی نوم سولُس بَه آناشون.
59وَقتی کن اِستیفانی سِنگ سار اَکَرینَه، اَ تَتَه لَسَّنه واتِش: «اَی عیسای خداوند، چمن روح قِبول اَکَن!» 60چَی بَه دوملَه زِنگ ژِشَه و تَتَه لَسَّنه سَس آداشَه کن: «خِداوَندا، اِم گِناخی چَوون مِل دَمَفَن.» اِمیش واتَه و مردَ.
Zur Zeit ausgewählt:
رَسولون اَعمال 7: CTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
