مَتّی 9

شِفا پیا فِلج

1اَسَه عیسی سُوار قائِق بی ئو چی اِرَه شیَر ووژ، اِ اَکو دریاچَه.

2اَسَه پیا فِلَجونی گه حیوَتوئی اَرسر نالی، آوِرد اِرَه تک. عیسی وخدی ایمو اونَل دیتی وِتیَ پیا فِلَجِهَه: «دلِ‌دَرینِت داشدوئی رولَه، گنائَلِت بَشخیان!» 3هَرِ ایی حِنَ، بِری اژ مَلِمَل تورات وَه لا ووژونا وِتو: «ایی پیا کِفِرَ موشی.» 4عیسی گه فگِرَل اونِلَ مَذِناسدی وِتی‌ئونو: «اَرِه‌چَه فگِرَل گَنَ مارینون اِنوم دل ووژتو؟ 5وِتِن کُمینو آسُتِرَ: یَگه ”گنائَلِت بَشخیان،“ یاگَه ”هیزگِر بِچُ اَرئیا“؟ 6مِنتائای اَرِیَگه بِذانینو کُر اِنسو اَررُی زَمی قدِرت‌واختیار دیری گه گنائَل بوئَشخِنی» -عیسی وِتیَ فِلَجِهَه:- «هیزگِر، جِل‌ِجات هیزدَ ئو بِچُ اَرِه مال.» 7اَ پیا هیزگِرتی ئو چی اِرَه مال. 8وخدی مردِم یِئونَ دی، زِلَئو چی ئو خدائونی جِلال دا گه هُنَ قدِرت‌واختیاری داسیَ اِنسو.

دَوَت اژ مَتّی

9وخدی گه عیسی داشدی اژ اورَه ردَ موئیا، پیای دیتی مَتّی نُم گه نیشتوئی اِنوم دکَه خِراجگیری. وِتون: «بورَ تُرّ مِنا!» مَتّی هیزگِرتی ئو چیَ تُرّ اوآ.

10حِنی گه عیسی اِنوم مال مَتّی نیشتوئیَ اَرسر سِفِرَه، خِراجگیرَل ئو گناکارَل فِرِه هاتِن ئو بینَ هُم‌سِفِرَه عیسی ئو شاگردَلی. 11وخدی شیخَل فرقَه فَریسی یِئونَ دی، وِتونَ شاگردَل او: «اَرِه‌چَه استاد هُمَه وَه‌گَرد خِراجگیرَل ئو گناکارَل نونَ میری؟» 12وخدی عیسی یَه شنَفتی، وِتی: «مریضَلِن گه حکیمونَ مِ، نه آمَل آزا. 13بِچِن ئو میَنا ایی کلومَ بفیَمِن گه: ”ریَممَ مِ نه قُرونی.“ اَرِیَگه مِه نِهاتِمَ تاگَه آمَل صالح دَنگ کَم، بلکِم هاتِمَ تاگَه گناکارَل دَوَت کَم.»

سؤال اِبارَه روژی

14اَسَه شاگردَل یحیی هاتِن اِرَه تک عیسی ئو وِتو: «اَرِه‌چَه ایمَه ئو فَریسیَل روژیَ مَگِریم، مِنتائای شاگردَل تو روژی نِمَگِرِن؟» 15عیسی جوواوُنا داتی وِتی: «مَر ماو مِمونَل داوات تا زمونی گه ذُما ها گَردو، عازیَتی بوئن؟ مِنتائای روژَلی مای گه ذُمائون اَژینَ مَسینِن، اَ موقَع، روژیَ مَگِرِن. 16هُیچ کس پارچَه نوو پَرو نِمِهِه اَر قِ جِنِک کُینَه، اَرِیَگه اَوَه گه پَروئو کِردیَ اژ جِنِک جیاآ ماو ئو گَنتِرَ میَری. 17ئو هَمیش شِراو نوو نِمَرِشِنِن اِنوم مَشگَل کُینَه، اَرِیَگه مَشگِلَ مَتوقِن ئو شِراوَ مَرِشی‌اِرا ئو مَشگَل اژ بِنَ مَچِن. شِراو نووءَ مَرِشِنِن اِنوم مَشگَل نوو تاگَه هَردِک آزا بِمینِن.»

زِنیا کِردِن یِه دِت ئو شِفا یِه ژَن

18حِنی گه عیسی ایی قصه‌لَ اَرِه اُوُنَ موئِتی، یَکی اژ رِئیسَل عَبادتگا یهود هاتی اِرَه تک ئو زُنی دا اَر وَر ئو وِتی: «دِتِم هَراِسگَه مِرد. وَه ایی حالا بوری ئو دس ووژِت بِنتی اَرسر، گه زِنیا ماو.» 19عیسی هیزگِرتی وَه‌گَرد شاگردَل ووژ چِتیَ گَرد. 20هَرِ اَ حِنَ، ژَنی گه دوازَه سال بی خوین قائده‌ی آنِموسیاتی، اژ پِشت سر نزیکا بی اَر عیسی ئو دس نا اَر پر چوخای. 21او وَه وَر ووژا وِتوئیتی: «اَرّ جُ‌جُ دَسِم بیری اَر پر چوخای، شِفاءَ مَگِرِم.» 22عیسی کِلاداتیِ دُما، او دیتی، وِتی: «اِاِ دِتِم، دلِ‌دَرینِت داشدوئی، ایمونِت شِفات داسی.» اژ اَ ساتَ، ژِنَهَه شِفا گِرتی. 23وخدی گه عیسی هات اِنوم مال اَ رِئیس عَبادتگاآ ئو بِری دیتی گه مُووَئونَ ماوِرد ئو شوینونَ مَهَرد، 24وِتی: «بِچِنَ دِریر. دِتَهَه نَمِردیَ بلکِم ها خاواِر.» مِنتائای اونَل خَنینی‌ئون. 25وخدی جیَمیَتِهَه‌ئو کِردَ دِریر، عیسی چی اِنوم ئو دس دِتَهَه گِرتی ئو او هیزگِرتی. 26خَوَر ایی گپَ اِ سِرُسَر اَ هیالَ پَشخا بی.

شِفا دو کور ئو یِه لال

27حِنی گه عیسی اژ اورَه کِلَ موئیا، دو پیا کور چِنَ تُرّ اوآ، مَقارونو: «اِاِ کُر داوودِ پاتِشا، ریَم کَ اَر ایمَه!» 28وخدی عیسی هات اِنوم مال، اَ دو پیا هاتِنی اِرَه تک. عیسی پِرسیتی اَژینو: «آیا ایمو دیرینو گه مِنَ مَتونِم ایی کارَ اَنجوم دَم؟» جوواوُ دا: «اَاَ، آقا!» 29اِسَه عیسی دس نا اَرسر چیَمَلونا ئو وِتی: «مِطابق ایمونتو، اَرِنتو بو.» 30اَسَه چیَمَلو واز بی. عیسی سخد هُشتار دانی‌ئون: «حُواستو بو کس اژ ایی گپَ باخَوَرا ناو.» 31مِنتائای اونَل چِنَ دِریر، ئو خَوَر کارَل عیسی‌ئو پَشخا کِرد اِنوم کُل اَ هیالَ.

32هَراَ موقَع گه اُوُنَ مَچیانَ دِریر، پیا مِلاکَت‌داری گه لال بیو، آوِرد اِرَه تک عیسی. 33وخدی عیسی مِلاکَتِهَه اژ او کِردیَ دِریر، زوئو اَ پیا لالَ واز بی. مردِم واقونِ دَم پَروئی ئو موئِتو: «کس هرگِس هُنَ چیئی اِنوم اسرائیل نِئیَسی!» 34مِنتائای شیخَل فرقَه فَریسی وِتو: «او وَه یاری رِئیس مِلاکَتَل، مِلاکَتِلَ مِهِئَه دِریر.»

ثمر فِرِهءَ کارگر کَم

35عیسی اِنوم کُل شیَرَل ئو آبادیِلَ مَگیردیا، اِنوم عَبادتگائَل اونَل تیَلیمَ ماتی ئو خَوَر خَوش پاتِشائی خدا اِلومَ مَهَردی ئو هر ژُن ئو مِرَضی شِفا ماتی. 36وخدی جیَمیَت فِرِه دیتی، دل سُتی اَرِنو، اَرِیَگه چُی کاوِرَل بی‌شوئو، پریشون ئو آس بین. 37اَسَه وِتیَ شاگردَلی: «ثمر فِرِهءَ، مِنتائای کارگر کمَ. 38اِسَه، اژ صائای ثمرتو بِ کارگرَلی اَرِه درو ثمر ووژ کِل‌کِ.»

Zur Zeit ausgewählt:

مَتّی 9: LBT

Markierung

Kopieren