مَتّی 15
15
هَمیَت پاکی باطن
1اَسَه بِری اژ شیخَل فرقَه فَریسی ئو مَلِمَل تورات اژ شیَر اورشلیم هاتن اِرَه تک عیسی ئو وِتو: 2«اَرِه‌چَه شاگردَلِت رسمِ‌رِسیم شیخَل ایمَه مَنِنِ ژیر پا؟ اونَل وِر اژ خوراک هُاردِن دَسَل ووژو نِمَشورِن!» 3عیسی جوواوا داتی: «اَرِه‌چَه هُمَه وَه خاطر رسمِ‌رِسیم ووژتو، حکِم خدا مَنینونِ ژیر پا؟ 4اَرِیَگه خدا وِتیَسی: ”عزّت بِن اَر باوَه ئو دا ووژِت“ ئو ”هر کی دُشمین بیَ باوَه یاگَه دا ووژ، باس بِکُشِری.“ 5مِنتائای هُمَه موشینو اَرّ کسی بوشیَ باوَه یاگَه دا ووژ: ”هر یاری‌ای گه اژ مِنَ مَرَسیاءَ هُمَه، وَخمِ خداءَ،“ 6اُهُنَ دیَر اَری واجب نیِ گه عزّت بِنی اَر باوَه ووژ. وَه ایی جورَ هُمَه وَه خاطر رسمِ‌رِسیم ووژتو، کلوم خدا باطلَ مِهِینو. 7اِاِ ریاکارَل! اِشعیا پِخَمَر اِبارَه هُمَه چَنی خو پیشگوئی کِردی، اَسَه گه وِتی:
8«ایی قومَ وَه زوئونونا قُرپَ ماوژِن اَر مِه،
مِنتائای دِلو اژ مِه دویرَ.
9اونَل بیخود مِنَ مَپِرَسِن،
ئو تیَلیمو چیئی بِخِر اژ حکمَل بشری نیَ»
10اَسَه اَ جیَمیَتَ هِنا کِردی اِرَه تک ووژ، وِتی: «گوش بِگِرِن ئو بفیَمِن. 11اَ چیئَه گه مَچوءِ دَم آم‌اِرا، نِجس نِمِهِیتی، بلکِم اَ چیئَه گه اژ دَم اِرَمایتی، اَوَه‌‌سَ گه آم نِجسَ مِهِه.» 12اَسَه شاگردَل هاتن اِرَه تک عیسی ئو وِتو: «آیا مَذانین گه ایی قصَه تونَ زور اَر وَر فَریسیَل داشدیِ؟» 13عیسی جوواوا داتی: «هر تویلی گه باوَه آسمونی مِه کِشت نَهَردوئیتی، اژ ریشی اِرَمای. 14اونِلَ بِیلِنَ حال ووژونا. اونَل رَنِمائَل کوری کِن. اَرّ کوری بوءَ موزبِرَه‌کیش کوری‌تِر، هَردِکَ مَکُوئِنِ چا.» 15پطرس وِتی: «میَنا ایی مَتَلمون اَرِه بوش.» 16عیسی جوواو داتی: «یانی هُمِه‌یش هَنی درک نِمِهِینو؟ 17مَر نِمَذانینو گه هر چیئی گه مَچوءَ دَمت‌اِرا، مَچو اِنوم لَمِت ئو دُماخِرِ مِئَه دِریر؟ 18مِنتائای اَ چیئَه گه اژ دَمَ ماءَ دِریر، اژ دل اِرَمای، ئو یَسَ اَ چیئَه گه آم نِجسَ مِهِه. 19اَرِیَگه اژ دلَ گه فگِرَل گَن، آم کُشتِن، زِنها، بی‌عصمتی، دُزی، شاتی دِرو ئو بُختِم اِرَمای. 20یوئنَنَ گه آم نِجسَ مِهِه، نه خوراک هُاردِنَ دس نَشوریا!»
ایمو ژَن کنعانی
21عیسی اژ اورَه چی ئو لا گِرتی اَر هیال صور ئو صِیدون. 22یِه روژ ژَن کنعانی‌ای اژ مردِم اورَه، هاتی اَرِه تک ئو قارونی: «اِاِ آقا، اِاِ کُر داوود، ریَم کَ اَر مِه! مِلاکَتی دِتِهَه‌م سخد گِرتیَس‌اِرا.» 23مِنتائای عیسی هُیچ جوواویا ناتی، شاگردَل تَکو داءِ وَر ئو خواهشدون اَژی کِرد، وِتو: «او مِرخص کَ، اَرِیَگه وَه قارَه‌قارَ ماءَ تُرّ ایمَه‌آ.» 24عیسی جوواوا داتی: «مِه فَخَد کِل‌بیمَس اَرِه کاوِرَل گُم‌بیئی قوم اسرائیل.» 25مِنتائای اَ ژِنَ هات، زُنی دا اَر وَر او ئو وِتی: «اِاِ آقا، یاریِم دَ!» 26عیسی جوواوا داتی: «دُریس نیَ گه نون آیلَل بِسینین ئو باوژینِ وَر سگَل.» 27ژِنَهَه وِتی: «اَاَ، اِاِ آقا، وَه ایی حالا جُ‌جُ سگَل‌یش اژ حُیردَه نونَلی گه اژ دُما سِفِرَه صائایَلون اِرامَکُوءِ، میرِن!» 28اَسَه عیسی وِتون: «اِاِ ژَن، ایمو تو فِرِهءَ! هُنَ گه مِت اَرِنِت بو!» ئو جاوارجا دِتِهِه شِفا گِرتی.
خوراک دائنَ چوار هزار نفر
29عیسی اژ اورَه کَتِ رئی ئو چیِ لو دریاچَه جلیل، قِری اژ کوی چیِ رُ ئو نیشت اَر اورَه. 30جیَمیَت فِرِه هاتِنی اِرَه تک ئو شَلَل ئو کورَل ئو فِلجَل ئو لالَل ئو مریضَل‌ِتِرو آوِردَ گَرد ووژو، نانون اَر وَر پال عیسی ئو او شِفا دانی. 31مردِم وخدی دییو گه لالَل قصَه مَهَن، فِلجَل آزاآ موئن، شلَلَ مَچِنَ رئیا ئو کورِلَ موئینِن، بِلُجوئیو هات ئو خدا اسرائیلو جِلال دا. 32عیسی هِنا کِردیِ شاگردَل ووژ ئو وِتی: «دلم اَرِه ایی جیَمیَتَ مَسُزی، اَرِیَگه یَه سه روژَ هانَ گَرد مِه ئو چیئی اَرِه هُاردِن نِرِن. نِمِم وَه وِرسِنی رِئو کَم گه ناخواد اِنوم رئی اژ حال بِچِن.» 33شاگردَلی وِتو: «اِ هُنَ جا چَفتی، اژ کوءَ مَتونیم نونی گه بِر بِهِه اَرِه سیر کِردِن هُنَ جیَمیَت کَلِنگی، گیر باریم؟» 34عیسی پِرسیتی: «چَن گِلَه نُو دیرینو؟» وِتو: «هفت نون ئو چَن گِلَه مای گُجَر.» 35عیسی وِتیَ مردِم تاگَه بِنیشِن اَر زَمی. 36اَسَه هفت گِلَه نونِهَه ئو مایِلِهَه گِرتی ئو دُما شگِر کِردِن، کُت کِردِنی، داءَ شاگردَل ووژ ئو اُوُن‌یش دائونَ اَ جیَمیَتَ. 37اونَل کُل هُاردون ئو سیرا بین ئو شاگردَل هفت سَلَه پِرون اژ حُیردَه نونَلی گه مَنوئیا جیَم دا. 38اونَلی گه هُاردو، بِخِر اژ ژِنَل ئو آیلَل، چوار هزار پیا بین. 39دُما یَگه عیسی مردِم مِرخص کِردی، سُوار قائِقا بی ئو چی اِرَه هیال مَجَدان.
Zur Zeit ausgewählt:
مَتّی 15: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
