مَتّی 13

متل کشاورز

1هَراَ روژَ، عیسی اژ مال اِرهات ئو نیشت اَر لو دریاچَه. 2مِنتائای جیَمیَت فِرِه اژ مردِم دورو گِرت، جوری گه سُوار قائِقی بی ئو نیشت، ئو کُل مردِم هوسیائین اَر لو آو. 3اَسَه وَه متلَل، فِرَه چیئَل اَرِه تیَریف کِردِنی. وِتی: «یِه روژ کشاورزی چیَ دِریر تُئم باوژی. 4وخدی تُئمَ ماوشدی، قِری کَتِن اِنوم رئی ئو مَلَل هاتِن ئو هُاردِنو. 5قِری‌تِر کَتِن اِنوم زَمی گُلور گه فِرَه خاک ناآشدی ئو اِسَه زوی سُزو کِرد، اَرِیَگه خاک کم بیتی. 6وخدی هویَر داتی، سُتِن ئو اَرِیَگه ریشیو ناآشد، حُشگا بین. 7قِری کَتِن اِنوم دِرِکو، دِرِکِلَهَه کَلِنگا بین ئو اونَلو خفَه کِرد. 8مِنتائای تُئمَلی گه مَنوئین کَتِن اِنوم زَمی خو ئو ثمرو دا: قِری صد بِرُوَر، قِری شص ئو قِری سی بِرُوَر. 9هر کی گوش اَرِه شِنَفتِن دیری، بشتوئی.»

10اَسَه شاگردَل هاتِنی اَرِه تک، پِرسیو: «اَرِه‌چَه وَه متلَ گَرد ایی مردِمَ قصَه مِهِین؟» 11جوواوا دانی: «فیَم رازَل پاتِشائی آسمونو داسَ هُمَه، مِنتائای نه وَه اونَل. 12اَرِیَگه وَه اَوَه گه دیری، ویشتِرَ میَن تاگَه چَل‌چَل داشدوئیتی، ئو اَوَه گه نِری، اَویشَ گه دیری مَسینِنی اَژی. 13اَژونَسَ وَه مَتَلا قصه‌ئونَ گَردَ مَهَم، اَرِیَگه:

«سِیلَ مَهَن، مِنتائای نِموئینِن؛

گوشَ مَگِرِن، مِنتائای نِمَشتوئِن،

ئو هَمیش نِمَفیَمِن.

14پیشگوئی اِشعیا پِخَمَر اِبارَه اونَل اَنجومَ مَگِری گه موشی:

«”وَه گوش ووژتونا مَشتوئینو،

مِنتائای هرگِس نِمَفیَمینو؛

وَه چیَم ووژتونا موئینینو،

مِنتائای هرگِس درک نِمِهِینو.

15اَرِیَگه دل ایی قومَ بیَسَ بَرد،

گوشَلو سنگینا بیَ،

ئو چیَمَل ووژونا بَسدونَ،

تاناخواد وَه چیَمَلونا بوئینِن،

ئو وَه گوشَلونا بشتوئِن

ئو اِنوم دلَل ووژونا بفیَمِن

ئو گِلابیرِنِ دُما ئو مِه شِفائو دَم.“

16مِنتائای خَوزگالَ چیَمَل هُمَه گه موئینِن ئو گوشَلتو گه مَشتوئِن. 17حخیختاً، موشِم‌ئونتو، فِرَه کسَل اژ پِخَمَرَل ئو آمَل صالح آواخدو داشد اَ چیئَه گه هُمَه موئینینو، بوئینِن ئو نِئیو، ئو اَ چیئَه گه هُمَه مَشتوئینو، بشتوئِن ئو نَشتَفتو.

18«اِسَه هُمَه میَنا متل کشاورز بشتوئِن: 19وخدی گه کسی کلوم پاتِشائی آسمونَ مَشتوئی مِنتائای میَنا نِمَفیَمتی، اَ شریرَ مای ئو اَ چیئَه گه اِنوم دل او کِشت بیَ، مَراقِنی‌اِر. یَه هَراَ تُئمَسَ گه کَت اِنوم رئی. 20مِنتائای تُئمی گه کَت اِنوم زَمی گُلور کسی کَ گه کلوم خداءَ مَشتوئی ئو هِرازِه وَه خَوشیا مَچوتیِ گِرد، 21مِنتائای اَرِیَگه اِنوم ووژ ریشی نِری، فَخَد مِدت کمی طاخَتَ ماری. وخدی گه وَه خاطر کلوم خدا، بِکُوءِ اِنوم سخدی ئو عذاو، هِرازِه اژ ایمونَ مَکُوءِ. 22تُئمی گه کَت اِنوم دِرِکو، کسی کَ گه کلوم خداءَ مَشتوئی، مِنتائای دلِ‌هولی اَرِه ایی دنیا ئو فنی گه مالِ‌منالَ اِنسونَ مِ، اَ کلومَ خَفه مِهِه ئو بی‌ثمرَ مِهِیتی. 23مِنتائای تُئمی گه کِشت بی اِنوم زَمی خو کسی کَ گه کلوم خداءَ مَشتوئی ئو مَفیَمِتی. او حخیختاً نیشتیَسَ بار ئو صد، شص، یاگَه سی بِرُوَر ثمرَ ماری.»

متل گیا

24عیسی متلی‌تِریش اَرِه وِتِنی: «پاتِشائی آسمو چُی پیای کَ گه تُئم خو کاریتی اِنوم زَمی ووژ. 25مِنتائای وخدی گه کارگرَل حیوَتوئینی، دشمن هاتی ئو گیا کاریتی اِنوم گَنِمَل ئو چی. 26وخدی گَنِمَل سُزو کِرد ئو حوشِه‌ئو دا، گیالِهِ‌یش سُزو کِرد. 27خُلُمَل صائای‌مال چِنی اَرِه تک ئو وِتو: ”آقا، مَر تو تُئم خوئِت نکاری اِنوم زمینِهَت؟ ایلَهَه گیا اژ کو هات؟“ 28جوواوا دانی: ”یَه کار دشمنَ.“ خُلُمَل اَژینو پِرسی: ”آیا مِت بِچیم ئو آلائو کِیم؟“ 29وِتی: ”نه! اَرّ بِتو گیالِهَه آلا کِینو، هایتِر گَنِمَل‌یشَ گَرد اونَل اژ ریشی اِربارینو. 30بِیلِن هَردِک تا مُسِم دِرو سُز کَن. اَسَه موشِمَ دِروکِرَل تاگَه اول‌بار گیالِهَه جیَم دَن ئو اَرِه سِزونِن بافَه کَن، اَسَه گَنِمَل گِردا کَن بارِن اِنوم اَمار مِه.“»

متل دُ خردل ئو متل حمیرتُرش

31عیسی متلی‌تِر اَرِه آوِردِنی: «پاتِشائی آسمو چُی دُ خردلی کَ گه یَکی گِرت ئو کاریتی اِنوم زَمی ووژ. 32وَه‌یاآگه دُ خردل اژ کُل دُنل گُجَرتِرَ، مِنتائای وخدی سُزَ مِهِه اژ کُل گیال باخ کَلِنگتِرا ماو، ئو ماوَ داری گه مَلَل آسمونَ مان اِنوم پَلَلی، لونَه مَهَن.» 33اَسَه عیسی متلی‌تِر اَرِه آوِردِنی، وِتی: «پاتِشائی آسمو چُی حمیرتُرشی کَ گه ژَنی هیزدا وَه‌گَرد سه کیسَه آرد دا یَک‌اِرا تاگَه کُل حمیر اِربای.»

34عیسی کُل ایی چیئِلَ وَه مَتَلا اَرِه مردِم تیَریف کِردی ئو بِخِر اژ متل هُیچئون نوئتِنی. 35یَه اتفاق کَت تا کلوم پِخَمَر اَنجوم بِگِری گه وِتوئیتی:

«دَم ووژمَ مَتَلا وازَ مَهَم،

ئو اَ چیئَه گه اژ بِنیا دنیا،

پنهو مَنیَ موشِم.»

میَنا متل گیا

36اَسَه عیسی جیَمیَتِهَه وِل کِردی ئو چی اِنوم مالا، ئو شاگردَلی هاتِنی اِرَه تک ئو وِتو: «میَنا متل گیال زمینمون اَرِه بوش.» 37او جوواو داتی: «کسی گه تُئم خوءَ مَکاری اِنوم زَمی، کُر اِنسونَ. 38زَمی، ایی دنیاسَ؛ ئو تُئم خو، آیلَل پاتِشائی آسمونِن. گیال، آیلَل اَ شریرِنَ؛ 39ئو دشمنی گه اونِلَ مَکاری هَراَ ابلیسَ‌سَ. مُسِم دِرو، آخِر ایی زمونَه‌سَ؛ ئو دِروکِرَل، فریشدَه‌لِن. 40هَراَ جورَ گه گیال آلاءَ مَهَن ئو اِنوم آگِرَ مَسُزِنِن، اِ آخِر ایی زمونه‌یشَ هُنَ ماوَ. 41کُر اِنسو فریشدَه‌ل ووژ کِلَ‌مِهِه ئو اونَل هر چی گه باعث گناءَ ماو ئو هَمیش کُل گَنَ‌کارَل اژ پاتِشائی او جیَمَ میَن، 42ئو اونِلَ ماوژِن اِنوم کویرَه آگِر، جای گه گیری ئو دِنوریچَه هَس. 43اَسَه آمَل صالح اِنوم پاتِشائی باوَه آسمونی ووژو، چُی هویَر بِریقَه‌ئونَ مای. هر کی گوش اَرِه شِنَفتِن دیری، بشتوئی.

متل گنج پنهو

44«پاتِشائی آسمو هر گا گنجی کَ گه اِنوم دل زَمی پنهونَ ئو یَکی مِهِیتیَ دی، اِدوارَه مَشارِتیا ئو اژ خَوشیَ مَچو ئو هرچی گه دیری، مَفِروشی ئو اَ زمینَ مَخِری.

45«هَمیش پاتِشائی آسمو هر گا تاجری کَ گه ها دُم مِرواریَل گِروخیمَتا. 46ئو حِنی گه مِرواری گِروخیمتی مِهِئَه دی، مَچو ئو هرچی گه دیری، مَفِروشی ئو اَ مِرواریَ مَخِری.

متل تور مایگیری

47«ئو اِدوارَه پاتِشائی آسمو هر گا توری کَ گه ماوژِن اِنوم دریا ئو کُلِ جور مای مَکُوئِتی اِنوم. 48وخدی گه تورِهَه پِرا ماو، مَکیشِنیِ حشگی. اَسَه مَنیشِن ئو خوئِلِهَه جیَمَ میَن اِنوم سَلَه، مِنتائای گَنِلِهَه هُوَ میَن. 49اِ آخِر ایی زمونه‌یشَ هُنَ ماوَ. فریشدِه‌لَ مان ئو گَنَ‌کارَل اژ نوم دُریسکارِلَ مَکیشِنَ دِریر، 50ئو اونِلَ ماوژِن اِنوم کویرَه آگِر، جای گه گیری ئو دِنوریچَه هَس.»

51اَسَه پِرسیتی: «آیا کُل ایی چیئَلتونَ فیَمی؟» جوواوُ دا: «اَاَ!» 52عیسی وِتی‌ئونو: «اِسَه، هر مَلِم توراتی گه اِبارَه پاتِشائی آسمو تیَلیم گِرتوئیتی، هر گا صائای‌مالی کَ گه اژ خزینَه ووژ چیئَل نوو ئو کُینَه ماریَ دِریر.»

بی‌ایمونی مردِم ناصرَه

53وخدی گه عیسی ایی متلَ تموم کِردی، اژ اورَه چی، 54ئو چی اِرَه شیَر ووژ ناصرَه، ئو بِنیا نا اَر تیَلیم دائِن مردِم اِنوم عَبادتگائو. مردِم بِلُجوئیو هات، پِرسیو: «ایی پیا هُنَ حکمت ئو قدِرت اَنجوم دائِن مُجِزَه‌ل اژ کو آوِردیَسی؟ 55مَر او کُر اَ نجّارَ نیَ؟ مَر نُم دای مریم نیَ؟ ئو بِرالی یعقوب ئو یوسف ئو شَمعون ئو یهودا نیِن؟ 56مَر کُل خُیَه‌لی اِنوم ایمَه زِنِه‌ی نِمَهَن؟ اِسَه کُل ایی چیئِلَ اژ کو آوِردیَسیَ دس؟» 57اَسَه زور اَر وَر داشدِنی. مِنتائای عیسی وِتی‌ئونو: «پِخَمَر بی‌عزّت نیَ بِخِر اِنوم شیَر ئو مال ووژ!» 58ئو اَر اورَه وَه خاطر بی‌ایمونی اونَل، مُجِزَه‌ل فِرِه نَهَردی.

Zur Zeit ausgewählt:

مَتّی 13: LBT

Markierung

Kopieren