مَتّی 11
11
قصَه‌ل عیسی اِبارَه یحیی تیَمیددهندَه
1دُما یَگه عیسی ایی فِربونِلَ داتیَ دوازَه شاگرد ووژ، اژ اورَه چی تاگَه اِنوم شیَرَلو تیَلیم بِ ئو موعظَه بِهِه.
2وخدی یحیی اِنوم زندو، تیَریف اژ کارَل مسیح شنَفتی، شاگردَل ووژ کِل‌کِردی اِرَه تک 3تاگَه بِپِرسِن: «آیا تو هَر اَوینَ گه باس بای، یاگَه چیَمَ‌رئی یَکی‌تِر بوئیمو؟» 4عیسی جوواو داتی: «بِچِن ئو اَ چیئَه گه موئینینون ئو مَشتوئینو بوشِنَ یحیی، گه 5کورَل بیناآ موئن، شلَلَ مَچِنَ رئیا، جِذامیَل شِفاءَ مَگِرِن، کرَلَ مَشتوئِن، مِردیَل زِنیا موئن ئو خَوَر خَوش پاتِشائی خداون اِلومَ ماو اَر ژارَل. 6خَوزگالَ کسی گه شِک نِهَه اَر مِه.»
7وخدی شاگردَل یحیی مَچیان، عیسی بِنیا نا اَر قصَه کِردِن اِبارَه یحیی وَه‌گَرد مردِم ئو وِتی: «چینون اِرَه بیاوو چَه بوئینینو؟ چینو زَل گه وَه وا مَشَکی، بوئینینو؟ 8اَرّ نه، اَنی چینو چَه بوئینینو؟ چینو پیای بوئینینو گه کِراس نرم هایتیِ وَر؟ اونَلی گه کِراسَل نرمَ مَهَنِ وَر هانِ کاخَل پاتِشائَل‌اِر. 9اِسَه چینو چَه بوئینینو؟ چینو پِخَمَری بوئینینو؟ اَاَ، موشِم‌ئونتو کسی گه اژ پِخَمَریشی سرتِرَ. 10اَرِیَگه او هَراَ کسَسَ گه اِبارَه اِنوم کِتاو مَلاکیِ پِخَمَر نُیسیاسی:
«”اِسگَه مِه رسول ووژِم وِر اژ تو کِلَ‌مَهَم
گه رئیِت وِر اژ تو آمادَه مِهِه.“
11حخیختاً، موشِم‌ئونتو، گه کَلِنگتِر اژ یحیی تیَمیددهندَه کس اژ دا نِهاتیَسَ دی، وَه ایی حالا گُجَرتِرین اِنوم پاتِشائی آسمو اژ او کَلِنگتِرَ. 12اژ زَمو یحیی تیَمیددهندَه تاگَه اِسگَه، پاتِشائی آسمو فِرَه آزار دیَسی، ئو زورگوئَل وَه زورَ مَگِرِنی. 13اَرِیَگه کُل پِخَمَرَل ئو تورات تاگَه زَمو یحیی، اِبارَه چیئَلی گه باس بو خَوَرو داءَ. 14ئو اَرّ بِتو قبول بِهِینو، یحیی هَراَ ایلیا پِخَمَرَسَ گه باس بای. 15هر کی گوش اَرِه شِنَفتِن دیری، بشتوئی.
16«مِه بوشِم مردِم ایی نسِلَ گانَ چَه؟ اونَل چُی آیلَلی کِن گه اِنوم بازارَ مَنیشِن ئو هِنا مَهَن اَر هُمبازیَل ووژون ئو موشِن:
17«”اَرِه هُمَه نِیمو دا بازیتو نَهَرد؛
مُووَمو آوِرد، نگیریاینو.“
18اَرِیَگه یحیی هات گه نه مَهُاردی ئو نه خُرَّ ماتی، موشِن: ”مِلاکَت دیری.“ 19کُر اِنسو هات گه هم میری ئو هم خُرَّ مِ؛ موشِن: ”سِیل کَنی پیای کَ لَمو ئو گُراگُر مَس، رِقیف خِراجگیرَل ئو گناکارِلَ.“ مِنتائای، دُریسی حکمت، وَه ثمر کارَلیا ثابتَ ماو.»
هِرّو اَرِه شیَرَلی گه توئَه نِمَهَن
20اَسَه عیسی بِنیا نا اَر مذمت شیَرَلی گه ویشتِر مُجِزَه‌لی اِنوم اونَل اَنجوم گِرتوئی؛ اَرِیَگه توئه‌ئو نَهَردوئی. 21«هِرّو اَرِنِت، اِاِ شیَر خورَزین! هِرّو اَرِنِت، اِاِ شیَر بِیت‌صِیْدا! اَرِیَگه اَرّ مُجِزَه‌لی گه اِنوم هُمَه اَنجوم گِرتی، اِنوم شیَرَل صور ئو صِیدون اَنجومَ مَگِرتی، مردِم اورَه زویتِر اژ یَه، وَه پِلاس اِوَر کِردِن ئو هَری اِ سر گِرتِن، توئه‌ئو کِردوئی. 22مِنتائای موشِم‌ئونتو گه اِ روژ داوری، تیَمِل مِجازات اَرِه صور ئو صِیدون آسُتِرَ ماو، تاگَه اَرِه هُمَه. 23ئو تو، اِاِ شیَر کَفَرناحوم، یانی سرِت تاگَه آسمونَ میَرینَ رُ؟ اصِلا، بلکِم سرنگونَ موئینَ تیَه جیَنِما. اَرِیَگه اَرّ مُجِزَه‌لی گه اِنوم تو اَنجوم گِرتی، اِنوم سُدومَ موئیا تاگَه ایمِرو مَمَن اَر جا. 24مِنتائای موشِم‌ئونتو گه اِ روژ داوری، تیَمِل مِجازات اَرِه سُدوم آسُتِرَ ماو، تاگَه اَرِه تو.»
بورن اِرَه تک مِه
25اَ حِنَ، عیسی وِتی: «اِاِ باوَه، اِاِ مالک آسمون ئو زَمی، شگِرتَ مَهَم گه ایی چیئِلتَ اژ دونائَل ئو حکیمَل شاردیَسا ئو اَر آیلَل گُجَر آشگارتا کِردیَ. 26اَاَ، اِاِ باوَه، اَرِیَگه خواس پِر اژ فیض تو یَه بیَ. 27باوَه‌م کُل چی سپارتیَسیَ مِه. کس کُر نِمَشتاسی بِخِر اژ باوَه ئو کس باوَه نِمَشتاسی بِخِر اژ کُر ئو اونَلی گه کُر بِیتی باوَه اَرینو آشگارا بِهِه.
28«بورن اِرَه تک مِه، اِاِ کُل زیَمَت‌کیشَل ئو کسَلی گه بارَل گِرونتو ها کولا، گه مِه آسائشتتونَ میَم‌ئون. 29دارِبرگ مِه باوژِن اَر مِلتو ئو اژ مِه تیَلیم بِگِرِن، اَرِیَگه مِه مِلوم ئو فِروتنِم ئو اِ گیونَلتو آسائشتَ مَگِرینو. 30اَرِیَگه دارِبرگ مِه راحتَ ئو بارِم سُئِکَ.»
Zur Zeit ausgewählt:
مَتّی 11: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
