مَتّی 10
10
مأموری دوازَه شاگرد
1اَسَه عیسی دوازَه شاگردِهِه هِنا کِردی اَرِه تک ووژ ئو قدِرت‌واختیار دانی‌ئون تاگَه روحَل گَن، تار کَن ئو هر ژُن ئو مِرَضی شِفا دَن. 2نُم اَ دوازَه رسولَ یوئنَنَ: اول‌بار، شَمعون مَشور وَه پطرس ئو بِرای آندریاس؛ یعقوب کُر زِبِدی ئو بِرای یوحنا؛ 3فیلیپُس ئو بَرتولْما؛ توما ئو مَتّا خِراجگیر؛ یعقوب کُر حَلْفای ئو تَدّای؛ 4شَمعون غیور ئو یهودا اَسخَریوطی گه عیسی داءَ گیر دشمنا.
5عیسی ایی دوازَه نفرَ کِل‌کِردی، فِربو دانی‌ئون: «نَچِن اِرَه تک خِرِیهودیَل، ئو نَچِن اِنوم هُیچ کُم اژ شیَرَل سامریَل، 6بلکِم بِچِن اِرَه تک کاوِرَل گُم‌بیئی قوم اسرائیل. 7وخدی مَچینو، ایی پِغومَ اِلوم کَن گه پاتِشائی آسمو نزیکَ. 8مریضَل شِفا دَن، مِردیِلَ زِنیا کَن، جِذامیَل شِفا دَن، مِلاکَتَل تار کَن. وَه مِفت گِرتِتونَ، وَه مِفت‌یش بیَن. 9هُیچ سکَه طِلا یاگَه نُخِرَه یاگَه مس نوئنِن اَرسر قِ‌وَنَلتو، نیَرِنَ گَرد ووژتو، 10ئو اَرِه سفر، تورَه یاگَه کِراس زیاکی یاگَه کِلاش یاگَه موزبِرَه هیزنیَن؛ اَرِیَگه کارگر حَخَسی مِزدَس ووژ بِسینی. 11ئو اِنوم هر شیَر یا آبادی‌ای گه مَچینو، مِنِی آم لائقی بِهَن ئو تا وخدی گه هاینون اَر اورَه، بِمینِن اِنوم مال او. 12وخدی مَچینون اِنوم اَ مالَ، بوشِن ”سِلام“. 13اَرّ اَ مالَ لائق بو، صُئل‌وسِلامتی گه وِتِتونَس‌‌ئون ماتی اَررُی، ئو اَرّ لائق ناو، اَ صُئل‌وسِلامتیَ گِلامیری اَر ووژتو. 14اَرّ کسی نِیلیتونِ گِرد ئو یاگَه گوش نَگِری اَر قصَه‌لتو، وخدی اژ اَ مالَ یاگَه اَ شیَرَ مِهِینونَ دِریر، توز پال ووژتو بِتَکِنِن، تاگَه شاتی بو اَرضد اونَل گه خَضو خدا ماءَ سرو. 15حخیختاً، موشِم‌ئونتو، اِ روژ داوری، تیَمِل مِجازات اَرِه شیَرَل سُدوم ئو غُمُورَّه آسُتِرَ ماو تاگَه اَرِه اَ شیَرَ.
16«حُواستو بو، مِه هُمَل چُی کاوِرَل کِلَ‌مَهَم اِرَه نومجا گُرگَل. اِسَه چُی مار هوشیار بوئن ئو چُی کموتر سادَه. 17حُواستونِ مردِم بو. اَرِیَگه اونَل میَنتونَ دس محکمَه‌ل ئو اِنوم عَبادتگال ووژو، شلاختونَ میَن. 18وَه خاطر مِه میَرِنتون اِرَه تک والیَل ئو پاتِشائَل تاگَه اَرتَک اونَل ئو خِرِیهودیَل شاتی بِینو. 19مِنتائای حِنی گه میَنتونَ دس دشمنا، هولتون اِرانَگِری گه چطور قصَه بِهِینو یاگَه چَه بوشینو. اَرِیَگه اَ موقَع اَ چیئَه گه باس بوشینو عطا ماوِنی‌ئونتو. 20اَرِیَگه اَوَه گه قصَه مِهِه هُمَه نیئینو، بلکِم روحِ باوَه آسمونی هُمِئَه گه وَه زوئو هُمَه قصَه مِهِه. 21بِرا، بِرا ووژ تسِلیم مرگَ مِهِه ئو باوَه اولاد ووژ. آیلَل اَرضد دائوباوَه هیزَمَگِرِن ئو باعث کُشتِن اونِلَ موئن. 22کُل مردِم وَه خاطر نُم مِن اژ هُمَه بیزارَ موئن. مِنتائای هر کی گه تاگَه آخِر طاخَت باری، نجادَ مَگِری. 23وخدی اِنوم شیَری آزارتونَ میَن، بِحوان ویرِ شیَری‌تِر. حخیختاً، موشِم‌ئونتو، وِر اژ یَگه بتونینو بِچینون اَرِه کُل شیَرَل اسرائیل، کُر اِنسونَ مای.
24«نه شاگرد کَلِنگتِر اژ استاد ووژَ ئو نه خُلُم اژ اَرباو ووژ کَلِنگتِرَ. 25اَرِه شاگرد هَر یَه بسَ گه بو اِجور استاد ووژ ئو اَرِه خُلُم‌یش هَر یَه بسَ گه بو اِجور اَرباو ووژ. اَرّ کَلِنگ مال وَه بِعِلزِبول یانی شِطو هِنا کَن، چَنی ویشتِر وَه باقی اَل اَ مالَ گَنَ موشِن؟
26«اِسَه، زِلَتون اَژینو نَچو. هُیچ چی آشاریای نیَ گه آشگارا ناو ئو هُیچ پوشیای نیَ گه نَکُوءِ در. 27اَ چیئَه گه اِنوم تیَریکی وِتم‌ئونتو، اِنوم روشتایی بوشِنیا ئو اَ چیئَه گه بِن‌گوشیَ مَشتوئینو، اَرسر بُنَل اِلوم کَنی. 28زِلَتون اژ کسَلی گه جسمَ مَکُشِن مِنتائای نِمَتونِن روح بِکُشِن، نَچو؛ زِلَتون اژ او بِچو گه مَتونی هم روح ئو هم جسم هُمَه اِنوم جیَنِم هِلاک کِ. 29مَر دو مَلیچِکَ یِه قَرو نِمَفِروشِن؟ وَه ایی حالا، جُ‌جُ یَکی اَژینو بی‌صِلا باوَه آسمونی هُمَه نِمَکُوء اَر زَمی. 30جُ‌جُ مویَل سر هُمَه کُل شِماریانَ. 31اِسَه زِلَتو نَچو، اَرِیَگه اَرزشد هُمَه فِرَه‌تِر اژ هزارو مَلیچِکَ.
32«هر کی اَرتَک مردِم، اعتراف بِهِه گه ها گَرد مِه، مِن‌یش اَرتَک باوَه ووژِم گه ها نوم آسمون‌اِر، اعترافَ مَهَم گه او ها گَرد مِه؛ 33مِنتائای هر کی مِن اَرتَک مردِم حاشا کِ، مِن‌یش اَرتَک باوَه ووژِم گه ها نوم آسمون‌اِر، حاشاءَ مَهَمی.
34«گُمو نَهَن گه هاتِمَ تاگَه صُئل بارِم اَررُی زَمی. نِهاتِمَ تاگَه صُئل بارِم، بلکِم تاگَه شِمشیر بارِم! 35اَرِیَگه هاتِمَ تاگَه:
«”کُر اِ رُی باوَه،
دِت اِ رُی دا ئو
بُئی اِ رُی هَسویرَه اِرآرِم.
36دشمنَل آم، هوز مال ووژَ موئنی.“
37«هر کی باوَه یاگَه دا ووژ ویشتِر اژ مِه دوس داشدوئیتی، لائق مِه نیَ، ئو هر کی کُر یاگَه دِت ووژ ویشتِر اژ مِه دوس داشدوئیتی، لائق مِه نیَ. 38هر کی صلیب ووژ هیزنِ ئو ناءَ تُرّ مِنا، لائق مِه نیَ. 39هر کی بِیتی گیو ووژ حفظ کِ، اژ کیس اِرَمَچوتی ئو هر کی گیو ووژ وَه خاطر مِن اژ دس بِ، حفظَ مِهِیتی.
40«هر کی بِچوءِ گِرد هُمَل، چیَسِ گِرد مِ ئو هر کی بِچوءِ گِرد مِه، چیَسِ گِرد اَوَه گه مِه کِل‌کِردیَسی. 41هر کی بِچوءِ گِرد پِخَمَری وَه خاطر یَگه پِخَمَری کَ، اَجِر پِخَمَرَ مَگِری، ئو هر کی بِچوءِ گِرد آم صالح وَه خاطر یَگه صالحَ، اَجِر آم صالحی مَگِری. 42هر کی وَه ایی گُجِرِلَ، وَه خاطر یَگه شاگرد مِنِن، جُ‌جُ جُمی آو سرد بِ، حخیختاً، موشِم‌ئونتو بی‌اَجِر نِمَمینی.»
Zur Zeit ausgewählt:
مَتّی 10: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
