لوقا 4

عیسی اِنتحونَ ماو

1عیسی پِر اژ روح‌القدس، اژ روو اُردن گِلاهُاردی، ئو وَه هدائَت روحِ خدا چی اَرِه نوم بیاوو. 2اَر اورَه ابلیس چِل روژ او اِنتحو کِردی. عیسی اِ، اَ روژِلَ چیئی نَهُاردی، وخدی اَ روژِلَ تموم بی، وِرسِنی اِرابیتی. 3اَسَه ابلیس وِتون: «اَرّ کُر خدائین، بوشَ ایی کُچِکَ تاگَه بوءَ نُو.» 4عیسی جوواوا داتی: «اِنوم تورات نُیسیاءَ گه ”اِنسو فَخَد وَه نُو زِنی نیَ.“»

5اَسَه ابلیس او بِردی اَرِه جا بِلِنگی ئو هِرازِه کُل مملکتَل دنیا نِشو دائون 6ئو ابلیس وِتون: «مِه کُل ایی قدِرت‌واختیارَ ئو جِلالونَ موئَشخِمَ تو، اَرِیَگه سپارتیاسَ مِه ئو صِلا دیرِم گه بیَمیَ هر کی گه دلِم بِیتی. 7اِسَه، اَرّ مِه بِپِرَسین، یوئنَ کُلَ موئنَ هِن تو.» 8عیسی جوواوا داتی: «اِنوم تورات نُیسیاءَ،

«”خداون، خداءِ ووژِت بِپِرَس

ئو فَخَد او عَبادت کَ.“»

9اَسَه ابلیس او بِردی اِرَه شیَر اورشلیم ئو نا اَر بِلِنگ‌تِرین جا معبد خدا، ئو وِتون: «اَرّ کُر خدائین، ووژت اژ ایرَه باوژَ هُار. 10اَرِیَگه اِنوم کِتاو زَبور داوود نُیسیاءَ:

«”اِبارَه تو فِربونَ مِئَه فریشدَه‌ل ووژ

تاگَه ویردار تو بوئن.

11اونَل تون اَررُی دَسَلونَ میَرِن،

تا ناخواد پات بِین اَر کُچِکی.“»

12عیسی جوواو دائون: «اِنوم تورات هاتیَ، ”خداون، خداءِ ووژِت اِنتحو نِهَه.“» 13وخدی ابلیس کُل ایی اِنتحونِلَ تموم کِردی، تا مِدتی او وِل کِردی.

بِنیا خِلمتَل عیسی اِنوم هیال جلیل

14عیسی وَه قدِرت روح‌القدس گِلاهُاردی اَرِه هیال جلیل ئو چاو او کَتِ سِرُسَر اَ هیالَ. 15او اِنوم عَبادتگائَلو تیَلیمَ ماتی، ئو کُل اَژینی تیَریفونَ مَهَرد.

عیسی‌ئو اِ ناصرَه تار کِرد

16عیسی چی اَرِه شیَر ناصرَه گه اَر اورَه کَلِنگ بوئی، ئو اِ روژ شَمَه مقدّس، هَراَ جورَ گه هوکارَه بی هات اَرِه نوم عَبادتگا یهود ئو هیزگِرتی تاگَه کلوم خدا بحیوَنی. 17طومار اِشعیا پِخَمَرو دائون. وخدی واز کِرد، جای کِردیَ دی گه نُیسیاءَ:

18«روحِ خداون ها اَررُی مِه،

اَرِیَگه مِه مسح کِردیِ

تاگَه خَوَر خَوش پاتِشائی خدا،

اِلوم کَم اَر ژارَل

ئو مِه کِل‌کِردیَسی تاگَه آزادی،

اِلوم کَم اَر اسیرَل

ئو روشتایی بیَمَ چیَمَل کورَل،

ئو ستم‌کیشَل آزاد کَم،

19ئو سال لِفطِ خداون اِلوم کَم.»

20اَسَه طومارِهَه لویل کِردی ئو داءَ خادمِ عَبادتگا ئو نیشت‌اِرا. کُل مردِم اِنوم عَبادتگا بینیَ سِیل‌کَر. 21اَسَه عیسی هُنَ بِنیا نا اَر قصَه کِردِن: «ایمِرو ایی نُسَخ مقدّسَ، وخدی گوشتونَ مائون، وَه اَنجوم رَسی.» 22کُل مردِم اَژینی تیَریفونَ مَهَرد ئو اژ کلوم پِر اژ فیض او بِلُجوئیونَ ماهات ئو موئِتو: «مَر یَه کُر یوسف نیَ؟» 23عیسی وِتی‌ئونو: «چِرچی نیَ گه ایی متلَ اَرِه مِنَ مارینو گه ”اِاِ حکیم، ووژِت شِفا بیَ! اَ چیئَه گه شنَفتِمونَ اِنوم شیَر کَفَرناحومِت کِردیَ، اَر ایریشَ، اِ شیَر ووژِت، اَنجوم دَ.“» 24اَسَه وِتی: «حخیختاً، موشِم‌ئونتو گه هُیچ پِخَمَری اِنوم شیَر ووژ نِمَچِنیِ گِرد. 25حخیختاً موشِم‌ئونتو، گه اِ زَمو ایلیا پِخَمَر، وخدی گه در آسمو سه سال ئو نیم بُوئنیا ئو قیَطی سخدی سِرُسَر اَ وِلاتَ گِرتی‌اِرا بیوَه‌ژِنَل فِرِه اِنوم اسرائیل بین. 26مِنتائای ایلیا کِل‌نوئی اَرِه تک هُیچ کُمو مَر اَرِه تک بیوَه‌ژَنی اِنوم شیَر صَرِفَه اِ وِلات صِیدون. 27اِ زَمو اِلیشَع پِخَمَریش جِذامیَل فِرِه‌ی اِنوم وِلات اسرائیل بین، مِنتائای هُیچ کُمو اژ جِذام ووژو پاکا نوئین مَر نَعْمانِ سُریانی.» 28اَسَه کُل کسَلی گه اِنوم عَبادتگا بین، وخدی ایی قصَه‌لونَ شنَفت آگِر اژ سرو چی 29ئو هیزو گِرت، اوُن اژ شیَر کیشیِ دِریر ئو بِردون اَرِه تُک کوی‌ای گه شیَر اَررُی بِنا بوئیتی، تاگَه اژ اورَه باوژِنیِ هُار. 30مِنتائای او اژ نومجائو رد بی ئو چی.

شِفا پیا مِلاکَت‌دار

31اَسَه عیسی چیِ هُار اَرِه کَفَرناحوم، شیَری اِ هیال جلیل، ئو اِ روژ شَمَه مقدّس تیَلیم مردِم داتی. 32اونَل اژ تیَلیم او بِلُجوئیو هات، اَرِیَگه کلوم او قدِرت‌واختیار داشدی. 33مِنتائای اِنوم عَبادتگا، پیا مِلاکَت‌داری بی گه روحِ گَن داشدی. او وَه دَنگ کَلِنگ قارونی: 34«اِاِ عیسیِ ناصری، اِ ایمَت چا؟ مَر هاتینَ نابودمو کِین؟ مَذانِم تو کیئین؛ تو اَ قدوس خدائینَ!» 35عیسی تُنا بی اَر اَ روح گَنَ ئو وِتی: «دَنگِت نای ئو اَژینی بوریَ دِریر!» اَسَه مِلاکَتِهَه، اَ پیاءَ اَرتَک کُل مردِم کوئی اَر زمین‌اِرا ئو بی‌یَگه ضِرَدی برَسِنتی‌ اَری، اَژی چِتیَ دِریر. 36مردِم کُل بِلُجوئیو هاتوئی ئو موئِتونَ یَکتِری: «یَه چه کلومی کَ؟ او وَه قدِرت‌واختیار فِربونَ مِئَه روحَل گَن ئو اونِلَ مانَ دِریر!» 37هَر وَه ایی جورَ خَوَر کارَل او کَتِ سِرُسَر اَ هیالَ.

شِفا هَسویرَه پطرس

38اَسَه عیسی عَبادتگا هُیشتی اَر جا ئو چی اَرِه مال شَمعون. هَسویرَه شَمعون تُو فِرِه‌ی داشدی. اَسَه اژ عیسی‌ئو هِست گه یاری دِیتی. 39عیسی هوسیا اَر بِلِنگ سر اَ ژِنَ ئو تُنا بی اَر تُو، ئو تُو قط بیتی. او هِرازِه هیزگِرتی ئو بِنیا نا اَر خِلمت کِردِن اژ اونَل.

40باایوارَه، کُل کسَلی گه مریضَلی وَه مِرَضَل جوراجورو داشد، اونَلو آوِرد اَرِه تک عیسی، ئو اویش دس نا اَر قِ یَکی‌یَکیو ئو شِفا دانی. 41مِلاکَتَل‌یش اژ فِرَه کسَل ماهاتِن‌َ دِریر ئو مَقارونو، موئِتو: «تو کُر خدائین!» مِنتائای او تُنا موئیا اَرینو ئو نِمِیشتی قصه‌ی بوشِن، اَرِیَگه مَذِناسدو یَه هَراَ مسیحَسَ گه باس بای.

موعظَه عیسی اِنوم عَبادتگائَل یهود

42وخدی چیَم روژ تِرَکی، عیسی چی اِرَه جا خلوتِ چَفتی. مِنتائای مردِم مِنِیونَ مَهَرد ئو هاتِن اَرِه جای گه عیسی اَر اورَه بیَ، تقِلائو کِرد تاگَه نِیلِن اژ تَکو بِچو. 43مِنتائای او وِتی‌ئونو: «مِه باس خَوَر خَوش پاتِشائی خدا اِلوم کَم اَر شیَرَلی‌تِریش، اَرِیَگه مِن اَرِه ایی کارَ کِل‌بیمَ.» 44اَسَه او اِنوم عَبادتگائَل هیال یهودیَه پِغوم خدا اِلومَ مَهَردی.

Zur Zeit ausgewählt:

لوقا 4: LBT

Markierung

Kopieren