لوقا 15
15
متل کاوِر گُم‌بیئی
1خِراجگیرَل ئو گناکارَل کُلو جیَمَ موئیان اَرتَک عیسی تاگَه قصَه‌ل بشتوئِنی. 2مِنتائای شیخَل فرقَه فَریسی ئو مَلِمَل تورات خُت‌خَتونَ مَهَرد موئِتو: «ایی پیاءَ گناکارَل قبولَ مِهِه هُم‌سِفِرِه‌ئونا ماو.»
3اَسَه عیسی ایی متلَ اَرِه وِتِنی: 4«کُماین اژ هُمِئَه گه صد ریئَن کاوِر داشدوئیتی ئو وخدی یَکی اژ اونَل گم بو، اَ نود ئو نُه گِلَه کاوِرَ نِیلی اَر جا اِنوم بیاوو ئو نَچوءِ مِنِی اَ یَکَ گه گم بیَ تاگَه بِهِیتیَ دی؟ 5ئو وخدی کاوِری گه گم بوئی کِردیَ دی، وَه خَوشالی مَگِرِتیِ کول 6ئو ما اِرَه مال، رِقیفَل ئو هُمسالی هِنا مِهِه ئو موشی: ”وَه‌گَرد مِه خَوشالی بِهَن، اَرِیَگه کاوِرِهَم گه گم بوئی کِردِمَسَ دی.“ 7موشِم‌ئونتو، هَرِ ایی جورَ اَرِه گناکاری گه توئَه مِهِه جَشت ئو خَوشی کَلِنگتِری اِنوم آسمونَ ماو، تا اَرِه اَ نود ئو نُه آم صالحی گه نیازَ توئَه نِرِن.
متل سکَه گُم‌بیئی
8«یاگَه کُماین ژَن هَس گه دیَه سکَه نُخِرَه داشدوئیتی ئو اَرّ یَکی اژ اونَل گم بو، چراخی نَگیسِنی ئو مال ژیرِتیَه نِهِه ئو تاگَه نِهِیتیَ دی، اژ مِنِی کِردِن آنوسی؟ 9ئو وخدی کِردیِ دی، رِقیفَل ئو هُمسالی هِنا مِهِه ئو موشی: ”وَه‌گَرد مِه خَوشالی بِهَن، اَرِیَگه اَ سکَه‌‌مَ گه گُمِم کِردوئی، کِردِ دی.“ 10موشِم‌ئونتو، هَر وَه ایی جوریشَ، اَرِه توئَه کِردِن یِه گناکار، اَرتَک فریشدَه‌ل خدا جَشت ئو خَوشیَ ماو.»
متل کُری گه گُم‌بیئی
11اَسَه عیسی وِتی: «پیای دو کُر داشدی. 12یِه روژ کُرَ گُجِرَهَه وِتیَ باوِه: ”اِاِ باوَه، بیَری گه اژ میراتتَ مَرَسی‌ئونِم هَراِسگَه بِ‌ئونِم.“ اِسَه باوَه ثرود ووژ اِنوم اَ دوءَ بیَرا کِردی. 13دُما قِیلی، کُرَ گُجِرَهَه کُل چیئَلی گه داشدی جیَم کِردی ئو چی اِرَه جا دویری ئو اَر اورَه ثرود ووژ وَه عِیاشیا داءَ رِفت‌اِرا. 14ئو وخدی هر چی گه داشدی خرج کِردی، قیَطی سخدی کَت اِنوم اَ وِلاتَ ئو، او فِرَه میتاجا بی. 15اِسَه، چی ئو بیَ کارگر یَکی اژ مردِم اَ وِلاتَ، او اَ کُرَ کِل‌کِردی اَرِه نوم زمینَلی تا خوراک بیَ خنزیلَل. 16کُرِهَه اِ تَمارزو بی لَم ووژ وَه خوراک خنزیلَل سیر کِ، مِنتائای هُیچ‌کس چیئی‌ئون نِما. 17دُماخِرِ هاتِ سر ووژ ئو وِتی: ”خُلُمَل باوَه‌م چَنی خوراک زیاکی‌یش دیرِن، مِنتائای مِه اَر ایرَه دیرِم اژ وِرسِنیَ مَمِرِم. 18اِسَه هیزَمَگِرِم ئو مَچِم اِرَه تک باوَه‌م ئو موشِم: ’باوَه، مِن اَر حخ تو ئو خداءِ آسمو گنام کِردیَ. 19مِه لائق نیِم گه کُرِت بوئم. اِجور یَکی اژ کارگرَلِت وَه‌گَرد مِه رفدار بِهَه.“‘
20«اَسَه هیزگِرتی ئو کَتِ رئی چی اِرَه مال باوِه. مِنتائای هَنی دویر بی گه باوِه او دیتی، دل اَرِه سُتی ویرِ او ناءِ دو ئو دس آوشدِ مِل ئو ماچا کِرد. 21کُرِهَه وِتی: ”باوَه اَر حخ تون ئو خداءِ آسمو گنام کِردیَ. دیَر مِه لائق نیِم گه کُرِت بوئم.“ 22مِنتائای باوَه وِتیَ خِلمتکارَل ووژ: ”زِلِ‌زوی بِچِن! بیتِرین کِراس بارِن ئو بِهَنیِ وَر. کِلِکونِه‌ی بِهَنیِ کِلِک ئو کِلاش بِهَنیِ پال. 23گوَئر مِلِ‌مَسِهَه بارِن، سِرا بُئِرِن تاگَه بیریمون ئو جَشت بِگِریم. 24اَرِیَگه ایی کُرمَ مِردوئی، اِدوارَه زِنیا بیَ؛ گم بوئی، بیَسَ دی!“ اِسَه بِنیائو نا اَر جَشت ئو خَوشی.
25«مِنتائای کُرَ کَلِنگِهَه اَرسر کشتِ‌کار بی. وخدی گِلاهُاردی ئو نزیک اَر مال بی ئو دَنگ ساز ئو دُهیل ئو دس گِرتِن، شنَفتی 26هِنا کِردی اَر یَکی اژ خِلمتکارَل ئو پِرسیتی: ”چِیکَ؟“ 27خِلمَتکارِهَه جوواوا داتی: ”بِراهَت هاتیَ ئو باوَه‌ت گوَئر مِلِ‌مَسِهَه اَرِه سِرا بِریَ، اَرِیَگه کُرِهِه ساق ئو آزا کِردیَسیَ دی.“ 28کُرَ کَلِنگِهَه وخدی یَه شنَفتی، آگِر اژ سر چِتی ئو نِهِستی با اِرَه مال. اَسَه باوَه هاتَ دِریر ئو لالکیاتی‌ئون. 29مِنتائای او وِتیَ باوَه: ”سِیل کَ سالَل فِرِه‌ی اِجور خُلُمَل خِلمَتم اَژی کِردینَ ئو هرگِس اژ فِربونَلِت کورفربوونیِم نَهَردیَ. مِنتائای تو هرگِس جُ‌جُ تویشکتی وَه مِه نا تاگَه وَه‌گَرد رِقیفَلِم جَشتی بِگِرِم. 30اِسگَه گه ایی کُرتَ گِلاهُاردیِ، هَر اَ کُرَ گه ثرودِت وَه‌گَرد ژِنَل خِراو داءَ رِفت‌اِرا، گوَئر مِلِ مَسِهَه‌ت اَرِه سِرا بِریَ!“ 31باوَه وِتی: ”کُرِم، تو هَر هاین اَرتَکِم، ئو کُل چیئَلی گه دیرِم، هِن تونَ. 32مِنتائای اِسگَه باس جَشت بِگِریم ئو خَوشی بِهِیم، اَرِیَگه ایی بِراتَ مِردوئی، زِنیا بیَ؛ گم بوئی، بیَسَ دی!“»
Zur Zeit ausgewählt:
لوقا 15: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
