یوحنا 9
9
شِفا پیا کور مادرزا
1عیسی اِنوم رئی گه مَچیا، کور مادرزای دیتی. 2شاگردَلی اَژینو پِرسی: «استاد، عاقویَت گنا کیَ گه ایی پیا کور هاتیَسَ دی؟ گنا ووژَسی یاگَه باوَه‌دای؟» 3عیسی جوواو داتی: «نه گنا ووژَسی، نه باوَه‌دای؛ بلکِم هُنَ بی تاگَه کارَل خدا اِنوم او دیار بو. 4تا روژَ ایمَه باس کارَل کِل‌کَرِم اَنجوم دِیم؛ وخدَ بوءَ شو، ئو اِنوم شو کسی نِمَتونی کار بِهِه. 5تا وخدی گه هامِ دنیا، نُیر دنیام.» 6یَه وِتی ئو آو دَمی آوشدی اَر زَمی، هَری دُریس کِردی ئو اَوَه سائیتی اَر قِ چیَمَل اَ پیا 7ئو وِتَ بی: «بِچُ اِنوم حوض سیلوآم (گه میَنا ’کِل‌کَریا‘سی) ئو چیَمَلِت بشور.» اَسَه چی ئو شوریتی، بیناآ بی ئو گِلاهُاردی.
8هُمسائَل ئو کسَلی گه اژ قدیم اوئنَ وخدِ حُاس کِردِن دوئی، پِرسیو: «مَر یَه هَراَوَه نیَ گه مَنیشت ئو حُاسَ مَهَردی؟» 9بِری وِتو: «هَراَوَه‌سَ.» کسَلی‌تِر وِتو: «هرگا او.» مِنتائای او ووژ هَراَ موئِتی: «مِه هَراَ پیامَ.» 10اَسَه، اژ اوُ پِرسی: «اَنی چطور چیَمَلِت واز بین؟» 11جوواو داتی: «پیای گه نُم عیسی بیتی، هَری دُریس کِردی ئو سائیتی اَر قِ چیَمَلِم ئو وِتی ”بِچُ اِنوم حوض سیلوآم ئو چیَمَلِت بشور.“ اَسَه چِم، شوریم ئو چیَمَلِم بیناآ بین.» 12اَژینو پِرسی: «او هار کو؟» جوواو داتی: «نِمَذانِم.»
13اَسَه اَ پیاءَ گه وِرِکار کور بی، آوِردون اَرِه تک شیخَل فرقَه فَریسی. 14اَ روژَ گه عیسی هَری دُریس کِردوئیتی ئو چیَمَل او واز کِردوئیتی، روژ شَمَه مقدّس بی. 15اَسَه فَریسیَل‌یش اَژینو پِرسی گه چطور بیناآ بیَ. اَ پیا جوواو داتی: «هَری سائیتی اَررُی چیَمَلِم ئو شوریم ئو اِسگَه موئینِم.» 16اَسَه بِری اژ فَریسیَل وِتو: «اَ پیا اژ جونِم خدا نیَ، اَرِیَگه عزّت نِمَنی اَر روژ شَمَه.» مِنتائای کسَلی‌تِر وِتو: «چطور کسی گه گناکارَ مَتونی هُنَ نشونَه‌ل ئو مُجِزَه‌لی بِهِه؟» ئو اونَل بینَ دو دسَه. 17اَسَه یِگِلی‌تِر اژ اَ کورونَ پِرسی: «اِسگَه گه او چیَمَلِت واز کِردیِ ووژِت اِبارَه او چَه موشین؟» اَ پیا جوواو داتی: «پِخَمَری کَ.»
18مِنتائای کَلِنگَل یهود هَنی باوارو ناآشد گه او کور بیَ ئو اِسگَه بیناآ بیَ، تاگَه هِنائو کِرد اَر باوَه‌دای 19ئو اَژینو پِرسین: «یَه کُر هُمِئَه، هَراَوَه گه موشینو کور هاتیَسَ دی؟ اَنی چطورَ اِسگَه مَتونی بوئینی؟» 20اونَل جوواوُ دا: «مَذانیم کُر ایمِئَه، ئو هَمیش مَذانیم کور هاتیَسَ دی. 21مِنتائای اِسگَه چطورَ مَتونی بوئینی، ئو یاگَه کی چیَمَل واز کِردیَ، ایمَه نِمَذانیم. اژ ووژ بِپِرسِنی. او دیَر کَلِنگ بیَ ئو مَتونی ووژ اِبارَه ووژ قصَه بِهِه.» 22باوَه‌دای هُنِئونَ وِت اَرِیَگه اژ یهودیَل زِلَئونَ مَچیا. اَرِیَگه یهودیَل وِرِکار یِه‌شور بوئین گه هر کی اعتراف بِهِه گه عیسی هَراَ مسیحَسَ گه باس بای، اژ عَبادتگا یهود تار کَنی. 23اَژونَبیَ گه باوَه‌دای وِتو، «او دیَر کَلِنگ بیَ؛ اژ ووژ بِپِرسِنی.»
24اَسَه اَرِه گِل دوئِم هِنائو کِردِ اَ پیا گه وِرِکار کور بی، وِتونَ بی: «جِلال بیَ خدا! ایمَه مَذانیم گه او پیا گناکاری کَ.» 25اَ پیا جوواو داتی: «نِمَذانِم او گناکارَ یا نه. مِنتائای فَخَد یِه چیَ مَذانِم، ئو یَگه کور بیم، ئو اِسگَه چیَمَلمَ موئینی.» 26اونَل پِرسیو: «چِه‌اُر کِردینی؟ چطور چیَمَلِت واز کِردی؟» 27جوواو داتی: «مِه گه وِتمَ بینتو، مِنتائای هُمَه گوش نِمَگِرینو؛ اَرِه‌چَه مِتو هَنی بوشِم؟ مَر هُمِه‌یش میا بوئینونَ شاگرد او؟» 28اونَل دُشمینو داءَ بی، ئو وِتو: «تو ووژِت شاگرد اوئین! ایمَه شاگرد موسی‌یم. 29ایمَه مَذانیم خدا وَه‌گَرد موسی قصَه کِردیَسی. مِنتائای نِمَذانیم ایی پیا، کوئی کَ.» 30اَ پیا جوواو داتی وِتی: «اَرِه‌چَه بِلُجوئیتونَ مای! وَه‌یاآگه چیَمَل مِه واز کِردیِ، نِمَذانینو کوئی کَ. 31ایمَه مَذانیم گه خدا دوعا گناکارَل نِمَشتوئی، مِنتائای اَرّ کسی خداپِرَس بو ئو خواس او باریَ جا، خدا دوعاءَ مَشتوئیتی. 32اژ، اَ اول دنیا تا اِسگَه کسی نَشتَفتیَسی گه یَکی چیَمَل کور مادرزای واز کِردوئیتی. 33اَرّ ایی پیا اژ جونِم خدا نوئی، کاری اژ دس اِرنِماهاتی.» 34اونَل جوواوُ داءَ بی، وِتو: «تو گه سِرَن‌تاپا اِنوم گنا هاتینَس‌َ دی. اِسگَه، وَه ایمِه‌یش تیَلیمَ مِین؟» اَسَه اوُ تار کِرد.
35وخدی عیسی شنَفتی گه اَ پیائونَ تار کِردیَ، او کِردیَ دی ئو اَژی پِرسی: «آیا وَه کُر اِنسو ایمو دیرین؟» 36او جوواو داتی: «آقا، بوش کیَ تاگَه ایمونَ بی بارمی.» 37عیسی وِتیَ اَ پیا: «تو اوئِت دیَ! هَراَوَه‌سَ گه اِسگَه وَه‌گَرد تو قصَه مِهِه.» 38وِتی: «آقا، ایمو دیرِم.» ئو اِوَر پال او رُی ناتی اَر زَمی.
39عیسی وِتی: «مِه اَرِه داوری هاتِمَس اَرِه ایی دنیا، تا اونَلی گه نِموئینِن بوئینِن ئو اونَلی گه موئینِن کور بوئن.» 40بِری اژ فَریسیَل گه وَه‌گَرد بینی وخدی یِئونَ شنَفت، پِرسیو: «یانی ایمِه‌یش کوریم؟» 41عیسی وِتیَ بینو: «اَرّ کور بوئیاینو گناتونی ناآشد؛ مِنتائای اِسگَه گه ادعاءَ مِهِینو موئینینو، بار گنائَلتو هار مِل ووژتو.
Zur Zeit ausgewählt:
یوحنا 9: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
