یوحنا 7
7
عیسی مَچو اَرِه عِد داوارَل
1دُما اَوَه، عیسی چَن روژی اِنوم هیال جلیلَ مَگیردیا، اَرِیَگه نِمِهِستی اِنوم هیال یهودیَه بِمینی، اَرِیَگه رِئیسَل یهود اِکِر بینی بِکُشِنی. 2وخدی عِد داوارَل گه اژ عِدَل یهودیَل بی، نزیک بی، 3بِرال عیسی وِتونَ بی: «ایرَه وِل کَ ئو بِچُ اَرِه یهودیَه تا شاگردَلِت کارَلی گه مِهِین بوئینِن، 4اَرِیَگه هر کی بِیتی بشتاسِنی، بی‌کِشکی کار نِمِهِه. تو گه ایی کارِلَ مِهِین، ووژِت نِشو بی اَر دنیا.» 5اَرِیَگه جُ‌جُ بِرالی‌شی ایمونونَ بی ناوِردوئی. 6اَسَه عیسی وِتیَ اونَل: «وخد مِه هَنی نَرَسیَ، مِنتائای اَرِه هُمَه هر وخدی خوءَ. 7دنیا نِمَتونی اژ هُمَه بیزار بو مِنتائای اژ مِه بیزارَ، اَرِیَگه مِه شاتیَ میَم گه کارَلی گَنِن. 8هُمَه ووژتو اَرِه عِد بِچِن، مِه [الان] اَرِه ایی عِدَ نِمام، اَرِیَگه وخد مِه هَنی کامل نَرَسیَ.» 9عیسی یَه وِتی ئو مَن اِنوم جلیل.
10مِنتائای دُما یَگه بِرالی اَرِه اَ عِدَ چِن، ووژیشی چی، مِنتائای نه وَه آشگارا بلکِم وَه بی‌کِشکی. 11اَسَه یهودیَل، اِنوم عِد مِنِی اوئنَ مَهَرد، مَپِرسیائو: «اَ پیا هار کو؟» 12ئو اِنوم مردِم اِبارَه او فِچ‌َفِچ فِرِه‌ی بی. بِری موئِتو: «پیا خوئی کَ.» مِنتائای بِری‌تِر موئِتو: «نه! بلکِم مردِم اژ رئی اِرَماری.» 13وَه ایی حالا اَرِیَگه اژ یهودیَل زِلَئونَ مَچیا، هُیچ‌کس اِبارَه او آشگارا قصَه نِمَهَردی.
14وخدی گه نِصمی اژ هفتَه عِد چوئی، عیسی هات اِنوم قِلا معبد ئو بِنیا ناتی اَر تیَلیم دائِن. 15یهودیَل بِلُجوئیو هات، ئو مَپِرسیائو: «ایی پیا گه درس شریعت نَحیوَنیَسی، اَنی چطورَ مَتونی هُنَ ساواتی داشدوئیتی؟» 16عیسی جوواو داءَ بینو، وِتی: «تیَلیمَل مِه اژ ووژِم نیَ، بلکِم اژ اَوَه‌‌سَ گه مِه کِل‌کِردیِ. 17اَرّ کسی اِراسی بِیتی خواس خدا اَنجوم بِ، مَفیَمی گه ایی تیَلیمِلَ اژ جونِم خداءَ یاگَه مِه اژ ووژمَ موشِم. 18اَوَه گه اژ ووژَ موشی، ها دُم جِلال ووژا، مِنتائای اَوَه گه ها دُم جِلال کِل‌کَر ووژا، راس‌وَشَ ئو اِنوم او هُیچ دِروئی نیَ. 19مَر موسی شریعت ناسیَ هُمَه؟ وَه ایی حالا هُیچ‌کُم اژ هُمَه شریعت نِمارینونَ جا. اَرِه‌چَه مِتو مِه بِکُشینو؟» 20مردِم جوواوُ دا: «تو مِلاکَت دیرین! کی میا تو بِکُشی؟» 21عیسی جوواو داتی ئو وِتیَ بینو: «مِه یِه مُجِزَه‌م کِرد ئو هُمَه کُل اژ اَ مُجِزَه بِلُجوئیتو هات. 22موسی حکِم ختینَه داءَ بینتو -اَلوَت ایی حکمَ نه اژ موسی بلکِم اژ اَژداد قوم بی- ئو هُمِه‌یش اِ روژ شَمَه مقدّس کُرَل ختینَه مِهِینو. 23اِسَه اَرّ کُرَل اِ روژ شَمَه ختینَه موئن تا شریعت موسی نَشکی، اَرِه‌چَه آگِرتون اَژی چیَ گه اِ روژ شَمَه سِلامتی کاملِم داءَ کُل لار اِنسونی؟ 24اَر رُی ظاهر قضاوت نَهَن، بلکِم وَه حخ قضاوت بِهَن.»
یانی ماو یَه اَ مسیحَ بو گه باس بای؟
25اَسَه، بِری اژ مردِم شیَر اورشلیم وِتو: «مَر یَه هَراَوَه نیَ گه میا بِکُشِنی؟ 26سِیل کَن چطور هَراَ آشگارا قصَه مِهِه ئو کسی هُیچَ بی نِموشتی! یانی ماو کَلِنگَل قوم اِراسی فیَموئین گه او هَراَ مسیحَسَ گه باس بای؟ 27ایمَه مَذانیم ایی پیا کوئی کَ، مِنتائای وخدی مسیح بای، هُیچ‌کس نِمَذانی کوئی کَ.» 28اَسَه عیسی موقَع تیَلیم دائِن اِنوم معبد، وَه دَنگ کَلِنگ وِتی: «مِنَ مَشتاسینو ئو مَذانینو کوئی کِم. مِنتائای مِه اژ جونِم ووژِم نِهاتِمَ. اَوَه گه مِه کِل‌کِردیَسی، حخَ؛ ئو هُمَه او نِمَشتاسینو. 29مِنتائای مِه اوءَ مَشتاسِم، اَرِیَگه مِه اژ اوئِم ئو او مِه کِل‌کِردیَسی.» 30اَسَه هِستو عیسی بِگِرِن، مِنتائای هُیچ‌کس دس اَری دِریژ نَهَرد، اَرِیَگه هَنی وخد او نَرَسوئی. 31وَه ایی حالا، ویشتِر مردِم ایمونونَ بی آوِرد. اونَل موئِتو: «یانی وخدی مسیح بای ویشتِر اژ ایی پیا نشونَه ئو مُجِزَه مِهِه؟»
32رَسیَ گوش شیخَل فرقَه فَریسی گه مردِم اِبارَه او هُنَ فِچ‌َفِچونَ. اَسَه رِئیسَل کاهنَل ئو فَریسیَل، قِلااورَل معبدو کِل‌کِرد تاگَه بِگِرِنی. 33اَسَه عیسی وِتی: «مِدتی‌تِر هامَ گَردتو، ئو دُما یَه مَچِم اَرِه تک اَوَه گه مِه کِل‌کِردیَسی. 34مِنِیمَ مِهِینو، مِنتائای مِنَ دی نِمِهِینو؛ اورَه گه مِه هم، هُمَه نِمَتونینو باینو.» 35اَسَه یهودیَل موئِتونَ یَکتِری: «ایی پیا میا بِچو اَرِه کو گه ایمَه نِمَتونیم بِهِیمیَ دی؟ یانی مِه بِچو اَرِه تک یهودیَلی گه اِنوم یونانیَل پَشخِ‌پِلاآ بینَ ئو تیَلیم بیَ یونانیَل؟ 36مصقود چَه بیتی گه وِتی، ”مِنِیمَ مِهِینو، مِنتائای مِنَ دی نِمِهِینو؛ ئو اورَه گه مِه هم، هُمَه نِمَتونینو باینو“؟»
جوئَل آو ژییاین
37اِ روژ آخِر هفتَه عِد گه روژ کَلِنگ بیتی، عیسی هوسیا ئو وَه دَنگ کَلِنگ وِتی: «هر کی تینیئَسی، با اَرِه تک مِه ئو خُرّ دِ. 38هر کی ایمو اَر مِه باری، هَراَ جورَ گه نُسَخ مقدّسَ موشی، اژ دل او جوئَل آوَ مَکُوءِ رئی، گه ژییاینَ موئَشخی.» 39ایی قصَه اِبارَه روحِ خدا وِتی، گه اونَلی گه ایمو بارنیَ بی، اَوَه مَهَنَ دی؛ اَرِیَگه هَنی روحِ خدائونَ بی نائین، اَرِیَگه عیسی هَنی جِلال نَگِرتوئیتی.
مردِم اَر سر عیسی موئنَ دو دسَه
40بِری اژ مردِم، وخدی ایی قصَه‌لونَ شنَفت وِتو: «اِراسی گه ایی پیا هَراَ پِخَمَرَسَ گه باس بای، گه موسی اَژی وِتیَ.» 41کسَلی‌تِر وِتو: «یَه هَراَ مسیحَسَ گه باس بای.» مِنتائای کسَلی‌تِر پِرسیو: «مَر مسیحی گه باس بای اژ جلیلَ مای؟ 42مَر نُسَخ مقدّس نوئتیَسی گه مسیح اژ نسِل داوودِ پاتِشاءَ ئو اژ بِیت‌لِحِم، اَ آبادیَ گه داوود اِنومی زِنِه‌یَ مَهَردی، مای؟» 43اَسَه اَرسر عیسی مردِم بینَ دو دسَه. 44بِری مِهِستو عیسی بِگِرِن، مِنتائای هُیچ‌کس دس اَری دِریژ نَهَرد.
45اَسَه قِلااورَل معبد گِلوناهُارد اَرِه تک رِئیسَل کاهنَل ئو فَریسیَل. اونَل اَژینو پِرسین: «اَرِه‌چَه اوتو ناوِرد؟» 46قِلااورَل جوواوُ دا: «تا اِسگَه، کسی اِجور ایی پیا قصَه نَهَردیَسی!» 47اَسَه فَریسیَل وِتو: «مَر هُمِه‌یش فَنتو هُاردیَ؟ 48مَر اژ کَلِنگَل قوم یاگَه فَریسیَل کسی هَس گه ایمو آوِردوئیَ بی؟ 49اَلوَت گه نه! مِنتائای ایی مردِمَ گه چیئی اژ شریعت نِمَذانِن، هانِ ژیر لیَنَت‌اِر.»
50نیقودیموس، گه وِرِکار چوئی اَرِه تک عیسی ئو یَکی اژ فَریسیَل بی، وِتی: 51«یانی شریعت ایمَه، بی‌یَگه اول قصَه کسی بِشتوءِ ئو بِذانی چَه مِهِه او مَکومَ مِهِه؟» 52جوواوُ دا، وِتو: «مَر تونیش جلیلی کین؟ بِچُ پِرسِ‌جو کَ ئو بوئین گه هُیچ پِخَمَری اژ جلیل هیزنَگِرتیَسی.» 53[دُما یَه اونَل هر کُم چِن اَرِه مال ووژو.
Zur Zeit ausgewählt:
یوحنا 7: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
