یوحنا 2
2
مُجِزَه اِنوم داوات
1روژ سِئِم، اِنوم آبادی قانا اِ هیال جلیل داواتی بی ئو دا عیسی‌یش اَر اورَه بیَ. 2عیسی ئو شاگردَل‌یشی دَنگ بوئین اَرِه داوات. 3وخدی شِراو بِن‌بِرّ بی، دا عیسی وِتیَ او: «شِراو نِرِن!» 4عیسی وِتَ بی: «اِ ژَن، مِه وَه ایی کارَ چَه؟ سات مِه هَنی نَرَسیَ.»
5دای وِتیَ خِلمتکارَل: «هر چی موشیَ بینتو، اَنجوم دَن.» 6اَر اورَه شَش خمرَه بَردین بی گه یهودیَل اَرِه آداو پاکی موئردونِ کار، هر کُم نزیک اَر صد ئو بیس لیتر جائو داشد. 7عیسی وِتیَ خِلمتکارَل: «ایی خمره‌لَ اژ آو پِرا کَن.» اَسَه اونِئونَ نِقُ‌نِق پِرا کِرد. 8اَسَه وِتیَ بینو: «اِسگَه قِیلی اَژی هیزدَنی ئو بیَرن اَرِه تک رِئیس مِجِلیس.» اَسَه بِردو. 9وخدی رِئیس مِجِلیس اژ آوی گه بوئیَ شِراو، چَشتی. او نِمَذِناسدی اَ شِراوُنَ اژ کو آوِردیَ، مِنتائای خِلمتکارَلی گه آوُ کیشوئی، مَذِناسدو. اَسَه رِئیس مِجِلیس هِنا کِردی اَر ذُما 10ئو وِتَ بی: «کُل کس اول‌بار وَه شِراو خاص مِمونَلیَ ماوژیِ رئی ئو وخدی مِمونَل مَس بین، شِراو اَرزُتِرَ ماری؛ مِنتائای تو شِراو خاصِهَت تا اِسگَه هُیشتیَ!»
11یَه اوّلین مُجِزِه ئو نشونه‌ی بی گه عیسی اِنوم آبادی قانا اِ جلیل اَنجوم داتی ئو جِلال ووژ آشگار کِردی ئو شاگردَلی ایمونو آوِردَ بی.
12دُماخِرِ وَه‌گَرد دا ئو بِرال ئو شاگردَلی چی اَرِه شیَر کَفَرناحوم، ئو چَن روژی مَنِن اَر اورَه.
عیسی معبد تَمیسَ مِهِه
13وخدی نزیکَل عِد پِسَخ یهودیَل بی، عیسی چی اَرِه شیَر اورشلیم. 14اِنوم قِلا معبد، دیتی گه بِری دیرِن گا ئو می ئو کموتِرَ مَفِروشِن، ئو صرافَل‌یش اَر اورَه نیشتِن اَرِه کَسمِ‌دَرُمِه. 15اَسَه عیسی شلاخی اژ قَرص دُریس کِردی ئو کُل اونَل وَه‌گَرد گائَل ئو دونیائَل، اژ معبد کِردیَ دِریر. ئو سکَه‌ل صرافَل رِشونی اَر زَمی ئو تختَلو چاوارشا کِردی، 16ئو وِتیَ کموترفِروشَل: «یوئنِلَ اژ ایرَه بیَرنَ دِریر، ئو مال باوَه‌م نَهَن جا کَسمِ‌دَرُمِه!» 17اَسَه شاگردَلی کَتنِ ویر یَگه اِنوم کِتاو زبور نُیسیاءَ: «خیرَت اَرِه مالِت مِنَ مَسُزِنی.» 18اَسَه یهودیَل وَه خاطر ایی کارَلیَ وِتو: «چه مُجِزِه ئو نشونه‌ی نشونمونَ مِین تاگَه بِذانیم صِلا هُنَ کارَلی دیرین؟» 19عیسی جوواو داءَ بینو ئو وِتی: «ایی معبدَ بِرِمِنِن گه مِه اِدوارَه سه روژَ ماوژِمی.» 20یهودیَل وِتو: «چِل ئو شَش سال طویل کیشیِ تاگَه ساخدِمو ایی معبدَ باوژِن، ئو اِسگَه تو میا سه روژَ باوژینی؟» 21مِنتائای معبدی گه عیسی اَژی قصَه مَهَرد، لار ووژ بیتی. 22اَسَه وخدی گه عیسی اژ مِردیَل زِنیا بی، شاگردَلی ایی قصَه‌ل اوُنَ آوِردَ ویر، ایمونو آوِرد اَر نُسَخ مقدّس ئو قصَه‌ل او.
23وخدی گه عیسی اَرِه عِد پِسَخ اِنوم شیَر اورشلیم بی، فِرَه کسَل وَه مُجِزَه‌ل ئو نشونَه‌لی گه وَه چیَمونَ موئینیا، ایمونو آوِرد اَر نُم او. 24مِنتائای عیسی وَه ایمونو اِتِماد نَهَردی، اَرِیَگه کُلونَ مَشتاسیاتی 25ئو نیاز ناآشدی کسی اِبارَه اِنسو چیئی بوشتیَ بی، اَرِیَگه ووژَ مَذِناسدی چَه ها نوم دَرین اِنسون‌اِر.
Zur Zeit ausgewählt:
یوحنا 2: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
