یوحنا 10
10
اَز شُوانه قَنجِم
1«بَراستی، بَراستی، اَز بُ وَ دِبِژِم، اَوه گو دَری دا نَچیتَ ناو گُیا پَزی دا، بَلگو دیواره دا ژِلَل بِچیت گو رِیَگه دی دا بِچیتَ ژُر، دِز و رِبِرَ. 2بله اَوه گو دَری دا دِچیتَ ژُر، شُوانه پَزیَ. 3نُبَدار دَری سَر ویدا وَدِگَت. پَز دَنگا وی دِبیهیست و اَو پَزه خو بِ ناو گاز دِگَت و اَوان دِبَتَ دَروَ. 4وقته اَوی تواوی پَزه خو بِرَ دَروَ، پِش واندا دِچیت و پَز ژی دوو ویدا دِچیت، چون گو دَنگا وی ناس دِگَن. 5بله چه جارا دوو بیانیَگه دا ناچِن، بَلگو ژه وی دِحلِن، چون گو دَنگا مِرُوِت بیانی ناس ناگَن.» 6عیسی اَو مَثَلَ گُتَ وان، بله اَوان فام نَگِر گو اَو چه دِبِژیتَ وان.
7بَهنده عیسی جارَگه دی گُتَ وان: «بَراستی، بَراستی، اَز بُ وَ دِبِژِم، اَز بُ پَزی، دَرِم. 8اَونه گو پِش مِدا هاتِن، همو دِز و رِبِرِن، بله پَزی گوهه نَدا وان. 9اَز دَرِم؛ هَچی کَسه بِ واسِطا مِن بِتَ ژُر دیه نجاته پَیدا گَت، و دیه بِت ژُر و بِچیتَ دَروَ و دیه جیه چَره پَیدا گَت. 10دِز نایِت خِنجی بُ دِزیه و گُشتِن و بَین بِرِنه. اَز هاتِمَ گو مِرُوا ژیان هَبِن و ژه وه ژیانه گَلَک زِدَ هَبِن.
11«اَز شُوانه قَنجِم. شُوانه قَنج جانه خو رِیا پَزی دا دِدَت. 12مِرُوَگ گو بُ دِراوی شُل دِگَت و شُوان نینَ و پَز ژی یه وی نینَ، کَنگه بِبینیت گْر دِت، پَزی دِهلیتَ جی و دِحلِت و گْر ناو وان دِکَویت، اَوان دِبَت و پَلاتَیی دِگَت. 13اَو مِرُو دِحلِت، چون گو اَو تِنه بُ دِراوی شُل دِگَت و گوهه خو نادَتَ پَزی. 14اَز شُوانه قَنجِم. اَز پَزه خو ناس دِگَم و پَزه مِن ژی مِن ناس دِگَن، 15هَ وِسا گو بابو مِن ناس دِگَت و اَز ژی بابو ناس دِگَم. اَز جانه خو رِیا پَزی دا دِدَم. 16مِن پَزه دیتِر ژی هَنَ گو ژه وه گُیه نینِن. اَز دِبی اَوان ژی بینِم و اَو ژی دیه گوهه بِدَنَ دَنگا مِن. بَجا دیه بِبِنَ یگ هِشَم و یگ شُوان. 17بابو، بَر خاطره وه هِنده هَژَ مِن دِگَت گو اَز جانه خو دِدَم گو اَوه دیسا بِستینِم. 18چه کَس جانه مِن ژه مِن ناستینیت، بَلگو اَز اَوه بِ دله خو دِدَم. مِن اقتدار هَیَ گو اَوه بِدَم و مِن اقتدار هَیَ گو اَوه دیسا بِستینِم. اَو اَمرَ مِن ژه بابه خو اِستاندیَ.»
19بَر خاطره وان قِسانَ، دیسا جُداتی کَتَ ناو یهودیادا. 20گَلَکه وان گُتن: «اَوی جن هَیَ و دینَ؛ بُچی اون گوهه خو دِدَنَ وی؟» 21اَونه دی گُتن: «اَونَ قِسه مِرُوَگه جن هَیی نینِن. ما جن دِگاریت چاوه گُورَیا وَگَت؟»
اَز و باب اَم یگِن
22عَیدا وَقفا معبدا یهودیا اورشلیمه دا گَهَشته بو. زِستان بو 23و عیسی حَوشا معبده دا، ناو اِیوانا سلیمان پاشادا ره دِچو. 24یهودی خِر بونَ دُرا وی و گُتنَ وی: «حَتا کَنگه تِ دِخازی مَ ناو شِگه دا خُدان گَی؟ هَگو تِ مسیحی، آشگَرا بِژَ مَ.» 25عیسی جیوابا واندا گُت: «مِن گُتَ وَ، بله اون باوار ناگَن. شُله گو اَز بِ ناوه بابه خو دِگَم، سَر مِن شَهادَته دِدَن، 26بله اون ایمانه ناینِن، چون گو اون ژه پَزه مِن نینِن. 27پَزه مِن گوهه خو دِدَنَ دَنگا مِن؛ اَز اَوان ناس دِگَم و اَو دوو مِدا تِن. 28اَز ژیانا اَبَدی دِدَمَ وان، و اَو چه جارا بَین ناچِن. چه کَس نِگاریت اَوان ژه دَسته مِن بِدِزیت. 29بابه مِن گو اَو دانَ مِن ژه همویا مَزِنتِرَ، و چه کَس نِگاریت اَوان ژه دَسته بابو بِدِزیت. 30اَز و بابو اَم یگِن.»
31ایجا جارَگه دی یهودیا بَر راگِرِن گو اَوی سنگسار گَن. 32عیسی گُتَ وان: «مِن گَلَک شُله قَنج ژه آلیه بابو نیشا وَ دانَ. بَر خاطره کیشگَ وان اون دِخازِن مِن سنگسار گَن؟» 33یهودیا جیواب دان: «بَر خاطره شُلا قَنج نینَ گو اَم تَ سنگسار دِگَن، بَلگو بَر خاطره هِنده گو کُفریا دِگَی، چون گو تِ انسانی و خو دِگَی خدا.» 34عیسی جیوابا واندا گُت: «ما ناو شِریعَتا وَدا نَهاتیَ نِویساندِن گو”مِن گُت، اون خدایانِن“؟ 35هَگو اَونه گو کلاما خدا گَهَشتَ وان، ”خدایان“ هاتنَ گاز گِرِن - و نِویسارِت مُقدس به هِتبار نابِن - 36اون چاون دِگارِن بِژِنَ اَو کَسه گو بابو اَو وَقف گِریَ و رِگِریَ دُنیایه، ”تِ کُفریا دِگَی،“ تِنه ژه بَر خاطره هِنده گو مِن گُت اَز گوره خدامَ؟ 37هَگو اَز شُله بابه خو ناینِمَ جی، قِسا مِن باوار نَگَن. 38بله هَگو اَز وان تینِمَ جی، حتا هَگو اون قِسا مِن باوار ناگَن، ایمانه بیننَ وان شُلا، گو اون بِزانِن و فام گَن گو بابو ناو مِدایَ و اَز ناو بابودامَ.» 39ایجا یهودیا جارَگه دی خاستِن عیسی بِگِرِن، بله اَوی ناو دَسته واندا خو هاوِت.
40عیسی جارَگه دی چو آلیه دیَ چَمه اردنه، اَو جیه گو یحیا پِشتا وِدَره غُسلا تعمیده دِدا، و ما وِدَره. 41گَلَک مِرُو هاتنَ لاره وی. اَوان دِگُتن: «یحیا چه نیشان، نیشان نَدان، بله هَچی دِشدا گو یحیا راستا وی مِرُوی دا گُت، راست بو.» 42بَجا گَلَکا وِدَره ایمان اینانَ عیسی.
Zur Zeit ausgewählt:
یوحنا 10: SKB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
