ARING KELESING 1
1
Lung aring kelesing usun tana
1Men aring-aring kelesing en Tuhan Allah na nah langit dahin usun tana anih. 2Bi usun tana anih nusi' payan ha' sayu jam na', halah tua, dahin ha' lidem tua lahuh. Nei nah Beluan Tuhan Allah madang nyelibau ata' atih. 3#2 Kor 4:6 Iha' nah Tuhan Allah kuma', “Sayu nah té' alah,” pelalau té' nah alah. 4En Tuhan Allah nyineng nah alah atih, sayu lan jam na', pelalau Tuhan Allah telesen nah malah men lidem. 5En Tuhan Allah na nah aran alah atih Ngedau, dahin aran lidem atih Malem. Men levi ateng jihima, ateng levi la'an, atih nah malem dahin dau aleng una'.
6 #
2 Pet 3:5
Ken Tuhan Allah pah la'an, “Sayu na Akui na hang marung belua ata' anih, ja ata' anih tei petat.” 7En Allah petmei nah hang na', en Na' telesen nah ata' aleng hida men ata' aleng hujung, anan pah la'ung awi dahun Na' anan. 8En Allah na aran aleng hujung atih langit. Men levi ateng jihima, ateng levi la'an, atih nah malem dahin dau aleng kedua'.
9Duan pah Allah la'an, “Sayu lim ata' aleng hida langit pepeng té' ji ngavan, ja ha' té' tula aleng tegang.” Lim anan pah la'ung awi dahun Na' anan. 10Pelalau Tuhan Allah na aran aleng tegang anan tana, dahin aran ata' atih banget. En Tuhan Allah nyineng nah lim na', sayu lan. 11Ken Tuhan Allah pah la'an, “Sayu na usun tana menei uro', dahin uro' aleng té' uang na', dahin na'an-na'an kayo' aleng ngebua, aleng té' uang halem na'.” Nunan nah Iha' pela'ung anan. 12Iha' nah uro' murip té' usun tana, dahin na'an-na'an uro' aleng té' uang, dahin na'an-na'an iung kayo' aleng ngebua, aleng té' uang halem na', anan pah té' lahuh. En Tuhan Allah nyineng, sayu lan-lan nah jam na'. 13Men levi ateng jihima, ateng levi la'an, atih nah malem dahin dau aleng ketlo'.
14Kuma' pah Allah la' an, “Sayu ha' té' kuri-kuri ket malah ha' langit, aleng petula dau dahin malem, ja ket atih jadi' ji telana' ngavan daha' jam jaka' dau dahin jaka' duman lahuh. 15Sayu ket anan malah ha' langit, dahin menei alah ha' usun tana lahuh.” Lim anan pah té' awi dahun Na' anan. 16Tuhan Allah na nah dua' ket aleng malah aya'. Alah aleng dekaya' atih, iha' nah matan dau aleng tula ngedau. Aleng malah uk atih, iha' nah bulan aleng tula tegu malem. Iha' pah na lim kelawing lahuh. 17En Tuhan na nah lim ket anan ha' langit ja ket anan na usun tana malah, 18ja ket anan ngeligem dau dahin malem, ket anan nah metat alah men lidem. 19En Allah nyineng sayu lan-lan nah jam na' lim. Men levi ateng jihima, ateng levi la'an, atih nah malem dahin dau aleng kepat.
20Ken Tuhan Allah pah la'an, “Sayu nah alem ata' té' peng lideng ket aleng murip halem na', dahin manuk aleng madang bau men usun tana.” 21Tuhan Allah na tulan-tulan aya' alem banget, dahin lim-lim na'an masik aleng ngimet aleng panau alem ata', dahin lim-lim na'an manuk. En Allah nyineng pah atih, sayu lan-lan pah. 22En Tuhan Allah puboh nah lim ket anan, Iha' pah kuma' men daha', “Katan nah ikam nei kahum ngepnu ata' banget, nunan pah lim manuk-manuk té' usun tana nei katan lahuh.” 23Men levi ateng jihima, ateng levi la'an, atih nah malem dahin dau aleng kelima'.
24Ken Tuhan Allah pah la'an, “Sayu nah usun tana musang lim-lim na'an tulan aleng murip, lim tulan aleng panau dahin lim-lim na'an ket aleng nganap té' usun tana.” Lim anan pah té' awi dahun Na' anan. 25Allah pah na lim-lim na'an tulan aleng jera', dahin lim-lim na'an hulung dahin na'an ket aleng nganap té' ji usun tana anih. Tuhan Allah nyineng pah lim-lim anan, sayu lan-lan.
26 #
1 Kor 11:7
Ken Tuhan Allah pah la'an, “Sayu Telo' na kelunan ngioh awi barik Telo', ja ha' dawa' si' aleng dekaya' hujung lim masik alem banget, dahin manuk ha' ida langit nih, nunan pah jujung lim-lim na'an tulan aleng panau té' usun tana.” 27#Mat 19:4; Mk 10:6 Tuhan Allah na kelunan ngioh barik Na', en Na' na nah dawa' awi barik Na', ji laké' ji doh. #Ar Kel 5:1-2 28Allah pah masi dawa', dahin kuma' men dawa', “Nganak nah kua' ja kua' nei ngahum ateng sau kua' nei katan, ngepnu usun tana anih, dahin sayu nah kua' aleng dekaya' hujung lim masik alem banget dahin manuk aleng madang dahin lim tulan aleng panau té' usun tana anih.” 29Ken Tuhan Allah pah la'an, “Nyineng, Akui ma'uk men kua' lim-lim ket aleng murip aleng té' uang té' usun tana dahin kayo' aleng té' uang alem bua na', anan nah aleng seng kanen kua'. 30Té' pah men lim-lim tulan ha' usun tana dahin manuk lahuh dahin lim ket aleng panau té' usun tana, dahin aleng té' henga', Akui ma'uk ketu-ketu uro' kanen daha'.” Lim anan pah la'ung awi dahun Na' anan. 31Tuhan Allah nyineng lim-lim ket aleng Na' na anan, kelalau sayu nah jam na'. Men levi ateng jihima, ateng levi la'an, atih nah malem dahin dau aleng kenem.
Zur Zeit ausgewählt:
ARING KELESING 1: TDK1990
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible in Today's Dahun Kayan Version © Bible Society of Malaysia, 1990.
