मत्ती 6
6
दानेन बारामां ईसु सीकाड़े
1“चेतीन रहु! तुहुं माणसे काजे देखाड़ने वाटे आपणा वारु काम मां करु, नी ते आपणा सरग वाळा बास सी काय बी फळ#6:1 फल नी जड़से।”
2तेरेमां जत्यार तु दान करे, ती आपणे अगळ फेप्यो मां वाजाड़े, काहाकी भक्तीन घर मां ढंगड़ा असात करे, चे ते गळ्ये ने दीसरा माणसे सी बड़ाय चाहे। मे तुहुंक छाचलीन कहं, तीनुक हींद्री बड़ायन फळ पेहलुत जड़ गुयो। 3बाकुन जत्यार तु दान करु, ती जु तारु जेवड़्यु हात अगु करे, तीना काजे तारु डाखर्यु हात नी जाणनु चाहजे। 4तुंद्रो धरम करलो काम सातायलो रवसे ती, तुंद्रा सातायला धरमेन कामेक देखण्यु भगवान बास तुहुंक ईनाम आपसे।
भगवान धड़े कसी दुवा करनु करीन ईसु सीकाड़े
(लुका 11:2-4)
5जत्यार तु दुवा#6:5 प्रार्थना करे, ती ढंगड़ा करन्या माणसेन तसा घुण करु, काहाकी माणसे काजे देखाड़ने वाटे भक्तीन घर मां ने सयड़केन मुड़ मां उबा रय्न दुवा करनु, तीनु काजे वारु लागे। मे तुंद्रे सी छाचलीन कहं की चे हींद्रा कामेन फळ ली लेदा। 6बाकुन जत्यार तुहुं दुवा करु, ती आपणा घरेन कपरा मां जाय्न; बारनो दीन आपणा भगवान बास सी दुवा करजु। ती सातायली वात देखण्यु तुंद्रु भगवान बास तुहुंक ईनाम आपसे।
7दुवा करनी वेळाय नी-यहुदी माणसेन तसा बक-बक घुण करु, काहाकी चे समजे की हींद्रे अदुस बुलने सी हींद्री सामळी लेसे। 8तेरेमां तुहुं हींद्रेन तसा मां बणु, काहाकी तुंद्रु बास तुंद्रे मांगणे सी पेहलुत जाणे की तुहुंक काहनी चीजेन जरुवत छे। 9तेरेमां तुहुं असा दुवा कर्या करु की:
ए हामरा सरग वाळा भगवान बास, तु जु सरगे मां छे:
तारो नाव चुखलो#6:9 पवित्र मानायणु चाहजे;
10तारो राज आवे तारी मरजी जसी सरग मां पुरी हवे,
तसीत ईनी धरती पर बी पुरी हवे।
11दाहड़ीन हामुक चाहजे ततरोत खाणो आप्या कर।
12ने जसा हामु हामरा गुना वाळा काजे माफ कर्या, तसुत तु बी हामरा गुना काजे माफ कर।
13ने हामुक पारख मां घुण पाड़े,
बाकुन कुहराय सी बचाड़; काहाकी राज ने ताकत ने सेक-सींगार जलम तारीत छे। आमीन।
14तेरेमां कदी तुहुं माणसेन गुना माफ करसु, ती तुंद्रु सरग वाळु भगवान बास बी तुहुंक माफ करसे। 15ने कदी तुहुं माणसेन गुना माफ नी करु, ती तुंद्रु सरग वाळु बास बी तुहुंक माफ नी करे।
उपासेन बारामां ईसु सीकाड़े
16जत्यार तुहुं उपास करु, ती ढंगड़ा करन्या माणसेन तसा तुंद्रा मुंहडा पर नुरपाणी नी उतार्नु चाहजे, ने चे हींद्रा मुंहडा लागाड़ रवे, काहाकी माणसे तीनुक उपास छे करीन जाणे। मे तुहुंक छाचलीन कहं की चे हींद्रो फळ ली लेदला छे। 17बाकुन जत्यार तुहुं उपास करु ती, आपणा मुणका पर तेल लागाड़ीन मुंहडो धुवजु, 18असा उपास करु ती, माणसेक मालुम नी पड़े, बाकुन भगवान बास काजे मालुम पड़से जी सातायली वात जाणे चु तुहुंक ईनाम आपसे।
सरगे मां छाचलो धन भेळो करनेन बारामां ईसु सीकाड़े
(लुका 12:33,34)
19आपणे वाटे धरती पर धन भेळो मां करु, जाहां वेधु खाय जाय ने कीटी लाग जाय, ने चां चुट्टा धाड़ु पाड़ीन ली जाती रवे। 20बाकुन आपणे वाटे सरग मां धन भेळो करु, चां नीते वेधु खासे, ने नी कीटी लागे ने नी चुट्टा धाड़ु पाड़ीन चुरी करे। 21काहाकी चां तुंद्रो धन छे, चां तुंद्रो मन बी रवसे।
डीलेन वीजाळो
(लुका 11:34-36)
22डीलेन#6:22 शरीर दिवु डुळु छे। तेरेमां कदी तारु डुळु वारु छे, ती तारो आखो डील बी वीजाळा मां रवसे! 23बाकुन कदी तारु डुळु भुंडु छे, ती तारो आखो डील बी आंदारला मां रवसे; तेरे वजे सी चो वीजाळो तारे मां छे, कदी आंदारलो छे, ती चो आंदारलो कतरो मटो हवसे।
ईसु सीकाड़े की, डीलेन फीकुर मां करु, बाकुन भगवान पर भुरसु करु
(लुका 16:13; 12:22-31)
24कुय माणसे दुय मालीकेन चाकरी नी कराये, काहाकी चु एक मालीक सी कुहराय ने दीसरा सी परम सी रवे, नीते एक मालीक साते हेळी-मेळीन रवसे ने दीसरा मालीक काजे भुंडोत जाणसे। तुहुंक भगवानेन ने धन-दोवलतेन दुयुन चाकरी नी कराये।
25तेरेमां मे तुंद्रे सी कहं, की आपणा जीवेन वाटे जी फीकुर मां करु की हामु काय खासुन ने काय पीसुन; ने आपणा डीले पर काय पेहरसुन। ने काय जीव खाणा ने डील ने पुथल्या सी महंगो नी हय? 26सरग वाळा चिरला काजे देखु! चे नीते वेरे, नीते काटे, ने नी खळा मां भेळो करे; तेबी तुंद्रु सरगेन बास तीनुक खावाड़े। काय तुहुं चिरला सी बेसका महंगा नी हय? 27तुंद्रे मां असु कुण छे, चु फीकुर करीन आपणी उमर काजे बड़ाय सके? कुय नी।
28ती हामरे धड़े पुथल्या नी हय करीन फीकुर काहा कर रया? तुहुं खेतेन फुलेक देखीन वीच्यार ते करु, चे कसाक अदे! ने चे तींद्रे वाटे मेहनत बी नी करे, ने तींद्रे वाटे दुरा काटीन पुथल्या बी नी बणावे। 29तेबी मे तुंद्रे सी कहं की सुलेमान राजु बी, बेसकु ठट-बट मां रवतेलु, बाकुन तेबी तीना काजे तीनु फुले मायन एकान तसों बी पुथल्या पेहरीन वारु नी बणायो। 30तेरेमां तत्यार भगवानेन खळा मायन चारा काजे, चो आज छे ने वाहणे चुल्हा आकठा मां धपाड़से, असला पुथल्या पेहरावे, ती ए कम भुरसु करन्या, तुहुं जाराक वीच्यार करु भगवान तुहुं नी पेहरावे काय।
31तेरेमां तुहुं फीकुर करीन घुण कहुं की, हामु काय खासुन, ने काय पीसुन ने काय पेहरसुन। 32काहाकी नी-यहुदी तीनी आखी चीज काजे हेरता रहे, बाकुन तुंद्रु सरगेन बास जाणे की, तुहुंक तीनी आखी चीजेन जरुवत छे। 33तेरेमां पेहल तुहुं भगवानेन राजेन ने तेरे धरमेन हेरेमां रहु, ती जी आखी चीज#6:33 वस्तुए तुहुंक जड़ जासे। 34अळतेन वाहणेन फीकुर मां करु, काहाकी वाहणेन दाहड़ु, आपणी फीकुर आपसो कर लेसे; आजुन वाटे आजुत दुख बेसको छे।
Zur Zeit ausgewählt:
मत्ती 6: NTBSP23
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
