Иоанн 1

Үгэ хадаа хүн боложо түрөө

1Эхинэй эхиндэ Үгэ#1:1 Үгэ – иигэжэ Иоанн Иисүүсые нэрлэнэ. байһан юм. Тэрэ болбол Бурхантай хамта байгаа. Тэрэ хадаа Бурхан мүн байгаа. 2Үгэ болбол эхинэй эхиндэ Бурхантай хамта байгаа. 3-4Бүхы юумэн Үгөөр лэ бүтээгдээ, нэгэшье бүтээгдэһэн юумэн Тэрээнгүйгөөр бүтээгүй. Тэрэ Өөрөө бүхы амидаралай эхин мүн. Амидарал гээшэ бүхы хүнүүдые гэрэлтүүлдэг Гэрэл туяа мүн. 5Гэрэл туяа болбол шэг харанхы соогуур сасаран гэрэлтэдэг, тиин шэг харанхы Гэрэл туяае һүнөөжэ шадахагүй.

6Иоанн гэжэ нэрэтэй хүниие Бурхан эльгээһэн байна. 7Гэрэл туяагай ерэхэ тухай гэршэлхэеэ Иоанн ерээ. Тэрэнэй гэршэлэлгын ашаар бүхы хүнүүд гэрэл туяада этигэхэ ёһотой байгаа. 8Иоанн өөрөө Гэрэл туяа бэшэ һэн. Тэрэ Гэрэл туяагай гэршэнь һэн. 9Бүхы хүнүүдые гэрэлтүүлдэг жэнхэни Гэрэл туяа юртэмсэ дэлхэйдэ ерэдэг бэлэй. 10Тэрэ хадаа юртэмсэ дэлхэй соо байгаа, юртэмсэ дэлхэй Тэрээгээр зохёон бүтээгдэһэншье һаа, Тэрээниие дэлхэйнхид танибагүй. 11Гэрэл туяагай Өөһэдынхидтөө ерэхэдэнь, Өөһэдынхинь Тэрэнээ угтан абаагүй. 12Теэд Гэрэл туяае угтан абагшадта, Тэрээнэй алдар нэрэдэ этигэгшэдтэ Бурханай үхибүүд болохо эрхэ Тэрэ үршөөгөө. 13Тэдэ хүнэй хүсэл дуранһаа, эрын хүсэлэнһөө бүрилдөөгүй, харин Бурханһаа түрөө.

14Үгэ хадаа хүн боложо түрөөд, бидэнэй дунда амидаржа байгаа. Эсэгэ Бурханай ори ганса Хүбүүниинь үршөөл хайрын ба үнэн зүйлэй бэелэл байжа, бидэндэ һүр шадалаа харуулаа. 15Тэрээниие гэршэлэн Иоанн:

– Минии хойноһоо ябагша Намһаа нилээдгүй шухала, ушарынь гэхэдэ, Намһаа урда байгаа гэжэ хэлэхэдээ, би энэ Хүн тухай хэлээ һэм, – гэжэ айладхаа.

16Тэрэ Өөрынгөө хизааргүй ехэ, урданайхиһаа үлүү ехэ буян хэшэгтэ маниие хүртүүлээ. 17Бурхан Моисейгээр дамжуулан Хуули үгөө, харин Иисүүс Христоосоор дамжан, үршөөл хайра, үнэн зүйл үгтөө. 18Бурханиие хэншье, хэзээдэшье хараагүй. Бурхантай нэгэн хамта, Эсэгэдээ ойро дүтэ ори ганса Хүбүүниинь лэ Бурханиие юртэмсэ дэлхэйдэ харуулаа.

Уһаар Арюудхагша Иоаннай гэршэлэлгэ

19«Ши хэн гээшэбши?» гэжэ Иоаннһаа һураад ерэхыень еврейнүүдэй ахамадууд Иерусалимһаа санаартаниие болон левидүүдые#1:19 Левидүүд болбол Һүмэдэ ажал хэгшэд. эльгээбэ. 20Тиихэдэнь Иоанн:

– Би Бурханай табисуурта бэшэб, – гэжэ гэршэлэн сэхэ харюусаба.

21– Тиихэдээ ши хэн гээшэбши? Элияа гүш? – гэжэ тэдэнь һураба.

– Бэшэб.

– Ерэхэ ёһотой тэрэ лүндэншэ гүш?

– Бэшэб.

22– Тиихэдээ ши хэн болонобши? Шинии хэн байһые мэдээд ерэхыемнай эльгээһэн хүнүүдтэ бидэ харюу үгэхэ ёһотойбди. Ши өөр тухайгаа хэн байнаб гэжэ бодонош?

23– Минии тухай лүндэншэ Исай иигэжэ бэшээ һэн:

«Эзэндэ сэхэ зам гаргажа үгэгты гэжэ

хэн бэ даа сүл губида хашхарба».

24Эдэ һурагшалааша хүнүүдые фарисейнүүд#1:24 Фарисейнүүд болбол еврей шажанай шухала гурбан бүлгэмэй нэгэн болоно. Фарисейнүүд Моисейн Хуулиин бүхы зүйлнүүдые, мүн шажан тахилай дүримүүдые нарин нягтаар гүйсэдхэхые шаардана. Тэдэ Иисүүс Христоосто эсэргүүсэгшэд һэн. эльгээһэн байгаа.

25– Ши Бурханай табисуурта бэшэ, Элияа бэшэ, тэрэ лүндэншэ бэшэ аад, юундэ хүнүүдые уһаар арюудханабши? – гэжэ тэдэ һурана.

26– Би уһаар лэ арюудханаб. Теэд хэн гээшэб гэжэ таанарай мэдэхэгүй Хүн танай дунда бии. 27Минии хойноһоо Заларан ерэгшын гуталайнь ооһорыешье тайлаха эрхэгүйб, – гэжэ Иоанн харюусаба.

28Энэ бүхы ушар Иордан мүрэнэй саада бэедэ оршодог Бэтаани тосхондо болоо һэн. Тэндэ Иоанн хүнүүдые уһаар арюудхадаг байгаа.

29Хойто үдэрынь урдаһаань Иисүүсэй ерэжэ ябахые хараад, Иоанн иигэжэ хэлэбэ:

– Энэл хадаа Бурханда үргэгдэхэ Хурьган мүн. Энэл хадаа газар дэлхэйн бүхы хүнүүдэй хэһэн нүгэл хилэнсые Өөр дээрээ даажа абаха! 30«Минии хойноһоо ябагша намһаа нилээдгүй шухала, ушарынь гэхэдэ, намһаа урда байгаа», – гэжэ минии хэлэһэн Хүн – Энэ. 31Бурханай табисуурта хэнэй байһые би өөрөөшье мэдэхэгүй байгааб, теэд Тэрээниие бүхы израильшуудта танюулхын тула би зониие уһаар арюудхахаяа ерээб.

32Эдэ үгэнүүдээ Иоанн иигэжэ гэршэлэн хэлэбэ:

– Гулабхаагай дүрсэтэйгөөр тэнгэриһээ Арюун Һүлдын Тэрэнэй дээрэ буун тогтохые би хараа һэм. 33Би Тэрэниие мэдэхэгүй байгааб, теэд Бурхан уһаар лэ арюудхахыемни намайе эльгээхэдээ иигэжэ хэлэһэн юм: «Арюун Һүлдэ хэнэй дээрэ буужа тогтохые харанаш, Тэрэл хүнүүдые Арюун Һүлдөөр арюудхаха». 34Би эдэ бүгэдые хараа һэм, тиин Энэ Бурханай Хүбүүн мүн гэжэ би гэршэлнэб.

Иисүүсэй түрүүшын шабинар

35Хойто үдэрынь Иоанн баһал тэрэ һууридаа хоёр шабинартаяа хамта ерээд байба. 36Хажуугаарнь Иисүүсэй гаража ябахые хараад, Иоанн:

– Харагты, Энэл Бурханда үргэгдэхэ Хурьган мүн! – гэжэ хэлэбэ.

37Иоаннай хоёр шабинар тэдэ үгэнүүдыень дуулаад, Иисүүсэй хойноһоо ошобо. 38Иисүүс эрьежэ, хойноһоонь тэдэнэй дахажа ябахые хараад:

– Таанарта юун хэрэгтэйб? – гэжэ һураба.

– Рабби аа (еврей хэлэн дээрэ «багша» гэһэн удхатай), Та хаана байдагбта? – гэжэ тэдэнь урдаһаань асууба.

39– Намтай ябалсагты, өөһэдөө харахат, – гэжэ Иисүүс хэлэбэ.

Энэнь үдэрэй дүрбэн саг багаар һэн. Тэдэнь Иисүүстэй хамта ошолсожо, хаана байдагыень хараба, тиигээд тэрэ үдэртөө Иисүүсэйдэ байба. 40Иоаннай хэлэхые дуулаад, Иисүүсэй хойноһоо ябалсаһан хоёрой нэгэниинь Симон Пётрой дүү Андрей байгаа. 41Андрей өөрынгөө аха Симониие бэдэржэ олоод:

– Бидэ Бурханай табисууртые олообди, – гэбэ («Бурханай табисуурта» – грек хэлэн дээрэ «Христоос»).

42Андрей Симониие Иисүүстэ асаржа харуулба. Иисүүс тэрэниие анхаралтайгаар шэртэн хараад:

– Ши Иоаннай хүбүүн Симон байнаш. Теэд шамайе Кефа гэжэ нэрлэдэг болохо («шулуун» гэһэн удхатай, грек хэлэн дээрэ болбол «Пётр»), – гэбэ.

43Хойто үдэрынь Иисүүс Галилейн нютаг ошохо гэжэ шиидэбэ. Харгыдаа тэрэ Филипптэй ушараад:

– Минии хойноһоо яба! – гэбэ.

44Филипп болбол Андрей Пётр хоёрой ажаһуудаг Бэтсаидаа гэжэ хотын хүн байгаа. 45Филипп гээшэнь Натанаилые бэдэржэ олоод, тэрээндэ:

– Моисейн Хуули дотор, мүн лүндэншэдэй бэшэгүүд соо дурдагдаһан Хүниие олообди. Энэ хадаа Назарет хотын Иосифой хүбүүн Иисүүс гээшэ, – гэбэ.

46– Назаредһээ гэнэ гүш? Теэд Назарет сооһоо ямар нэгэн һайн юумэн гараха аал? – гэжэ Натанаил буруушаан хэлэбэ.

– Ошоёбди, ши өөрөө харахаш, – гэжэ Филипп тэрээндэ дурадхаба.

47Урдаһаань Натанаилай ерэжэ ябахые Иисүүс хараад:

– Хуурмаг мэхэгүй, жэнхэни Израилиин хүн байна, – гэбэ.

48– Та намайе хаанаһаа мэдэнэбта? – гэжэ Натанаил асууба.

– Филиппэй шамайе дуудахаһаань урда боди модоной һүүдэртэ һуухыешни Би хараа һэм, – гэжэ Иисүүс харюусаба.

49– Рабби аа! Та ёһоороол Бурханай Хүбүүн, Израилиин Хаан байнат! – гэжэ Натанаил дуугарба.

50– Шамайе боди модоной һүүдэртэ һуухыешни хараа һэм гэхэдэмнил Намда этигэбэш. Бай даа, энээнһээ бүришье ехэ юумэ үзэхэш, – гэбэ Иисүүс. 51Тиин үргэлжэлүүлэн:

– Тэнгэриин яажа нээгдэхые, Хүн түрэлхитэнэй Хүбүүндэ Бурханай Эльгээмэлнүүдэй буухые, тэндэһээ дээшээ тэнгэри өөдэ дэгдэжэ байхые харахат гээд таанарта үнэниие хэлэнэб.

Zur Zeit ausgewählt:

Иоанн 1: BurBBL2024

Markierung

Kopieren