Рут 3
3
Рут гьоцӀие БогӀазихъе ин
1Якьад НогӀомица гьелда абуна: «Мунго юссине цо рукъ-къай балагьун лъикӀ гурищ, дир яс, дуего санагӀат букӀине? 2Доле, мунгун цадахъ хӀалтӀулел рукӀарал лъилъарухъабазул бетӀергьанлъун кколев дов БогӀаз гуревищ нилъер гӀагарав чи? Къаси дос гьоцӀиб пурчӀинадул лал рехулеб буго. 3Гьанже дуца гьумер-кӀал ва черх чуре, гьуинаб махӀалъул нахги бахе ва бищун берцинаб ретӀелги ретӀе. Мун гьоцӀие а, амма дов квана-гьекъон лъугӀизегӀан досда йихьизе чӀоге. 4Дов кьижизе вегулеб бакӀ лъазабе, хадуй инеги ун, досул хӀатӀаздаса юргъан нахъе гьабе ва гьесул хӀатӀаахада ега; хадуб гьабизе кколеб дос бицина дуда», – ян.
5«Дуца абураб гьабила дица», – ян жаваб кьуна Рутица. 6Гьей гьоцӀие ана ва кинабго якьадалъ малъухъе гьабуна.
7БогӀаз гӀорцӀизегӀан кванана ва гьекъана, ва ракӀ разиго тӀорщалил гӀариялда нахъа кьижизе вегана. Гьавугьинго аскӀоеги ун, юргъанги тӀаде борхун, Рут гьесул хӀатӀаахада егана. 8Сордо бащалъараб мехалда гьев тӀуркӀун ворчӀана, хьибил сверизе лъугьиндал, жинда аскӀой чӀужугӀадан йикӀин бихьана.
9«Мун щий кколей?» – ян гьикъана гьес. «Дун йиго дур лагъ Рут, – ян жаваб кьуна гьелъ. – Мун гӀагарав чи вугелъул, дида тӀадеги дурго кваркьи баче дуца».
10«БетӀергьанас баркат лъеги дуда, дир яс» – ан жаваб кьуна гьес. «Дуца цебе гьабуралдасаги гьаб иш жеги къиматаб буго: мун гӀолохъанал васал ралагьизе лъугьинчӀелъул – я бечедал, я мискинал. 11Гьанже, дир яс, мун сункьаго хӀинкъуге. Дица кинабго гьабила дур гьариялда рекъон; гьаб шагьаралда киназдаго лъалелъул мун намус бацӀцӀадай гӀадан йикӀин. 12Дун хӀакъикъаталдаги дур гӀагарав чи ккола, амма дидаса гӀагаравгийин вугев. 13Мун рогьинегӀан гьаний чӀа; радал, досие бокьани жиндирго ихтияралдаса пайда босизе, гьедин букӀине те. Амма дос инкар гьабуни, гьале, Жив хӀакъав БетӀергьанасул цӀар бахъун гьедула дун дуе, дица гьабила гьебмехалда дур тӀалаб. Кьижа, рогьине жеги гӀезегӀан мех бугин».
14РогьинегӀан гьей гьесул хӀатӀаахада кьижана ва хъахӀлъи балелде тӀаде яхъана. ЧӀужугӀадан гьоцӀие ячӀун йикӀин лъидаго лъачӀого лъикӀ букӀинилан пикру гьабуна БогӀазица. 15Гьес абуна: «Дуда тӀад ретӀун бугеб гӀаба босе гьанибе ва дида цебе ккве гьеб». Рутица гьедин гьабидал, анлъго роцен#3:15 ГӀага-шагарго анлъго бетӀер гьабун цӀураб сахӀ = 25 кг. пурчӀинадул бана гьелъул гӀабаялде тӀаде ва мугъалде бахинабизе гьелъие кумек гьабуна. Цинги шагьаралде нух босана гьес.
16Рут жиндирго якьадалъухъе тӀад юссиндал, НогӀомица цӀехана: «Щиб ккараб, дир яс?» – ин.
Рутица бицана кинабго БогӀазица гьабураб лъикӀлъи 17ва тӀаде жубана: «ЧӀоёго якьадалъухъе тӀадюссунгеянги абун, гьале гьаб анлъго роцен пурчӀинадул кьуна дос дие».
18НогӀомица абуна: «Гьанже, дир яс, мун балагьун чӀа, кватӀичӀого лъала дуда гьаб ишалъул ахир. Жакъаго гьалъул цо хӀасил ккечӀого досул ракӀ сасине гьечӀо» – ян.
Zur Zeit ausgewählt:
Рут 3: АварАК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2005-2023
