Иоанн 8
8
8 бетӀер
«Дицаги гьабиларо дуе тамихӀ»
1Зайтуналъул магӀарде ана ГӀиса. 2Нахъисеб къоялъ радалго вачӀана гьев Мукъадасаб Рокъове. ТӀолабго халкъ бакӀарана гьесда аскӀобе. ГӀодов чӀун гьезие вагӀза-насихӀат гьабизе ГӀисаги лъугьана.
3Диниял гӀалимзабаз ва фарисеяз ГӀисахъе ячун ячӀана росасе хилиплъун, зина гьабулаго тӀадккурай цо чӀужугӀадан. ГӀадамазда цее яхъун чӀезаюна гьез гьей. 4Цинги гьез ГӀисада абуна:
– Я, МугӀалим! Зина гьабулей ятана гьай гӀадан. 5Мусаца жиндирго къануналда нижее амру гьабун буго гьадинал руччаби ганчӀал речӀчӀун чӀвазе кколин. Дуца щибилан абилеб?
6ГӀисада гӀайиб чӀвазе рес ккелародайилан ургъунго кьураб суал букӀана гьеб.
ГӀодовеги къулун, чӀарбида килщица цо щибалиго хъвалев вукӀана ГӀиса. 7Нахъеги гьез добго суал кьедал, тӀаде ворхун, гьес абуна:
– Нужеда гьоркьоса цониги мунагь гьабичӀев чияс речӀчӀе гьелда тӀоцебе гамачӀ.
8Нахъеги гӀодовеги къулун, чӀарбида хъвадаризе лъугьана гьев.
9Гьеб рагӀидал, гьел цо-цоккун рахъун къватӀире ана, чӀахӀияздасан байбихьун. ГӀисаги гьесда цее эхетарай дой гӀаданги хутӀана гьенир. 10ТӀаде ворхун, ГӀисаца гьелда гьикъана:
– Йо, чӀужугӀадан, кире арал дол? Цониги чи хутӀичӀевищ дуе тамихӀ гьабизе?
11– ХутӀичӀо, БетӀерчӀахъад, – абун жаваб кьуна гьелъ.
ГӀисаца гьелда абуна:
– Дицаги гьабиларо дуе тамихӀ. А дурго гьанже. Гьанжеялдаса хадуб тӀокӀаб мунагьги гьабуге.]#7:53–8:11 53 номералдаса байбихьун 8 бетӀералъул 11 номералде щвезегӀан бугеб бутӀа батула «Инжилалъул» гӀемерисел некӀсиял хъвай-хъвагӀаязда.
«Дун вуго гьаб дуниялалъул Нур»
12Гьадинаб вагӀза-насихӀатги гьабуна ГӀисаца гьезие:
– Дун вуго гьаб дуниялалъул Нур. Дида нахъвилълъарав цониги чи бецӀлъуда хьвадизе гьечӀо. ГӀумру гвангъизабулеб Нур гьесда цадахъ букӀине бугелъул.
13Гьебмехалъ фарисеяз абуна:
– Дуцаго дуего гьабулеб бугеб дур нугӀлъи кьучӀаб букӀунаро.
14ГӀисаца абуна:
– Дицаго дирго хӀакъалъулъ гьабулеб бугониги, гьеб нугӀлъи кьучӀаб буго, дида лъалелъул дун киса вачӀаравали ва киве унев вугевали. Нужеда лъаларо дун киса вачӀаравали ва киве унев вугевали. 15Нужеца суд гьабула гӀадамаз гӀадин, амма дица лъиениги суд гьабуларо. 16Дица суд гьабунигицин, гьеб ритӀухъаб букӀина, дун дунго цохӀо гьечӀелъул, дун витӀарав Эменги вугелъул дида цадахъ. 17Нужер къануналдагицин хъван бугогури кӀиго чиясул нугӀлъи гӀолилан. 18Дицаги гьабулеб буго диего нугӀлъи, дун витӀарав дир Инсуцаги гьабулеб буго.
19– Дур эмен кив вугев? – ан гьикъана гьесда.
ГӀисаца жаваб кьуна:
– Я, дун, яги дир Эмен нужеда лъаларо. Дун лъалевани, дир Эменги лъалаан нужеда.
20Гьеб вагӀза-насихӀат ГӀисаца гьабуна Мукъадасаб Рукъалъул азбаралъуб, садакъадул гӀарац лъолеб гъансида аскӀов вахъунги чӀун. Лъицаниги кквечӀо гьев, жеги гьелъие болжал щун букӀинчӀо.
«Дун араб бакӀалде рачӀине кӀвеларо нужеда»
21Гьанжеги ГӀисаца гьезда абуна:
– Дун нужеда аскӀоса ине вуго. Дун валагьулел рукӀина нуж, амма гьедин мунагьазул цӀовухъе хвела, дун араб бакӀалде рачӀинеги кӀвеларо нужеда.
22Ягьудияз абуна:
– Живго жинцаго чӀвазехъинцин вугодай? Дун араб бакӀалде рачӀине нужеда кӀвеларинги абулеб буго.
23ГӀисаца гьезда абуна:
– Нуж руго гӀодор рижарал, дун вуго тӀасан вачӀарав. Нуж руго гьаб дуниялалъул чагӀи, дун гьаб дуниялалъул чи гуро. 24Гьединлъидалин дица нужеда абулеб бугеб нуж мунагьазул цӀовухъе хвезе ругилан. Дов#8:24 МасихӀ. – Дун вукӀиналда божичӀони, мунагьазул цӀовухъе хвела нуж.
25– Мун щивха кколев? – ан гьикъана гьез.
ГӀисаца гьезие жаваб кьуна:
– Дун щивали авалалдаса бахъарабго бицана дица нужеда. 26Нужер хӀакъалъулъги гӀемераб жо бицине кӀвелаан дида ва суд гьабизеги кӀвелаан. Амма дица гьаб халкъалъе бицунеб буго дун витӀарав Аллагьасдасан рагӀарабщинаб. ЦӀакъ ритӀухъавин гьев вугев!
27Гьезда бичӀчӀичӀо Инсул хӀакъалъулъ бицунеб букӀин. 28Цоги ГӀисаца абуна:
– ГӀадамил Лъимер борхатаб бакӀалде вахинавидал, лъала Дов – Дун вукӀин, дунго лъикӀав лъугьун дица щибниги гьабулеб букӀинчӀеблъи, дир Инсуца дида малъухъе дица нужедаги бицунеб букӀараблъи. 29Дун ВитӀаравги дунгун цадахъ вуго. Гьес дун дунго цохӀо течӀо, гьев разилъулебщинаб иш гьабулеб бугелъул дица кидаго.
30ГӀисаца гьедин абидал, гӀемераз иман лъуна гьесде.
«Мунагь гьабурав чи ккола мунагьалъул лагъ»
31Жинде иман лъурал ягьудиязда ГӀисаца абуна:
– Дир рагӀи нужеца рекӀелъ цӀунани, унго-унгоял дир муридал рукӀина нуж. 32ХӀакъабщинаб лъала нужеда, ва гьелъ нуж тархъан гьарила.
33Гьез абуна:
– Ниж Ибрагьимил наслу буго, лъилниги лагъзаллъунги рукӀинчӀо киданиги. Ниж тархъан гьарилин абураб рагӀиялъул магӀна щиб?
34ГӀисаца жаваб кьуна:
– ХӀакълъун абулеб буго дица нужеда: мунагь гьабуравщинав чи ккола мунагьалъул лагъ. 35Масала, цо пуланав лагъ жиндирго бетӀергьанасул рокъов кидаго гуро вукӀунев, амма вас инсул рокъов кидаго вукӀуна. 36Васас тархъан гьаруни, хӀакъикъаталдаги тархъанлъила нуж. 37Дида лъала нуж Ибрагьимил наслу букӀин. Амма нужеца дун чӀвазе къасд гьабулеб буго, дир рагӀи нужер ургьибе унеб гьечӀелъул. 38Дица нужеда малъулеб буго дир Инсуда аскӀоб дида бихьараб къагӀидаялъ. Нужецайин абуни гьабулеб буго нужерго инсудасан рагӀараб къагӀидаялъ.
39– Нижер эмен Ибрагьим вуго, – ян абуна гьез.
ГӀисаца абуна:
– Нуж Ибрагьимил лъимал рукӀаралани, Ибрагьимица гьабураб гьабилаан нужеца. 40Нужецани дун – Аллагьасдасан рагӀараб хӀакъаб рагӀи нужеда бицарав чи – чӀвазе къасд гьабулеб буго. Амма Ибрагьимица гьединаб иш гьабичӀо. 41Нужерго инсуца гьабураб гьабулеб буго нужеца.
Гьез абуна:
– Ниж зинаялдасан ккарал гуро. Нижер цо эмен вуго – Аллагь!
42ГӀисаца гьезда абуна:
– Нужер эмен Аллагь вукӀаравани, нужее дун вокьилаан. Дун Аллагьасдасан вачӀун рещтӀарав вугелъул гьаниве. Дунго лъикӀав лъугьун вачӀинчӀо дун, гьес витӀун вачӀана. 43Нужеда дир рагӀи бичӀчӀулеб гьечӀо, нужеда гьеб рагӀизе рес гьечӀелъул. 44Илбис буго нужер эмен. Нужер эменлъун кколеб илбисалъулаб тӀубазабулеб буго нужеца. БачӀинго сундасан букӀараб илбисалъул? Чи чӀваялдасан гурищ? РитӀухълъиялъул рахъги кквечӀо гьелъ, ритӀухълъи гьелъулъ жиндилъго гьечӀелъул. Гьереси – гьелъул кӀалдиб ругьунаб мацӀ буго, тӀолабго гьересиги гьелдасан бачӀараб бугелъул. 45Дида нуж божулел гьечӀо, дица битӀараб бицунеб бугелъул. 46Нужер цониги чиясда кӀвелищ мунагь бугин дидайилан абизе? Дица битӀараб бицунеб бугеб мехалъги щай нуж дида божуларел? 47Аллагьасдасан вачӀарав чи Аллагьасул рагӀухъги гӀенеккула. Нуж Аллагьасдасан ругелал гурелъул, нуж гӀенеккулел гьечӀо.
ГӀисаца Ибрагьимил хӀакъалъулъ бицуна
48Ягьудияз гьесда абуна:
– Мун самарияв вугин ва жундуз ккунги вугин абун нижеда гьоркьоб тӀибитӀун бугеб хабарги гьересийищха?
49ГӀисаца гьезие жаваб кьуна:
– Дун жундуз ккун гьечӀо. Дица дирго Эмен кӀодо гьавулев вуго, нужецайин абуни, дун хӀакъир гьавулев вуго. 50Амма дун рецц-бакъ къваригӀарав чиги гуро. Дие рецц-бакъ гьабизе бокьаравги вугевха, гьес гьабила нужее суд. 51ХӀакълъун абулеб буго дица нужеда: дир рагӀи рекӀелъ цӀунаравщинав чи абадул абадиялъ хвезе гьечӀо.
52Ягьудияз гьесда абуна:
– Гьанже тӀубанго хӀакълъана нижее мун жундуз ккун вугевлъи. Ибрагьим хвана, цогидал аварагзабиги хвана. Дуцани абулеб буго дур рагӀи рекӀелъ цӀунаравщинав чи абадул абадиялъ хвезе гьечӀилан. 53Нижер эмен Ибрагьимидасаги цӀакъав чийищха мун кколев? Цогидал аварагзабаздасаги цӀакъав чийищха? Ибрагьимги хвана, гьел цоялги хвана. Мун щив гьедигӀан кутакав чи?
54ГӀисаца жаваб кьуна:
– Дицаго диего рецц-бакъ гьабуни, гьеб букӀина гӀададисеб чӀанда-хабар. Нижер Аллагьилан нужеца абулев дир Инсуца гьабулеб буго дие рецц-бакъ. 55Нужеда киданиги лъалароан Гьев. Амма дида Гьев лъала. Дида Гьев лъаларилан дица абуни, дунги вукӀина нужеда релълъарав гьерсихъан. Дида Гьев лъала ва Гьесул рагӀи рекӀелъ цӀунун буго дица. 56Нужер эмен Ибрагьим цӀакъ вохана, дун вачӀараб къо бихьидал. Гьесда бихьана дун вачӀараб къо ва гьелдаса вохана.
57Гьебмехалъ ягьудияз гьесда абуна:
– Жеги кӀикъоялда анцӀго сонцин бачӀев дуда Ибрагьим кин вихьулев?
58ГӀисаца гьезда абуна:
– ХӀакълъун абулеб буго дица нужеда: жеги Ибрагьим авараг вахъиналдего вукӀана дун.
59Гьесда речӀчӀизе ганчӀал кодоре росана гьебмехалъ ягьудияз. ГӀиса гӀадамазул руккалилъ вахчана ва Мукъадасаб Рокъоса къватӀиве ана.
Zur Zeit ausgewählt:
Иоанн 8: АварАК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2005-2023
