San Lucas 23

Táxi na kuachi siki xaꞌa Jesús ndaꞌa ra Pilato

(Mt. 27:1-2,11-14; Mr. 15:1-5; Jn. 18:28-38)

1Ta saa ndi̱kundita ndiꞌi na chiñu, ndi̱kundaka na Jesús kuaꞌan ra xiꞌin na nuu ra gobernador Pilato. 2Tá ndi̱xaa na xiꞌin ra nuu ra Pilato, ta xa̱á na táxi na kuachi siki xaꞌa ra, káchi na saa:

―Xi̱ni nde ra yóꞌó táa sii ni ra naꞌa ya kuꞌun na sata ra. Ta väꞌa íkan ra, ra táꞌvi ñuu yo ku ra chi káꞌan ra xiꞌin na, ya ná chäꞌvi na xuꞌun ya kuaꞌan ndaꞌa ra rey César, saa chi mií ra ku Cristo, ra ti̱ꞌvi Ndioxi vaxi ra nduu ra rey ñuu ivi yóꞌó, káchi ra xiꞌin na ―káchi nda.

3Saa ndi̱ndakan tuꞌun ñaꞌa ra Pilato, káchi ra saa:

―¿Án ya ndixa kua yóꞌo̱ ku Rey nuu na judío? ―káchi ra.

Saa ndi̱kuiin Jesús, káꞌan ra:

―Ya ndaa tá íyo ya káꞌan un saa íyo ndixa va ya ―káchi ra.

4Saa ndi̱kaꞌan ra Pilato xiꞌin sutu naꞌnu nuu na veꞌe ñuꞌu tin naꞌa na chútu ndaa ikán, káchi ra saa:

―Nda iin kuachi ra yóꞌó köo níꞌi i ―káchi ra xiꞌin na.

5Ñaa iin káchi ndi̱kuiin ndiꞌi na káꞌan na xiꞌin ra Pilato, káchi na saa:

―Ra chúꞌun naꞌa ku ra ñaa, ta chíkaa ra yuꞌu na ya kanitaꞌan na xiꞌin na chiñu. Ndiꞌi ni kúu ñuu estado Galilea xiꞌin estado Judea ndi̱xika ra sínaꞌa ra, ta vitin nda ñuu Jerusalén yóꞌó xa̱a ra íkan ra saa ―káchi na xiꞌin ra Pilato.

Ndáka na Jesús ndi̱xaa ra nuu ra Herodes

6Saa tá xi̱ni soꞌo ra Pilato tuꞌun ya ndi̱kaꞌan na xaꞌa Jesús, ya ke̱e ra ñuu Galilea, saa ndi̱ndakan tuꞌun ra, án ra ke̱e ñuu Galilea ku ra.

7Ñaa tá ku̱ndaa ini ra, ta ti̱ꞌvi ra Jesús kuaꞌan ra ndaꞌa ra Herodes, saa chi ra ikán ku ra kúu gobernador nuu na estado Galilea, ta mií ñuu Jerusalén ikán ndi̱xaa ra íyo ra tá ku̱u saa. 8Ñaa tá xi̱ni ra Herodes Jesús, ta ku̱sini ni ra, saa chi xa yachi vi ku̱ni ni ra kuni ñaꞌa ra, xaꞌa ya kuaꞌa ni ya xi̱ni soꞌo ra xaꞌa Jesús. Ta kúni ra ná ikan Jesús yatuꞌun Ndioxi nuu ra. 9Kuaꞌa ni ya ndi̱ndakan tuꞌun ra Herodes Jesús ta nda iin ya köo ndi̱kuiin ra. 10Ta saa xa ndóo kuee nda sutu naꞌnu xiꞌin nda sínaꞌa ya ta̱a ra Moisés. Ndóo nda táxi nda kuachi siki xaꞌa Jesús ndaꞌa ra Herodes, ndinuni loꞌo káꞌan nda. 11Saa xa̱á ra Herodes xiꞌin nda lapa kúsiki ndaa ñaꞌa nda. Saa si̱kundixi nda ra iin tikoto ya vaꞌa ni náꞌa ya xáku ndaa nda ra. Ñaa si̱ndiko koo tuku ra Herodes Jesús kuaꞌan ra nuu ra Pilato. 12Ta kivi ikán ku nuu ndi̱kitaꞌan mani ra Pilato xiꞌin ra Herodes, saa chi yachi ta ndi̱xiyo nda kuachi xiꞌin taꞌan nda.

Ndi̱taꞌnda chiñu xaꞌa Jesús ya xíniñuꞌu kuvi ra, káchi ra Pilato

(Mt. 27:15-26; Mr. 15:6-15; Jn. 18:38–19:16)

13Saa ka̱na ra Pilato ndiꞌi nda sutu naꞌnu xiꞌin na chiñu tin na ñuu, ndi̱kitaꞌan na. 14Ta ndi̱kaꞌan ra xiꞌin na, káchi ra saa:

―Ndóꞌo̱, ndáka ndo ra yóꞌó xa̱a ra xiꞌin ndo táxi ndo kuachi ndaꞌa i xaꞌa ra ya xíka ra táa sii ra naꞌa káchi ndo. Ta nuu ndiꞌi ndo ndi̱ndakan tuꞌun i ra xaꞌa ya chíkaa ndo kuachi ra. Ta köo ndi̱taꞌan i kuachi ra. 15Ni ra Herodes ta köo kuachi ra ndi̱taꞌan ra, yakan kua si̱ndiko koo tuku ñaꞌa ra ndaꞌa i. Ta köo kuachi ra ya káꞌan kuvi ra. 16Ná tiꞌvi i ra kuꞌun ra xaa nduvaꞌa na xiꞌin ra, ta saa saña i ra kuꞌun va ra ―káchi ra Pilato xiꞌin na.

17Chi kúu mií ra ichí, táva ra iin na ñúꞌu veꞌe kàà ndiꞌi saa viko pascua. 18Sundi nda iin na köo xíin saña Jesús kuꞌun ra, iin yuꞌu ku̱u ndiꞌi na, káꞌan na xiꞌin ra Pilato, káchi na saa:

―¡Ná kuvi ra! Ta tava ra Barrabás ná keta ra veꞌe kàà ―káchi na xiꞌin ra.

19Ta ra Barrabás ikán, ndíkaa ra veꞌe kàà xaꞌa ya chu̱ꞌun ra naꞌa ka̱ni taꞌan na xiꞌin gobierno tin xaꞌa ya xa̱ꞌni ra iin ndìì. 20Xaꞌa ya ku̱ni ra Pilato saña ra Jesús, yakan ndi̱kaꞌan tuku ra xiꞌin na, saña ñaꞌa ra. 21Ta ni köo ndi̱xiin na, ndíkundee na ndáꞌi koꞌo vaꞌa ka na, káchi na saa:

―¡Kaꞌni ra! ¡Kiꞌin ra chinuu un ndaꞌa cruzin, ná kuvi ra! ―káchi na.

22Saa ndi̱kaꞌan tuku ra Pilato xiꞌin na ichí uni, káchi ra:

―¿Ndá xaꞌa kua kuvi ra, ta köo ya ndi̱kan ra? Köo kuachi ra ndi̱taꞌan i ya káꞌan kuvi ra. Vaꞌa takua ná sindoꞌo ni i ra saa saña i ra kuꞌun va ra ―káchi ra xiꞌin nda.

23Ta ni köo ndi̱xiin na, ndinuni loꞌo ndáꞌi koꞌo na nuu ra. Iin tuun káꞌan na xiꞌin ra ya ná chinuu ra Jesús ndaꞌa itun cruzin. Ñaa ta ndakua ndi̱xinu ndixa yuꞌu na xiꞌin nda sutu naꞌnu nuu sutu. 24I̱kan saꞌa ndixa ra Pilato ya ndi̱kaꞌan na xiꞌin ra. 25Sa̱ña ndixa ra, ra Barrabás ke̱e ra veꞌe kàà, vani ra xa̱ꞌni ndìì tin chu̱ꞌun ra naꞌa ka̱ni taꞌan na xiꞌin gobierno, ta ndi̱saña ra i̱kan ra Pilato. Ta saa ta̱xi ra Pilato Jesús ndaꞌa nda lapa ya chinuu ñaꞌa nda ndaꞌa cruzin chi saa íyo ya ku̱ni na ñuu.

Chi̱nuu nda lapa Jesús ndaꞌa itun cruzin

(Mt. 27:32-44; Mr. 15:21-32; Jn. 19:17-27)

26Saa ta ndi̱kundaka nda lapa ikán Jesús kuaꞌan ra xiꞌin nda chinuu nda ndaꞌa itun cruzin. Tá kuaꞌan nda ichí ta ndi̱kitaꞌan nda xiꞌin iin ra náni Simón, ra ke̱e ñuu Cirene ndi̱ko koo ra kuaꞌan ra ñuu Jerusalén ndi̱xaꞌan ra iku. Saa ti̱in nda ra chíndee taꞌan ra xiꞌin Jesús ndíso ra itun cruzin xiꞌin ra ndíkun ra kuaꞌan ra sata Jesús.

27Ta kuaꞌa ni naꞌa ndíkun kuaꞌan sata Jesús. Iin taꞌnda chee ku ná ñaꞌa ndíkun kuaꞌan sata ra, iin ndáꞌi koꞌo mií ná xáku ná xaꞌa ra kuaꞌan ra. 28Saa ndi̱koto ra nuu ná, ta ndi̱kaꞌan ra xiꞌin ná, káchi ra saa:

―Ndóꞌo̱ nana ñuu Jerusalén, kuäku ndo xaꞌa i, kuaku ndo xaꞌa mií ndo tin xaꞌa seꞌe ndo. 29Saa chi vaxi kivi ta ndoꞌo ni ndo, ta kivi ikán kaꞌan naꞌa: “¡Vaꞌa ni kée ná numa, ná köo seꞌe ndikaku xiꞌin ná köo ndi̱sikuaꞌnu seꞌe!”, kachi na. 30Kivi ikán kaꞌan ndiꞌi naꞌa xiꞌin iku, kachi na saa: “Koyo ndo sata nde”, kachi na. Saa kaꞌan na xiꞌin xiki vali kachi na saa: “Koyo ndo ndikasi ndo sata nde”, kachi na. 31Saa chi tá tu soꞌva íkan na xiꞌin itun kuií ta ndee ni ka va ikan na xiꞌin itun íchi ―káchi ra xiꞌin ná ñuu Jerusalén.

32Saa ndáka tu nda lapa uvi nda íyo kuachi kuaꞌan xiꞌin nda. Iin káchi kuaꞌan nda kuvi nda nuu itun cruzin xiꞌin Jesús. 33Ñaa tá ndi̱xaa nda iin iku náni Leke Xiní Ndìì, ta ikán chinuu nda Jesús nuu itun cruzin xiꞌin uvi saa nda kuaꞌan xiꞌin ra. Iin ra chi̱nuu nda ndaꞌa cruzin ñaꞌñu kuáꞌá ra ta inka ra chi̱nuu nda ñaꞌñu ítin ra. 34Saa ndi̱kaꞌan Jesús xiꞌin Ndioxi, káchi ra saa:

―Tata Iva yo, xaa kaꞌnu ini un xaꞌa na chi köo kúndaa ini na unkua íkan na ―káchi ra.

Ñaa chi̱kaa nda lapa suerte sata tikoto ra, ya kuni nda ndá ñaꞌñu kua ndikiꞌin iin iin nda.

35Ta ndíta ndiꞌi na xíto na ya ndóꞌo Jesús, nda mií na chiñu kúsiki ndaa ñaꞌa, káchi na saa:

―Ku̱chiñu ra chi̱ndee ra inka naꞌa, ta vitin ná chindee ra mií ra. Tá tu ndixa ra Cristo, ra ndi̱kaxin Ndioxi vaxi sikaku yoo ku ra, ta ná sikaku ra mií ra ―káchi na.

36Saa tu nda lapa ikán va, ku̱yati nda xaꞌa itun cruzin kúsiki ndaa ñaꞌa nda. Chi̱kaa nda nduta vinu iya yuꞌu ra koꞌo ra, 37káchi nda saa:

―¡Tá ndixa ra Rey xáꞌnda chiñu nuu na judío ku yóꞌo̱, ta sikaku xiꞌin mií un vitin! ―káchi nda xiꞌin ra.

38Ñaa ka̱ni na iin itun tabla loꞌo nuu cruzin chí xiní ra, ta uni nuu tuꞌun ndóso nuu nu, tuꞌun griego, tin tuꞌun latín, xiꞌin tuꞌun hebreo kua ndóso nuu nu, káchi ya saa: “Ra Rey na judío ku ra yóꞌó”, káchi ya.

39Saa káꞌan iin ra xa̱ꞌni ndìì ínuu nuu cruzin káchi ra saa xiꞌin Jesús:

―¡Tá tu ndixa ra ti̱ꞌvi Ndioxi vaxi sikaku na ñuu ivi yóꞌó ku un, ta sikaku xiꞌin mií un, saa sikaku un ndeꞌe! ―káchi ra.

40Ñaa ndi̱ndaꞌi ra taꞌan ra xiꞌin ra, káchi ra saa:

―¿Ndachu köo íꞌvi un xíni un Ndioxi? Ta yo xa kuvi ku yo. 41Vaꞌa ka vi yoo ya ndaa kua ndóꞌo va yo xaꞌa kuachi yo, ta ra ndaꞌvi yóꞌó, nda iin kuachi ra köo ―káchi ra.

42Saa ndi̱kaꞌan ra xiꞌin Jesús, káchi ra saa:

―Tata, ndikaꞌán ini un xaꞌa i tá ná xáa un kaꞌnda chiñu un ―káchi ra xiꞌin Jesús.

43Saa ndi̱kaꞌan Jesús xiꞌin ra, káchi ra saa:

―Ya ndaa káꞌan i xiꞌin un, kivi vitin koo un xiꞌin i nuu latun ni káa ―káchi Jesús xiꞌin ra.

Ndi̱xiꞌi Jesús ndaꞌa itun cruzin

(Mt. 27:45-56; Mr. 15:33-41; Jn. 19:28-30)

44Saa ku̱u tá ti̱ndaa kàà uxi uvi nduvi ta iin ku̱naa ndiꞌi, iin saa nda kàà uni xikuaa. 45Iin nda̱si ndiꞌi nuu ñu̱ꞌù. Ta saa iin ndi̱ndata sava toto ya tíkaa veꞌe ñuꞌu kaꞌnu ikán. 46Saa iin ndendee ndi̱ndaꞌi koꞌo Jesús, káchi ra saa:

―¡Tata, ndítaxi i ya vaꞌa i ndaꞌa un! ―káchi ra xiꞌin Ndioxi.

Tá ndi̱kaꞌan ra saa ta ndi̱xiꞌi va ra.

47Saa xi̱ni ra ínuu nuu iin ciento nda lapa ñuu Roma ya ku̱u, ta xa̱á ra xáa kaꞌnu ra Ndioxi, káchi ra saa:

―Ya ndixa ni kua, ra vaꞌa ni va ku ra yóꞌó ―káchi ra ikán soꞌva.

48Saa xi̱ni ndiꞌi naꞌa, na kuaꞌa ni ndi̱xaa ikán, xi̱ni na ya ku̱u, saa ndi̱ko koo na kuanuꞌu na, káni ndaꞌa na kándika kuaꞌan na xaꞌa ya kúsuchi ni ini na. 49Ta saa ndíta sava ná ñaꞌa, ná xi̱ndikun sata Jesús nda ñuu Galilea iin saa nda ñuu Jerusalén. Ndíta ná xiꞌin inka nda migo Jesús. Xíka ndíta na xíto na ya ndóꞌo Jesús nuu itun cruzin ikán.

Sínduxin na Jesús

(Mt. 27:57-61; Mr. 15:42-47; Jn. 19:38-42)

50Saa ndi̱xiyo iin taa ra vaꞌa ni, ra toꞌo ni náni ra José ra ke̱e ñuu Arimatea ya ndíkaa estado Judea. Ta kúu mií ra José ikán chiñu ndee ni. Ndíkaa ra xiꞌin mií nda chiñu ikán. 51Ta köo ndi̱xiyo yuꞌu ra xiꞌin na chiñu xaꞌa ya i̱kan na xiꞌin Jesús, saa chi ndátun tu ra ikán va xáa Ndioxi kaꞌnda chiñu ra nuu na ñuu ivi yoꞌo. 52Saa ke̱e ra ndi̱xaꞌan ra nuu ra Pilato ndi̱kaꞌan ra xiꞌin ra, taxi ra ikin kuñu Jesús ndaꞌa ra. 53Ñaa ndi̱xaꞌan ra si̱nuu ra ikin kuñu Jesús, xa̱a vií ra xiꞌin ya, su̱vi ra ya xiꞌin iin toto vaꞌa. Saa ndi̱xaꞌan ra chi̱kaa ra ya tixin iin kava nuu xa núna ta täꞌan nduxin nda iin naꞌa. 54Ta kua kivi vierne tá xáa ndúvi na judío ndiꞌi ñaꞌa ya kuniñuꞌu na chi mí xikuaa ikán kua xáa kivi ya ndíkundee na.

55Ñaa ke̱e ndiꞌi ná síꞌi, ná xi̱ndikun sata Jesús nda estado Galilea, ke̱e ná ndíkun ná kuaꞌan ná sata ra José saa xi̱ni ná ndá kuꞌva chi̱kaa na ikin kuñu ra nuu si̱nduxi ñaꞌa ra. 56Tá ndi̱ꞌi xi̱ni ná nuu chi̱kaa ñaꞌa ra, ta saa ndi̱ko koo ná kuanuꞌu ná sikuaꞌa ná nduta tami xaꞌan xiꞌin tatan ya tami xaꞌan chikaa ná ikin kuñu ra. Saa ndi̱kundee ná kivi ndíkundee na tá káchi ley Ndioxi ya ta̱a ra Moisés.

Zur Zeit ausgewählt:

San Lucas 23: xta

Markierung

Kopieren