Matthew 12

Jesu sha Sabbath saal ma Teyhungwa

(Mark 2:23–28; Luke 6:1–5)

1Ashey Sabbath#12:1 Jehudi miqtang ma nángtong saal sha Sabbath saal ta raaq ta. saal na Jesu nia ujiphantey tang pik wang qhing chey ta. Ujinphantey tang tha chamlal ti atho ning aa chamlong tha tuk eq wong tha phakta. 2Phorisi tang aa ira khi eq Jesu ma batta, “Siin u, ba jiphantey tang eq sabbath saal o irimal som ching ang moq.”

3Jesu aa thawel batta, “David nia piq jamoq qhing tey tang tha chamlal ti atho David aa chamli som ta? Nim aa iri raaq ri Asing likwit na cham ta phat tin? 4David Shkewa him náng wang eq asang banlo tha som eq piq nia ujamoq qhingtey tang aa phakta. Iri asang banlo raa tingwa tang aa hun jin phakta, adak miqtang eq jin pak moq angta. 5Etho tingwa tang eq Sabbath saal o rangnuk himna jaksom jin som eq ta ta Moses thong na thawit ta, nim aa iri raaq raa phat min ang tin i? Etharin ning ma ira jashit ta raaq moq. 6Nga nim ma bat taphang, rangnuk him wang tho ajong miq ashey iro atha. 7Asang likwit na thawit aa, ‘Nga ma manchan ràa aa, jatngam tang pinthong ràa moq.’ Nim aa iri raaq rima chamlang ta raaq inn sha asing usam eq inn jo, aja ang moqtey ma tashit min ang wang tin. 8Chammatakoi Miqna Sa Sabbath saal ma tho Teyhungwa.”

Jak kung miqwa

(Mark 3:1–6; Luke 6:6–11)

9Jesu eshi haq tha shingchak eq synagogue náng kata. 10Etho ashey jak kung miqwa eshina angta. Chamtey tey tang eq Jesu ma aja ta raaq ma pitta, “Sabbath saal o, taqhal sha hiqtang thong na khakla i?”

11Jesu aa thawel batta, “Nim ma ashey kelwut atha ta tathin inn. Eshi kelwut sha Sabbath saal o khopong náng qhat wang ajo, nim aa chamlang som nin? Nim aa ka eq esha lat min ang nin i? 12Etho miq sha kelwut náng eq tho ahan thangchan! Ethirangma, Sabbath saal o, jaqhal jaksom lot sha khakla.” 13Etho Jesu aa jak kung miqwa thima batta, “Ba jak ni tachal u.”

Etho piq jak tha tachal ta. Eshi jak tha jakshey thimal qhalta. 14Req Phorisi tang ran náng thalat eq, Jesu tatik rangma miq dak tang jamoq rum wan ta.

Shkewa tal sanga

15Jesu aa iri raaq raa sam eq, eshi mung tha shingchak eq chuwang ta. Daqhan miqtang aa ujiphanta etho piq aa thaji takasa tang sha taqhal ta. 16Etho Jesu aa batta, “Nga utang aa ta adak miqtang ma nak bat inn.” 17Shkewa rangsamal Isaiah tungkang o batta tha irimal ang eq asing sey angta.

18“Ira i sanga, nga piq raa tal táng,

nga piq ma tinmat ang, piq tungkang o nga sungrang ang;

I Asang Tsija sha nga piq ma konáng,

etho piq aa Gentile miqtang ma i jaqhal khaphung raaq batna.

19Piq thamol moq angna, piq ringrak moq angna,

Utang eq tho lam o piq ringrak kap tat moq angna.

20Akot langphung sha piq aa tuk chak moq angna,

Umitko koq nalpang sha piq aa thamit moq angna.

Etharin piq aa asing raaq sha thajin na.

21Etho thaji phan ajat tang shey piq ma tungmang sha shingna.”

Jesu nia Beelzebul

(Mark 3:20–30; Luke 11:14–23)

22Eshi jio, chamtey miqtang aa thangwa eq lota ashey miq tha Jesu ching náng solkat ta, piq tha aduk ni angong angta. Etho Jesu aa eshi miq tha taqhal chakta etho piq aa jin khi eq raaq ta. 23Esho thaji miqtang patja ti ta etho ning aa pitta, “Piq raa David Miqwasa ang moq i?”

24Etharin Phorisi tang aa ira tat atho, ning aa thawel batta, “Thangwa tang thalat chak ma ning lungwang Beelzebul aa piq ma tarong kot aa.”

25Ning aa chamlang ta tathin aa tha Jesu aa usam eq ta, ethi rangma piq aa ning ma batta, “Ashey mung mongna adak dak thamol hit tey waan ang ajo, eshi mung sha kalo uthun angna. Etho ashey samhaq tia himtey mongna adak adak thamol hit tey waan ang ajo, eshi samhaq tia himtey tang jaktung na taphal angna. 26Eshirangma, thangwa hun thangwa sha lat ajo, thangwa mung sha kalo hun thunna. 27Thangwa tang lungwang Beelzebul tarong wang nga thangwa tang sha phan ang jo, nim jiphantey tang ma thangwa tang phan ma utang eq tarong kot aa? Nim jiphantey tang jaksom eq hun, nim raa aja ta takhi aa. 28Etharin nga Shkewa Asang Tsija wang thangwa tang sha phan ang jo, Shkewa mungtan tha nim jaktung na uthok sey angta.

29 “Ashey tarong miq himnáng nop eq tangwang som ang ta ang ajo, jakho piq sha rang khak eq náng thuna. Eshi jio hun uhim sha jin hutna.”

30 “Bara ijam jamna ang moq ang ajo, piq sha i miiksuk tey ang aa etho bara ijamoq thajotey angmoq ang ajo, piq sha uwontey. 31Iri rangma nga nim ma batphang, thaji ngarey etho jashit raaq tangma tolchak eq na, etharin Asang Tsija ma jashit raaq tey eq tolchak kap moq angna. 32Ashey miq eq Miqna Sa ma jashit raaq ajo piq ma tolchak eq na, etharin ashey miq Asang Tsija ma jashit raaq ajo, piq aa tolchak kap moq angna! Iri mingkang etho ukat ang pha mingkang sho tho piq aa tolchak kap moq angna.”

Bang nia bangti

(Luke 6:43–45)

33 “Jaqhal bang o hun jaqhal bangti jin kapna. Bang jashit ang jo bangti sha tho jashit tingo na. Bangti sha siin eq, bang sha sam na. 34Nim pu tang! Nim jashit ang eq, jaqhal raaq chamal eq jin raaq ko inn? Chammatakoi nim tin na chamlang shey aa tha nim nung wang thalat aa. 35Ashey jaqhal miq eq piq jaqhal tangwang thajoq shiwang jaqhal raaq takhong aa. Ashey jashit miq eq piq jashit tangwang thajoq shiwang jashit takhong aa.

36 “Ethi rangma nga nim ma batphang, nim aa chamtan jashit raaq tin, eshi thaji rangma Khaphung Saal o nim aa wetkot eq nin. 37Nim raaq tungkang o, nim raa aja ang moqtey etha ang moq o aja ta shing phan nin.”

Patja ching chu aa

(Mark 8:11,12; Luke 11:29–32)

38Etho chamtey thong tataltey tang nia Phorisi tang aa Jesu ma batta, “Tatalteywa, nang aa í ma ashey patja somlot takhi phu.”

39Jesu aa thawel batta, “Thaneynap miqtang sha rapney jashit nia Shkewa sammoq tey! Nim aa iching kowang patja siin ma ta inn i? Nim aa rangsamal Jonah patja ching sha hun jin siin inn. 40Jonah ajong ngaq mongna rangwung saltom etho rangpal paltom tong ta, eshimal hun Miqna Sa sha tho rangwung saltom etho rangpal paltom mingkang mong o tong ching angna. 41Khaphung Saal o Nineveh miqtang tunlang eq nim raa aja somtey tang ta raaq na, chammatakoi Jonah raaq tat eq ning aa ngarey somlot tha shing chak eq tin kaley ta! Etho nga nim ma batphang, Jonaq wang eq tho ashey ajong miq irina! 42Khaphung Saal o lungwang nu Sheba tunglang eq nim raa aja somtey tang ta raaq na, chammatakoi piq aa lungwang Solomon thung aa tal raaq tat ma, alo mung wang Solomon mung náng thuta! Etho nga nim ma batphang, Solomon wang tho ajong ashey miq irina!”

Anaan tsija wey wel aa

(Luke 11:24–26)

43 “Anaan tsija ashey miq hanphung wang thalat eq, piq nángtong haq bi eq lingqhing ta, etharin khi moq angta. 44Piq aa utin o tathin aa, ‘Nga bari wang thalak tang, eshi i him náng wey wang tey.’ Etho piq wey wel atho, piq him chang pol ang eq, tasang chol etho thaji karok kara khita. 45Etho piq ka eq, piq wang eq tho jashit sanat anaan tsija tang thok solta etho ning eshina thu eq tong ta. Ethi rangma eshi miq tha jakho wang phey náng eq rapney miqshit ma angta. Thaneynap jashit miq tangma irimal sey angna.”

Jesu nu nia no tang

(Mark 3:31–35; Luke 8:19–21)

46Jesu iri raaq raa wan chey atho unu nia upho no tang piq jamoq tachong ma thuta etho ran na banta. 47Etho chamtey miqtang aa Jesu ma batta, “Siin u, ba nu ni ba pho no tang ranna lang aa etho ning ba jamoq wan ma ta.”

48Jesu aa batta, “Utang i nu aa? Utang i pho no tang aa?” 49Etho Jesu aa ujiphantey tang tha sisut eq batta, “Siin inn! Iri tang raa i nu ni i pho no tang. 50Rangmungtan na tongtey i wa raaq tat tey sha i pho no nia i nu.”

Zur Zeit ausgewählt:

Matthew 12: Mmmm

Markierung

Kopieren