Nau Ntơm 6
6
Nau djơh mhĭk hao toyh
1Kon bunuyh ntơm bĭk rơ̆ klơ neh jêh ri deh âk kon bu ur.#Yôp 1:6; 2:1. 2Phung kon bu klâu Brah Ndu#6:2,4 Mlr: phung kon bu klâu lĕ rngôch brah. saơ kon bu ur kon bunuyh ueh jêh ri khân păng gŭ ur sai đah mbu nơm khân păng săch gay sŏk ur. 3Brah Yêhôva lah: “Huêng Brah Gâp mâu mra gŭ mro ôh tâm kon bunuyh yorlah#6:3 Mlr: tâm nau vĭ nhhơt. khân păng knŏng jêng nglay săk, nau rêh bunuyh mra hôm e du rhiăng bar jât năm dơm.”
4Tâm rnôk nây jêh ri pakơi taơ geh phung dŭt toyh luh klơ neh, yorlah kon bu klâu Brah Ndu gŭ ndrel kon bu ur kon bunuyh jêh nây khân păng deh kon. Nây jêng phung bunuyh janh ktang tâm rnôk kăl e, jêng phung lư n'găr.#Kơp 13:33.
5Brah Yêhôva saơ nau djơh mhĭk kon bunuyh lam klơ neh jêh ri khân păng knŏng rvê mĭn ma nau djơh mhĭk dơm,#Mat 24:37; Luk 17:26; I Pê 3:20. 6pôri Brah Ndu nduyh tôr yorlah hŏ njêng jêh kon bunuyh klơ neh, jêh ri rngot tâm nuih n'hâm. 7Brah Yêhôva lah: “Gâp mra ƀư rai ƀhiau mpôl bunuyh bơh klơ neh, jêng ndơ Gâp hŏ njêng jêh, ntơm bơh kon bunuyh tât ma ntil mpô mpa, ntil mpô mpa vơr, ntil sĭm klơ trôk, yorlah Gâp nduyh tôr hŏ njêng jêh khân păng.”
Y-Nôê geh nau yô̆ Kôranh Brah
8Ƀiălah Y-Nôê geh nau yô̆ tanăp măt Brah Yêhôva.
9Aơ jêng noi deh Y-Nôê. Tâm nôk rô̆ păng, Y-Nôê jêng du huê bunuyh sŏng srăng jêh ri mâu geh nau nduyh; păng hăn ndrel ma Brah Ndu.#II Pê 2:5. 10Y-Nôê bă pe nuyh kon bu klâu jêng Y-Sem, Y-Cham jêh ri Y-Japhet.
Y-Nôê ƀư kumpăn
11Neh ntu aƀaơ jêng tih mhĭk da dê tanăp măt Brah Ndu jêh ri bêng ma nau djơh janh. 12Brah Ndu uănh ma neh ntu, saơ khân păng tih mhĭk, yorlah lĕ rngôch bunuyh klơ neh tĭng nau rêh djơh mhĭk da dê. 13Brah Ndu lah ma Y-Nôê: “Gâp hŏ mĭn jêh mra nkhĭt lĕ rngôch bunuyh, yor ma khân păng dĭng neh ntu bêng ma nau djơh janh. Aơ, Gâp mra ƀư rai khân păng bơh klơ neh. 14Ăn may ƀư du mlâm kumpăn ma tơm si gôphê,#6:14 gôphê jêng du tơm si geh dak ƀlĭt ƀitumen. pă jêng âk jrô jêh ri mhĭng đah dak ƀlĭt ƀitumen lĕ tâm trôm nđâp padih. 15Ăn may ƀư kumpăn kơt aơ: Jong du rhiăng prăm jât met,#6:15 Nrn: 300 amma (Nchih tĭng nau ngơi Frănce “cubit”); 1 amma = 44,5 cm. huy bar jât prăm met, prêh jât mprăm met. 16Ăn may ƀư đŏng du chor nkŭm #6:16 Mlr: mpông bloh. ma kumpăn, chor nkŭm klơ ƀah đah kumpăn n'gul met, jêh ri lôk du mlâm mpông bloh ta pŭng kumpăn. Ăn may mra ƀư du tăp tâm dâng, du tăp ta nklang jêh ri du tăp ta klơ. 17Bi Gâp, Gâp mra ăn dak lêng tât ta neh ntu gay ƀư rai lĕ rngôch nglay săk geh n'hâm nsôr gŭ tâm dâng trôk. Lĕ rngôch mpa klơ neh mra khĭt. 18Ƀiălah Gâp mra ƀư nau tâm rnglăp đah may, jêh nây may mra lăp tâm kumpăn nđâp ma ur may, phung kon bu klâu jêh ri phung ƀăn may. 19Ma phung mpa rêh, ăn may djôt leo tâm kumpăn ăp ntil du kôp, geh me, geh nkuăng, gay ma may prăp khân păng rêh ndrel ma may. 20Sĭm tĭng nâm ntil, mpô mpa tĭng nâm ntil, mpa vơr tĭng nâm ntil, ăp ntil du kôp, mra tât da dê ndrel may gay ma may mât mray ma nau rêh khân păng. 21Rlau ma nây, ăn may djôt leo lĕ ndơ sa prăp nkrem gay geh ndơ sa ma may nơm jêh ri lĕ rngôch mpô mpa nây.” 22Y-Nôê ƀư lĕ ntil di ƀoi nau ngơi Brah Ndu hŏ ntăm jêh.#Hêb 11:7.
Zur Zeit ausgewählt:
Nau Ntơm 6: CMO2023
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 United Bible Societies. All rights reserved.
