Nau Ntơm 12
12
Kôranh Brah săch Y-Abram
1Brah Yêhôva lah ma Y-Abram: “Du luh hom tă bơh ƀon tơm, ndŭl mpôl may jêh ri ngih mbơ̆ kon may gay hăn tât ta n'gor Gâp mra ntĭm an ma may.#Kan 7:2-3; Hêb 11:8.
2Gâp mra ăn ma may jêng du mpôl băl toyh,
Gâp mra ăn nau ueh uĭn ma may,
Ăn ma may geh nau lư n'găr,
Jêh ri may mra jêng du tu nau ueh uĭn.
3Gâp mra ăn nau ueh uĭn ma mbu nơm ăn nau ueh uĭn ma may,#Gal 3:8.
Rak rtăp ma mbu nơm rtăp rak may;
Lĕ rngôch mpôl băl bunuyh klơ rplay neh
Mra yor tă bơh may geh nau ueh uĭn.”#12:3 Mlr: Lĕ rngôch mpôl băl bunuyh ta neh ntu mra dăn ma Gâp ăn nau ueh uĭn ma khân păng nâm Gâp hŏ ăn nau ueh uĭn ma may.
Y-Abram tât ta Kanaan
4Y-Abram hăn tĭng nâm nau ngơi Brah Yêhôva lah jêh; Y-Lot hăn ndrel ma păng. Y-Abram geh pơh jât prăm năm nôk păng du luh bơh Charan. 5Y-Abram leo ur păng H'Sarai, Y-Lot, mon păng, n'ho lĕ rngôch drăp ndơ păng prăp nkrem, jêh ri lĕ bunuyh pah kan hŏ geh jêh ta ƀon Charan, hăn tât ta n'gor Kanaan. Lah khân păng hŏ tât jêh ta n'gor Kanaan, 6Y-Abram hăn lam n'gor nây, tât ntŭk geh tơm guyh ta Môrê tâm Sichem. Nôk nây, phung Kanaan hôm gŭ tâm n'gor nây. 7Brah Yêhôva tâm mpơl ma Y-Abram jêh ri lah: “Gâp mra ăn n'gor aơ ma noi deh May.” Ta aơ, Y-Abram ndâk du mlâm nơng ƀư brah ăn ma Brah Yêhôva, jêng Nơm hŏ tâm mpơl ma păng.#Kan 7:5; Gal 3:16. 8Bơh ntŭk nây, păng hăn tât ta nkual klơ dor yôk mpeh luh nar Bêthel, jêh nây ndâk ngih bok ta vah vang Bêthel mpeh nhâp nar, jêh ri Ai mpeh luh nar. Păng ndâk đŏng ta nây du mlâm nơng ƀư brah ăn ma Brah Yêhôva jêh ri kuăl mbơh sơm ma amoh Brah Yêhôva. 9Jêh nây Y-Abram hăn tay mbrơi trŭnh ta n'gor Nêgep.#12:9 Mlr: Mpeh pa dâng
Y-Abram hăn jŭr ta n'gor Êjipt
10Rnôk nây geh nau sa sât ji ngot tâm n'gor. Y-Abram hăn jŭr tât n'gor Êjipt gŭ njưh ta nây, yorlah nau sa sât ji ngot toyh ngăn. 11Nôk păng bơi lăp tâm n'gor Êjipt, Y-Abram lah ma H'Sarai ur păng: “Gâp gĭt ay jêng du huê bu ur ueh ngăn. 12Tơlah phung Êjipt saơ ay, khân păng mra lah: ‘Nây jêng ur păng’; jêh nây khân păng mra nkhĭt gâp, ƀiălah ăn ay rêh. 13Pôri, ăn ay lah jêng oh bu ur gâp, gay ma yor ay dĭng bu ƀư ueh ma gâp, jêh ri yor ay nau rêh gâp đăp mpăn.”#Ntơm 20:2; 26:7. 14Rnôk Y-Abram tât ta n'gor Êjipt, phung Êjipt saơ bu ur nây ueh ngăn. 15Lĕ kôranh kan tâm Pharaôn saơ păng khân păng rnê nau ueh păng tanăp măt hađăch, jêh ri bu njŭn leo bu ur nây lăp ta ngih Pharaôn. 16Yor bu ur nây Pharaôn ƀư nau vơt ueh ăn ma Y-Abram, jêh ri ăn Y-Abram dơi geh âk biăp, ndrôk, seh bri nkuăng, seh bri me, seh samô, oh mon bu klâu jêh ri bu ur.
17Ƀiălah yor tă bơh H'Sarai, ur Y-Abram đŏng, Brah Yêhôva hŏ ntŭp nau mhĭk jâk jêr ma Pharaôn nđâp ma lĕ bunuyh ta ngih păng. 18Pharaôn kuăl Y-Abram jêh ri ôp: “Moh nau may hŏ ƀư ma gâp? Mâm may mâu ăn gâp gĭt bu ur aơ jêng ur may? 19Mâm ƀư may ngơi: ‘Păng jêng oh gâp’ ƀư ma gâp sŏk păng jêng ur? Aƀaơ aơ, ur may aơ, sŏk tay jêh ri du luh hom.” 20Pharaôn đă tahan păng njŭn Y-Abram jêh ri ur păng nđâp ma lĕ rngôch drăp ndơ păng geh du luh bơh n'gor nây.
Zur Zeit ausgewählt:
Nau Ntơm 12: CMO2023
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 United Bible Societies. All rights reserved.
